ຄອບຄົວມີຊີວິດດີຂຶ້ນຍ້ອນລ້ຽງໄກ່ ແລະ ລ້ຽງປາ

ຄອບຄົວລຸງບຸນອ່ອນ ສໍເມືອງຊໍາ ອາຍຸ 72 ປີພະນັກງານບໍານານຢູ່ບ້ານນາຊີງ ເມືອງພຽງແຂວງ ໄຊຍະບູລີ ແມ່ນໜຶ່ງໃນຄອບຄົວຕົວແບບໃນການສ້າງເສດຖະກິດ.

ລຸງບຸນອ່ອນ ສໍເມືອງຊໍາ ເລົ່າສູ່ຟັງວ່າ: ພາຍໃນຄອບຄົວມີທັງໝົດ 11 ຄົນ, ມີແຮງານຕົ້ນຕໍ່ 5ຄົນ,ເມື່ອກ່ອນລຸງເປັນພະນັກງານລັດ ພາຍຫຼັງຮອດອາຍຸກະສຽນພັກການອອກຮັບອຸດໜູນບໍານານແລ້ວ ມາຢູ່ນໍາຄອບຄົວເຫັນວ່າການດໍາລົງຊີວິດ, ການເປັນຢູ່ຂອງຄອບຄົວມີຄວາມຫຍຸ້ງຍາກຂາດເຂີນບໍ່ກຸ້ມກິນ. ຈາກນັ້ນຈຶ່ງໄດ້ປືກສານໍາຄອບຄົວ (ເມຍ) ຊອກທາງອອກເມື່ອຄອບຄົວຕົກລົງເຫັນດີແລ້ວ ຈຶ່ງໄດ້ລົງມືບຸກເບີກຈົກໜອງປາ 3 ໜອງເພື່ອລ້ຽງປາ ແຕ່ລາຍຮັບຈາກການລ້ຽງປາ ເຫັນວ່າຍັງບໍ່ທັນກຸ້ມກິນຂາດໆ ເຂີນໆ ແລະກໍ່ໄດ້ເຫັນບ້ານອື່ນເມືອງເຂົາເຮັດຟາມລ້ຽງໄກ່ພັນໄຂ່ ກໍ່ໄດ້ປືກສານໍາຄອບຄົວຕື່ມ ໂດຍໄດ້ລົງທຶນເຮັດຟາມໄກ່ 1 ຫຼັງ, ຊື້ໄກ່ພັນໄຂ່ຈໍານວນ 2,000 ໂຕມູນຄ່າ 120 ລ້ານກີບ ຈາກນັ້ນເຫັນວ່າການລ້ຽງໄກ່ພັນໄຂ່ມີຜົນໄດ້ຮັບດີຂຶ້ນໄດ້ຂະຫຍາຍຟາມໄກ່ອີກ1ຟາມລວມເປັນ 2 ຟາມລົງທຶນເຮັດຟາມໄກ່ແລະຊື້ໄກ່ພັນໄຂ່ມາເພີ່ມໄດ້ລົງທຶນ 350 ລ້ານກີບ, ມີໄກ່ທັງໝົດ 4,000 ໂຕສາມາດເກັບໄຂ່100 ແຕະຕໍ່ມື້. ການໃຫ້ອາຫານໄກ່ມື້ໜຶ່ງໝົດຫົວອາຫານ 16 ເປົ໋າ,ເປົາໜຶ່ງລາຄາ 300,000 ກີບ ຂາຍໄຂ່ມື້ໜຶ່ງໄດ້ເງິນປະມານ 6 ລ້ານກີບ ລົບຄາຫົວອາຫານຄາສິ້ນເປືອງອື່ນໆອອກຈະມີກໍາໄລ 1.2 ລ້ານກີບຕໍ່ມື້. ມາຮອດປະຈຸບັນນີ້ລຸງໄດ້ຂາຍໄກ່ທີ່ໝົດອາຍຸການໃຫ້ໄຂ່ອອກຍັງເຫຼືອໄກ່ພັນໄຂ່ປະມານ 2,000ໂຕ ເກືອຫົວອາຫານມື້ໜຶ່ງໝົດ 10 ເປົ໋າ,ເກັບໄຂ່ໄດ້ 60-70 ແຕະຕໍ່ມື້,ມີສ່ວນເຫຼືອ ຫຼື ກໍາໄລ ສະເລ່ຍ 800,000-900,000 ກີບຕໍ່ມື້.

ລຸງຍັງໄດ້ໃຫ້ຮູ້ຕື່ມວ່າ: ນອກຈາກການລ້ຽງໄກ່ພັນໄຂ່ແລ້ວ ລຸງຍັງໄດ້ລ້ຽງປາ, ປີໜຶ່ງສາມາດລ້ຽງໄດ້ 2 ຊຸດ,ຊຸດລະ 35,000 ໂຕຕໍ່ປີການໃຫ້ອາຫານປາແມ່ນ1ໂຕນຕໍ່ເດືອນລ້ຽງປະມານ 4 ເດືອນໄດ້ຂາຍອອກ,ການຂາຍແມ່ນຂາຍພາຍໃນເມືອງໃນລາຄາສົ່ງກິໂລ 45,000 ກີບ ຫາ 50,000 ກີບ ອີງລາຄາທ້ອງຕະຫຼາດສະເລ່ຍປີໜຶ່ງຂາຍປາປະມານ 4ໂຕນ,ໂຕນລະ 50,000 ລ້ານກີບ,ລວມເປັນເງິນ 200 ລ້ານກີບ,ເມື່ອຫັກຕົ້ນທຶນອອກຈະເຫຼືອ ປະມານ 100 ລ້ານກວ່າກີບ.

ຈາກການລ້ຽງໄກ່ພັນໄຂ່,ລ້ຽງປາມາຮອດປະຈຸບັນນີ້ຄອບຄົວຂອງລຸງໄດ້ມີລົດໃຫຍ່1 ຄັນ,ມີເຮືອນຢູ່ຖາວອນ,ມີເງິນສົ່ງລູກຫຼານໄປຮໍ່າຮຽນແລະມີເງິນແຮໄວ້ໃຊ້ຈ່າຍໃນຄອບຄົວ ມາຮອດປະຈຸບັນນີ້ຊີວິການເປັນຢູ່ຄອບຄົວຂອງລຸງ ບຸນອ່ອນ ສໍເມືອງຊໍາ ມີດີຂຶ້ນກວ່າເກົ່າດັ່ງຄໍາສຸພາສິດທີ່ວ່າ: ອົດສົ້ມຈິ່ງໄດ້ກິນຫວານອົດທົນທານວຽກງານຈິ່ງສໍາເລັດ.

ໂດຍ: ວາຄິມ ວິລະມົນ.
ພາບ: ສົມປະສົງ ສິດທິໄຊ.

แชร์