ປີ 2024 ຈີດີພີ ແຂວງເຊກອງ ບັນລຸເກືອບ 3 ພັນຕື້ກີບ

ໃນປີ 2024 ຜ່ານມາ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງເຊກອງມີຜົນສໍາເລັດພົ້ນເດັ່ນຫລາຍດ້ານເຮັດໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງ ໃນລະດັບ 6% ລວມຍອດຜະລິດຕະພັນພາຍໃນ (GDP) ບັນລຸໄດ້ 2.984 ຕື້ກີບ. ໃນນີ້, ຂະແໜງກະສີກໍາເພີ່ມຂຶ້ນ 4,32% ກວມເອົາ 62,81%, ຂະແໜງອຸດສະຫະກໍາ ເພີ່ມຂຶ້ນ 7,10% ກວມເອົາ 22,51% ແລະຂະແໜງບໍລິການ ເພີ່ມຂຶ້ນ 6,84% ກວມເອົາ 14,68%, ສະເລ່ຍຕໍ່ຫົວຄົນບັນລຸໄດ້ 21,43 ລ້ານກີບຕໍ່ຄົນຕໍ່ປີ.

ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ລາຍງາຍຕໍ່ກອງປະຊຸມສະໄໝສາມັນເທື່ອທີ 8 ສະພາປະຊາຊົນແຂວງເຊກອງ ຊຸດທີ II ໃນວັນທີ 14 ມັງກອນ 2025 ວ່າ: ແຂວງເຊກອງ ສຸມໃສ່ປະຕິບັດແຜນພັດທະນາເສດຖະກິດ-ສັງຄົມ ຕາມທິດສ້າງບາດກ້າວບຸກທະລຸ. ໃນນີ້, ສາມາດເກັບລາຍຮັບເຂົ້າງົບປະມານໄດ້ 632,62 ຕື້ກີບ ເທົ່າກັບ 211,61% ຂອງແຜນປີ ແລະ ປະຕິບັດລາຍຈ່າຍໄດ້ 451,63 ຕື້ກີບ ເທົ່າກັບ 99,28% ຂອງແຜນການປີ ເຊິ່ງເປັນຜົນງານປະກອບສ່ວນເຂົ້າໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຂອງແຂວງ ກໍຄືຊ່ວຍລັດຖະບານໃນການແກ້ໄຂບັນຫາເຄັ່ງຮ້ອນ; ການຜະລິດໃນຂະແໜງກະສິກໍາ ເປັນຕົ້ນ, ການປູກພືດເປັນສິນຄ້າ, ການລ້ຽງສັດເປັນຟາມ ແລະ ການປຸງແຕ່ຜົນຜະລິດກະສິກໍາ ມີທ່າຂະຫຍາຍຕົວເພີ່ມຂຶ້ນ; ການຍາດແຍ່ງດຶງດູດການລົງທຶນເຂົ້າໃນການພັດທະນາພື້ນຖານໂຄງລ່າງສາມາດປະຕິບັດໄດ້ລື່ນແຜນອັນພົ້ນເດັ່ນໂຄງການລົງທຶນຂອງເອກະຊົນພາຍໃນ ແລະຕ່າງປະເທດປະຕິບັດໄດ້ 1,364 ຕື້ກີບ ພັດທະນາຂົງເຂດວັດທະນະທໍາ, ປັບປຸງ ແປະຕິບັດໄດ້ລື່ນແຜນ 361 ຕື້ກີບ ເທົ່າກັບ 35.99%. ພ້ອມນີ້,ກໍໄດ້ເອົາໃຈໃສ່ປັບປຸງ ແລະຂະຫຍາຍຕາໜ່າງດ້ານການສຶກສາ, ຍົກລະດັບການບໍລິການດ້ານສາທາລະນະສຸກໃຫ້ມີການຫັນປ່ຽນຢ່າງຕັ້ງໜ້າ ມີປະສິດທິພາບ ແລະ ປະສິດທິຜົນສູງຂຶ້ນ; ຫັນພະນັກງານລົງກໍ່ສ້າງຮາກຖານການເມືອງ ແລະພັດທະນາຊົນນະບົດແກ້ໄຂຄວາມທຸກຍາກຕາມທິດ 3 ສ້າງ, ການສ້າງບ້ານ-ກຸ່ມບ້ານພັດທະນາ ຕາມ 4 ເນື້ອໃນ 4 ຄາດໝາຍ ໂດຍຖືເອົາການຈັດສັນທີ່ຢູ່ຖາວອນ ແລະ ອາຊີບຄົງທີ່, ສ້າງວຽກເຮັດງານທໍາໃຫ້ປະຊາຊົນ ແນໃສ່ແກ້ໄຂຄວາມທຸກຍາກໃຫ້ປະຊາຊົນ.

ທ່ານ ເຫລັກໄຫລ ສີວິໄລ ໃຫ້ຮູ້ຕື່ມວ່າ: ເຖິງວ່າເສດຖະກິດຂອງແຂວງຂະຫຍາຍຕົວເພີ່ມຂຶ້ນ ແຕ່ຍັງມີສິ່ງທ້າທາຍຈໍານວນໜຶ່ງທີ່ເປັນອຸປະສັກຕໍ່ການພັດທະນາ ເປັນຕົ້ນ ການຜະລິດເປັນສິນຄ້າ ຍັງບໍ່ທັນເຂັ້ມແຂງ, ຕະຫລາດຮອງຮັບຜົນຜະລິດຍັງບໍ່ທັນແນ່ນອນ, ການຄຸ້ມຄອງການລົງທຶນຂອງລັດ, ເອກະຊົນພາຍໃນ ແລະ ຕ່າງປະເທດຍັງບໍ່ທັນເຂັ້ມງວດຕາມລະບຽບກົດໝາຍ, ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນຍັງບໍ່ທັນໄດ້ຮັບຜົນເທົ່າທີ່ຄວນ ໂດຍສະເພາະບັນຫາການຄຸ້ມຄອງລາຄາສິນຄ້າ, ການແກ້ໄຂບັນຫາການຂາດແຄນຢາປິ່ນປົວພະຍາດຢູ່ໂຮງໝໍ, ການແກ້ໄຂບັນຫາຢາເສບຕິດ, ການສ້າງບ້ານປອດຄະດີ-ບ້ານປອດຢາເສບຕິດ ແລະ ການປະກອບສ່ວນ ຂອງສັງຄົມໃນການແກ້ໄຂບັນຫາຢາເສບຕິດຍັງບໍ່ທັນສູງ. ແຕ່ແນວໃດກໍຕາມອົງການປົກຄອງແຂວງຕ້ອງສືບຕໍ່ນໍາພາ-ຊີ້ນໍາພະນັກງານ, ສະມາຊິກພັກ ແລະ ປະຊາຊົນບັນດາເຜົ່າ ພ້ອມກັນພັດທະນາແຂວງເຊກອງ ດ້ວຍຈິດໃຈບຸກທະລຸ ໂດຍໃນປີ 2025 ນີ້ ຮັບປະກັນໃຫ້ແຂວງເຊກອງ ສືບຕໍ່ມີສະຖຽນລະພາບທາງດ້ານການເມືອງ ແລະ ເສດຖະກິດຫຍາຍຕົວຕາມແຜນການທີ່ວາງໄວ້.
ຂ່າວ: ສັນຍາ, ພາບ: ອັດສະວິນ

แชร์