ຮອງນາຍົກ ພົບປະຢ້ຽມຢາມ ປະຊາຊົນກຸ່ມບ້ານອາໂນ ເມືອງຫຼາ

ດ້ວຍຄວາມເປັນຫ່ວງຂອງການນຳ ພັກ-ລັດ ຂັ້ນສູງທີ່ມີຕໍ່ທ້ອງຖິ່ນຂັ້ນແຂວງ ແລະປະຊາຊົນລາວບັນດາເຜົ່າ ໃນວັນທີ 8 ມັງກອນ 2025 ນີ້ ທ່ານ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ຮອງປະທານຜູ້ປະຈຳການຄະນະກຳມະການ ປກຊ-ປກສ ສູນກາງ, ຮອງນາຍົກລັດຖະມົນຕີ ພ້ອມຄະນະໄດ້ລົງເຄື່ອນໄຫວ ພົບປະຢ້ຽມຢາມ ປະຊາຊົນ ກຸ່ມບ້ານອາໂນ, ເມືອງຫຼາ, ແຂວງອຸດົມໄຊ ຮ່ວມເດີນທາງ ມີທ່ານ ອ່ອນແກ້ວ ອຸ່ນອາລົມ ກຳມະການປະຈຳພັກແຂວງຮອງເຈົ້້າແຂວງພ້ອມດ້ວຍການນຳຂັ້ນສູງກາງ, ຂັ້ນແຂວງ ແລະເມືອງ.

ກຸ່ມບ້ານອາໂນ ກວມເອົາ 11 ບ້ານ, ມີ 3 ຊົນເຜົ່າ ຄື: ຊົນເຜົ່າກຶມມຸ 5 ບ້ານ, ມົ້ງ 1 ບ້ານ ແລະຊົນເຜົ່າອາຄາ 5 ບ້ານ, ມີພົນລະເມືອງທັງໝົດ 7,871 ຄົນ, ຍິງ 4,052 ຄົນ, ກຶມມຸ 2,066 ຄົນ, ກວມ 26.25%, ມົ້ງ 776 ຄົນ, ກວມ 9.85% ແລະ ອາຄາ 5,029 ຄົນ, ກວມ 63.89%, ກຸ່ມບ້ານອາໂນ ເປັນເຂດພູດອຍກວມ 99% ອາຊີບຕົ້ນຕໍຂອງປະຊາຊົນ ແມ່ນເຮັດໄຮ່ ເຮັດສວນ, ລຽງສັດ ແລະຊອກເຄື່ອງປ່າຂອງດົງ, ທ່າແຮງບົ່ມຊ້ອນ ເໝາະແກ່ການປູກພືດພັນທັນຍາຫານ, ລຽງສັດໃຫຍ່, ເປັນແຫຼ່ງທ່ອງທ່ຽວວິຖີຊີວິດຂອງຊົນເຜົ່າຕິດພັນກັບທຳມະຊາດຊົມທະເລໝອກຍາມເຊົ້າຕາມລະດູການ.

ໂອກາດນີ້ທ່ານ ພົນເອກ ຈັນສະໝອນ ຈັນຍາລາດ ໄດ້ສະແດງຄວາມຍ້ອງຍໍຊົນເຊີຍຕໍ່ຜົນງານຂອງກຸ່ມບ້ານ ແລະປະຊາຊົນບັນດາເຜົ່າທີ່ມີມູນເຊື້ອດຸໝັ່ນຂະຫຍັນພຽນ ເຮັດໃຫ້ຫຼາຍຄອບຄົວຫຼຸດພົ້ນອອກຈາກຄວາມທຸກຍາກ. ພ້ອມທັງໄດ້ຮຽກຮ້ອງໃຫ້ ການນໍາແຂວງ-ເມືອງ ສືບຕໍ່ເອົາໃຈໃສ່ ຊຸກຍູ້ການຜະລິດ, ເສດຖະກິດຂອງປະຊາຊົນ ໂດຍຊອກຫາແນວພັນໃໝ່ ແລະເຕັກນິກການຜະລິດແບບໃໝ່ທີ່ທັນສະໄໝເຂົ້າຊ່ວຍໃນການຜະລິດ, ສົ່ງເສີມໃຫ້ປະຊາຊົນລ້ຽງສັດໃຫຍ່ຕິດພັນກັບການປູກຫຍ້າ ແລະປູກພືດເປັນສິນຄ້າ, ເອົາໃຈໃສ່ແກ້ໄຂບັນຫາປະກົດການຫຍໍ້ທໍ້ໃນສັງຄົມເປັນຕົ້ນແມ່ນບັນຫາຢາເສບຕິດໃຫ້ໝົດໄປ, ສືບຕໍ່ເຮັດວຽກງານສາມສ້າງໃຫ້ເຂົ້າສູ່ລວງເລິກ ແລະມີຄວາມໜັກແໜ້ນ.

ທ່ານຮນາຍົກຍັງໄດ້ມອບເງິນສົດຈຳນວນໜຶ່ງໃຫ້ ກຸ່ມບ້ານອາໂນ ເພື່ອເປັນກອງທຶນພັດທະນາບ້ານ ແລະຢ້ຽມຊົນ ວິຖີຊີວິດຂອງປະຊາຊົນພາຍໃນບ້ານ ຕື່ມອີກ.

ຂ່າວ: ຄໍາພັນ ແກ້ວມະນີ

แชร์