ປີຜ່ານມາ ແຂວງເຊກອງ ເກັບລາຍຮັບໄດ້ 600 ຕື້ກວ່າກີບ

ໃນປີ 2024 ຜ່ານມາ, ແຂວງເຊກອງ ສາມາດຈັດເກັບລາຍຮັບເຂົ້າງົບປະມານໄດ້ທັງໝົດ 632.48 ຕື້ກີບ ທຽບໃສ່ແຜນປີເທົ່າກັບ 211.56%. ໃນນີ້, ລາຍຮັບພູດສູນກາງປະຕິບັດໄດ້ 127.03 ຕື້ກີບ ທຽບໃສ່ແຜນປີເທົ່າກັບ 164.83% ແລະລາຍຮັບພູດທ້ອງຖິ່ນ (ພູດຂອງແຂວງ) ປະຕິບັດໄດ້ 505.45 ຕື້ກີບ ທຽບໃສ່ແຜນປີເທົ່າກັບ 227.6%. ສ່ວນລາຍຈ່າຍປະຕິບັດໄດ້ 451.63 ຕື້ກີບ ທຽບໃສ່ແຜນປີເທົ່າກັບ 99.28%.

ທ່ານ ຄໍາຮູ້ ອ່ອນມະນີ ຫົວໜ້າພະແນກການເງິນແຂວງລາຍງານໃນກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງ ໃນວັນທີ 14 ມັງກອນ 2025 ວ່າ: ການຈັດຕັ້ງປະຕິບັດແຜນງົບປະມານແຫ່ງລັດ ໂດຍສະເພາະການຈັດເກັບລາຍຮັບ ແລະ ຄຸ້ມຄອງລາຍຈ່າຍຂອງແຂວງ ແມ່ນປະຕິບັດໄດ້ລື່ນແຜນ, ມີຄວາມຄ່ອງຕົວ ແລະ ສາມາດກວດສອບໄດ້, ການຄຸ້ມຄອງການຊໍາລະສະສາງແກ້ໄຂບັນຫາໜີ້ສິນໂຄງການລົງທຶນຂອງລັດ, ຄ່າກະແສໄຟຟ້າ, ນໍ້າປະປາ, ໂທລະຄົມ ແລະ ການປະຕິບັດເບີກຈ່າຍເງິນເດືອນ-ເງິນນະໂຍບາຍຕ່າງໆໃຫ້ພະນັກງານ-ລັດຖະກອນເປັນປົກກະຕິ, ການຫັນການເກັບລາຍຮັບ ແລະ ຄຸ້ມຄອງລາຍຈ່າຍ ໄປສູ່ລະບົບທັນສະໄໝ, ການຈັດຕັ້ງປະຕິບັດມາດຕະການປະຢັດ-ຕ້ານການຟຸມເຟືອຍ, ການຄຸ້ມຄອງແຮ່ທາດ, ການສະສາງຊັບສິນຂອງລັດ, ການຜັນຂະຫຍາຍ ແລະ ຈັດຕັ້ງປະຕິບັດດໍາລັດ ວ່າດ້ວຍລົດຂອງລັດ (ດໍາລັດສະບັບເລກທີ 599/ນຍ) ດໍາເນີນໄປຢ່າງເປັນລະບົບ ແລະ ມີຜົນສໍາເລັດເປັນກ້າວໆມາ ແລະ ປີນີ້ ກໍເປັນປີທໍາອິດທີ່ສາມາດເກັບລາຍຮັບເຂົ້າງົບປະມານໄດ້ເກີດດຸ່ນ.

ທ່ານ ຄໍາຮູ້ ອີອນມະນີ ໃຫ້ຮູ້ຕື່ມວ່າ: ໃນປີ 2025 ນີ້, ແຂວງເຊກອງ ໄດ້ຮັບຕົວເລກແຜນການເກັບລາຍຮັບໃຫ້ໄດ້ທັງໝົດ 617.01 ຕື້ກີບ ທຽບໃສ່ແຜນປີ 2024 ເພີ່ມຂຶ້ນ 106.36%. ໃນນີ້,ພູດສູນກາງປະຕິບັດຢູ່ທ້ອງຖິ່ນ 95.30 ຕື້ກີບ ເພີ່ມຂຶ້ນ 23.3% ແລະ ພູດທ້ອງຖິ່ນ 521.71 ຕື້ກີບ ທຽບໃສ່ປີ 2024 ເພີ່ມຂຶ້ນ 135.12% ເພື່ອບັນລຸຕົວເລກຄາດໝາຍດັ່ງກ່າວ, ຂະແໜງການເງິນແຕ່ລະຂັ້ນ ຕ້ອງເພີ່ມທະວີຄວາມຮັບຜິດຊອບ ເຄື່ອນໄຫວໂຄສະນາເຜີຍແຜ່ລະບຽບກົດໝາຍ ແລະ ປຸກລະດົມຂົນຂວາຍ ໃຫ້ທຸກພາກສ່ວນທົ່ວສັງຄົມປະກອບສ່ວນເສຍພັນທະອາກອນໃຫ້ລັດ ຕາມລະບຽບກົດໝາຍ, ສຸມໃສ່ພັດທະນາ ແລະ ຫັນວຽກງານການເງິນໄປເປັນທັນສະໄໝ, ເພີ່ມທະວີໃນການຂຸດຄົ້ນທຸກແຫລ່ງລາຍຮັບງົບປະມານໃຫ້ໄດ້ຕາມແຜນ ຫລືລື່ນແຜນການທີ່ຂັ້ນເທິງມອບໃຫ້, ເອົາໃຈໃສ່ຄຸ້ມຄອງລາຍຈ່າຍ, ປະຕິບັດມາດຕະການປະຢັດ-ຕ້ານການຟຸມເຟືອຍ ເພື່ອເຮັດໃຫ້ແຂວງເຊກອງກາຍເປັນແຂວງກຸ້ມຕົນເອງທາງດ້ານງົບປະມານ.
ຂ່າວ: ສັນຍາ, ພາບ: ອັດສະວິນ

แชร์