ກາເຟ ຢູ່ເມືອງປາກຊ່ອງ ຢືນຕົ້ນຕາຍຍ້ອນນໍ້າຫມອກກ້າມ

ວັນທີ 14​ ມັງກອນ​ 2025,​ ທີມງານພະແນກກະສິກໍາ​ ແລະ​ປ່າໄມ້​ແຂວງ​ຈໍາປາສັກ​ ໄດ້ເຄື່ອນໄຫວເກັບກຳຂໍ້ມູນເບື້ອງຕົ້ນຂອງພື້ນທີ່ປູກກາເຟທີ່ໄດ້ຮັບຜົນກະທົບຈາກນໍ້າໝອກກ້າມໄວ​ ຢູ່ເມືອງປາກຊ່ອງ.​

ຈາກການລົງຕິດຕາມເກັບກໍາຂໍ້ມູນກ່ຽວກັບເນື້ອທີ່ກາເຟທີ່ໄດ້ຮັບກະທົບຈາກໄພນໍ້າໝອກກ້າມໄວ (ນໍ້າໝອກເກືອ) ມີ​ 5 ບ້ານ,​ ມີ 37 ຄອບຄົວ, ເນື້ອທີ່ລວມ 32,6 ເຮັກຕາ,​ ໃນນັ້ນ​ ບ້ານຫ້ວຍຊັນ ມີ 13 ຄອບຄົວ, ເນື້ອທີ່ 11,7 ເຮັກຕາ; ບ້ານເຊຕາປຸງ ມີ 15 ຄອບຄົວ, ເນື້ອທີ່ 7,6 ເຮັກຕາ; ບ້ານໜອງຢາເທິງ ມີ 6 ຄອບຄົວ, ເນື້ອທີ່ 7,3 ເຮັກຕາ; ບ້ານຫຼັກ 5 ມີ 3 ຄອບຄົວ, ເນື້ອທີ່ 6 ເຮັກຕາ. ຈາກການຕິດຕາມສະພາບອາກາດໃນວັນທີ 11 - 14 ມັງກອນ 2025 ຂອງທີມງານພະແນກກະສິກຳ ແລະ ປ່າໄມ້ແຂວງ​ ພົບວ່າ ມີເນື້ອທີ່ກາເຟ ທີ່ໄດ້ຮັບຜົນກະທົບຈາກໄພນ້ຳໝອກກ້າມໄວ ເພີ່ມອີກ​ ຄື: ບ້ານຫ້ວຍເສັດ ມີ 20 ຄອບຄົວ, ເນື້ອທີ່ 20 ເຮັກຕາ; ບ້ານກ່ອງຕູນ ມີ 9 ຄອບຄົວ, ເນື້ອທີ່ 11 ເຮັກຕາ; ບ້ານກະຕວດ ມີ 31 ຄອບຄົວ, ເນື້ອທີ່ 7,8 ເຮັກຕາ ເຊິ່ງໃນບັນດາຍັງສືບຕໍ່ເກັບກຳຂໍ້ມູນ.

ຜ່ານຈາກການສຳຫຼວດ​ ແລະ​ເກັບ​ກຳ​ຂໍ້ມູນຂອງທີມງານ​ເຫັນວ່າເຂດທີ່ມີຕົ້ນກາເຟຖືກທຳລາຍຮຸນແຮງຈາກນໍ້າໝອກກ້າມໄວແມ່ນເປັນເຂດດິນລຸ່ມໂດຍສະເພາະແມ່ນຕົ້ນກາເຟທີ່ປູກຢູ່ບ່ອນບໍ່ມີໄມ້ໃຫ້ຮົ່ມ ເຊິ່ງຖືກທຳລາຍຢ່າງຮຸນແຮງຢືນຕົ້ນຕາຍ.​

ອີງຕາມການລາຍງານຂອງຊາວສວນກາເຟ ໃຫ້ຮູ້ວ່າ ພື້ນທີ່ດັ່ງກ່າວເປັນເຂດພື້ນທີ່ເກົ່າທີ່ມັກເກີດບັນຫານໍ້າໝອກກ້າມໄວ​ ຄື: ເຂດບ້ານຫ້ວຍຊັນ, ເຊຕາປຸງ, ໜອງຢາເທິງ, ຫຼັກ 5, ຫ້ວຍເສັດ, ກະຕວດ ແລະ ກອງຕູນ ເຊິ່ງເຄີຍເກີດກັບບັນຫາດັ່ງກ່າວຮຸນແຮງ​ ໃນໄລຍະປີ 2005​ - 2009 ແລະ ໄລຍະປີ 2015 - 2019,​ ເຮັດໃຫ້ຊາວສວນຍ້າຍໄປປູກຢູ່ພື້ນທີ່ອື່ນ.​ ຕໍ່ມາ, ພາຍຫຼັງປີ 2020 ເປັນຕົ້ນມາ ຊາວສວນເຫັນວ່າ ບໍ່ໄດ້ເກີດບັນຫານໍ້າໝອກກ້າມໄວ ທີ່ຮຸນແຮງ ປະກອບກັບຄວາມຕ້ອງການຂະຫຍາຍພື້ນທີ່ປູກກາເຟ ເພີ່ມຂື້ນ ຈິ່ງໄດ້ກັບມາປູກໃນພື້ນທີ່ດັ່ງກ່າວອີກຄັ້ງ.

ການຕິດຕາມສະພາບການ ນັບແຕ່ວັນທີ 9 ເປັນຕົ້ນມາ ທີມງານພະແນກກະສິກໍາ​ ແລະ​ ປ່າໄມ້​ແຂວງ​ ສົມທັບກັບ ຫ້ອງການ​ກະສິກໍາ​ ແລະ​ ປ່າໄມ້​ເມືອງປາກຊ່ອງ​ ໄດ້ສຸມໃສ່ການໃຫ້ຄວາມຮູ້ແກ່ຊາວສວນກາເຟ ກ່ຽວກັບວິທີການຊ່ວຍຫຼຸດຜ່ອນຜົນກະທົບຈາກນໍ້າໝອກກ້າມໄວ ຄື: ເຝົ້າລະວັງ ແລະ ກະກຽມຄວາມພ້ອມ ເມື່ອອາກາດຫຼຸດລົງຮອດ 10 ອົງສາ ໂດຍໃຫ້ກະກຽມສ້າງຄວັນ ໄຟ ຢູ່ພາຍໃນສວນ 2 - 4 ຈຸດ ສຳລັບເຂດທີ່ມັກເກີດນໍ້າໝອກກ້າມໄວ ໂດຍໃຫ້ສ້າງຄວັນໄຟຢູ່ເຂດພື້ນທີ່ລຸ່ມ ແລະ ຫົວລົມ; ຫຼຸດຜ່ອນຜົນເສຍຫາຍຕາມເງື່ອນໄຂສະພາບພື້ນທີ່ ເຊັ່ນ: ຫົດນໍ້າໃສ່ຕົ້ນກາເຟ​ ເພື່ອລ້າງນໍ້າໝອກອອກ, ຖ້າບໍ່ມີນ້ຳ​ ກໍໃຫ້ສັ່ນຕົ້ນກາເຟ​ ເອົານ້ຳໝອກອອກ ແລະ ການໃຊ້ຖົງຢາງປົກຫຸ້ມຕົ້ນກາເຟ; ຕັດແຕ່ງກິ່ງຫງ່າທີ່ຖືກກະທົບຈາກນ້ຳໝອກກ້າມໄວ, ຫາກເຫັນວ່າເສຍຫາຍເກີນ 60% ໃຫ້ຕັດຕອນ.​ ຈາກນັ້ນ,​ ໃຫ້ຝຸ່ນນ້ຳທາງໃບ ໂດຍໃຊ້ຝຸ່ນວິທະຍາສາດ ສູດ​ 20-20-20 ຫຼື 16​-8-8 ເພື່ອຊ່ວຍບຳລຸງໃບ ແລະຕົ້ນກາເຟໃຫ້ກັບມາສົມບູນຄືເກົ່າ.

ພາຍຫຼັງທີ່ຊາວສວນປະຕິບັດຕາມເຕັກນິກທີ່ທີມງານກະສິກໍາແຂວງແນະນໍາເຫັນວ່າຕົ້ນກາເຟທີ່ໃຊ້ຖົງປົກຫຸ້ມແມ່ນສາມາດຫຼຸດຜ່ອນຜົນກະທົບຈາກນ້ຳໝອກກ້າມໄວ ໄດ້ໃນລະດັບດີສົມຄວນ.​ ນອກນີ້,​ ທີມງານໄດ້ປະສານກັບອົງການປົກຄອງທ້ອງຖິ່ນ​ ໃນເຂດທີ່ໄດ້ຮັບຜົນກະທົບ ເພື່ອຊ່ວຍແນະນຳ ປະຊາຊົນຮ່ວມກັນກັນຈັດຕັ້ງປະຕິບັດຕາມແຈ້ງການແນະນຳ ສະບັບເລກທີ 35/ກປຂ.ຈສ ລົງວັນທີ 9 ມັງກອນ 2025 ຂອງພະ ແນກ ກະສິກຳ ແລະປ່າໄມ້.

ຂ່າວ​: ທູນທອງໃຈ

แชร์