ປີ 2024 ເສດຖະກິດເຊກອງ ຂະຫຍາຍຕົວໃນລະດັບ 6%

ໃນປີ 2024 ຜ່ານມາ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງເຊກອງ ມີຜົນສຳເລັດອັນພົ້ນເດັ່ນຫລາຍດ້ານ ເຮັດໃຫ້ເສດຖະກິດຂອງແຂວງ ຂະຫຍາຍຕົວຢ່າງຕໍ່ເນື່ອງ ໃນລະດັບ 6% ຂອງ GDP, ສາມາດເກັບລາຍຮັບໄດ້ 632 ກວ່າຕື້ກີບ, ເທົ່າກັບ 211%, ເກີນແຜນ 111%.

ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ໄດ້ໃຫ້ສຳພາດໃນໂອກາດເຂົ້າຮ່ວມກອງປະຊຸມ ລັດຖະບານເປີດກວ້າງ ຄັ້ງທີ 2 ປີ 2024 ໃນວັນທີ 6 ມັງກອນ 2025 ໂດຍທ່ານ ໄດ້ຍົກໃຫ້ເຫັນ ຜົນ ສຳເລັດພົ້ນເດັ່ນ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນປີ 2024 ຜ່ານມາ ແລະ ແຜນວຽກຈຸດສຸມ ໃນປີ 2025 ຂອງແຂວງ ເຊິ່ງປີ 2024 ຜ່ານມາ ແຂວງເຊກອງ ສາມາດ ຮັກສາໄດ້ສະຖຽນລະພາບທາງດ້ານການເມືອງ ຢ່າງໜັກແໜ້ນ, ເສດຖະກິດມີການຂະຫຍາຍຕົວໃນລະ ດັບ 6% ຂອງ GDP, ມີມູນຄ່າ 2.984 ຕື້ກີບ. ໃນນັ້ນ, ຂະແໜງກະສິກຳ ເພີ່ມຂຶ້ນ 4,32% ກວມເອົາ 62,81%, ຂະແໜງອຸດສະຫະກຳ ເພີ່ມຂຶ້ນ 7,10% ກວມເອົາ 22,51% ແລະ ຂະແໜງບໍລິການ ເພີ່ມຂຶ້ນ 6,84 % ກວມເອົາ 14,68% ຂອງ GDP; ສາມາດເກັບລາຍຮັບໄດ້ 632,62 ຕື້ກີບ, ເທົ່າກັບ 211,61%, ເກີນແຜນ 111%. ໃນນັ້ນ, ພູດຂອງສູນກາງ 127,21 ຕື້ກີບ ແລະ ພູດຂອງທ້ອງຖິ່ນ 505,07 ຕື້ກີບ ເຊິ່ງເປັນຜົນງານທີ່ປະກອບສ່ວນສຳຄັນ ເຂົ້າໃນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ຂອງແຂວງ ກໍຄື ຊ່ວຍລັດຖະບານ ໃນການແກ້ບັນຫາເຄັ່ງຮ້ອນ. ໃນນັ້ນ, ບັນຫາພົ້ນເດັ່ນ ທີ່ເຮັດໃຫ້ເສດຖະກິດຂະຫຍາຍຕົວ ແລະ ການຈັດເກັບລາຍຮັບ ໄດ້ເກີນຄາດໝາຍ ແມ່ນຍ້ອນແຂວງໄດ້ສຸມໃສ່ສ້າງຖານການຜະລິດ, ສຸມໃສ່ການຊຸກຍູ້, ການຄຸ້ມຄອງ, ການດຶງດູດການລົງທຶນຂອງຕ່າງປະເທດ ເຮັດໃຫ້ການລົງທຶນ ພາກເອກະຊົນພາຍໃນ ແລະ ຕ່າງປະເທດ ມີບັນຍາກາດຟົດຟື້ນ ເປັນຕົ້ນ ມີຫລາຍໂຄງການໃຫຍ່ ທີ່ດຳເນີນຢູ່ແຂວງເຊກອງ ໂດຍສະເພາະ ໂຄງການພັດທະນາໄຟຟ້າພະລັງງານລົມ 600 ເມກະວັດ ເຊິ່ງເປັນໂຄງການໃຫຍ່ທີ່ສຸດໃນອາຊີຕະເວັນອອກສ່ຽງໃຕ້, ປັດຈຸ ບັນ ການກໍ່ສ້າງສຳເລັດແລ້ວ 90%, ໂຄງການດັ່ງກ່າວ, ໄດ້ປະກອບສ່ວນສ້າງວຽກເຮັດງານທຳ ໃຫ້ປະຊາຊົນ ບັນດາແຂວງພາກໃຕ້ ເວົ້າລວມ ກໍຄື ປະຊາຊົນ ພາຍໃນແຂວງເຊກອງ. ພ້ອມນີ້, ຍັງມີ ໂຄງການຂຸດຄົ້ນປຸງແຕ່ງແຮ່ຖ່ານຫີນ ທີ່ໄດ້ມີການລົງທຶນມະຫາສານ, ສາມາດສ້າງວຽກເຮັດງານທຳໃຫ້ປະຊາຊົນເປັນຈຳນວນຫລາຍ ແລະ ໂຄງການໄຟຟ້ານ້ຳຕົກ ເປັນຕົ້ນ ເຂື່ອນໄຟຟ້າຫ້ວຍລະແງ 60 ເມກາວັດ, ເຂື່ອນໄຟຟ້ານ້ຳມີມູນ 133 ເມກາວັດ, ປັດຈຸບັນ ການກໍ່ສ້າງສຳເລັດແລ້ວ ຄາດວ່າຈະດຳເນີນການຜະລິດກະເສໄຟຟ້າ ແລະ ສົ່ງອອກຂາຍ ໃນເດືອນມັງກອນປີີນີ້ ແລະ ໂຄງການຂຸດຄົ້ນປຸງແຕ່ງແຮ່ບົກຊິດ ກຳລັງກະກຽມການຂຸດຄົ້ນ. ນອກນັ້ນ, ຍັງມີໂຄງການພັດທະນາກະສິກຳ ແລະ ໂຄງການຂຸດຄົ້ນບໍ່ແຮ່ຂະໜາດນ້ອຍ ເຊິ່ງສາມາດສ້າງວຽກເຮັດງານທຳ ໃຫ້ແກ່ຄົນທ້ອງຖິ່ນຢ່າງຫລວງຫລາຍ, ສາມາດສະ ກັດກັ້ນການໄປເຮັດວຽກຢູ່ຕ່າງປະເທດ ເຊິ່ງປະກອບສ່ວນເຮັດໃຫ້ເສດຖະກິດຂອງແຂວງ ຂະຫຍາຍ ຕົວຕາມທິດ ປະກອບສ່ວນແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ໃຫ້ລັດຖະ ບານ ກໍຄື ແຂວງເຊກອງ. ນອກຈາກນີ້, ວຽກງານພັດທະນາສິນຄ້າໂອດັອບ ກໍມີຫລາຍຜະລິດຕະພັນ ທີ່ປະກອບສ່ວນກະຕຸ້ນເສດຖະກິດຂອງແຂວງ ໄດ້ເປັນຢ່າງດີ.
ດ້ານວັດທະນາທໍາ-ສັງຄົມ ເປັນຕົ້ນ ວຽກງານສຶກສາ ກໍມີຜົນສຳເລັດ ແລະ ດີຂຶ້ນກວ່າປີຜ່ານມາ ແຂວງເຊກອງ ໄດ້ມີນັກຮຽນເກັ່ງລະດັບຊາດ. ພິເສດ ປີ 2024 ລັດຖະບານ ກໍຄື ກະຊວງສຶກສາທິການ ແລະ ກິລາ ໄດ້ມອບໃຫ້ແຂວງເຊກອງ ເປັນເຈົ້າພາບງານມະຫາກຳກິລານັກຮຽນມັດທະຍົມທົ່ວປະເທດ ຄັ້ງທີ VIII ໃນປີ 2027 ຕໍ່ຈາກແຂວງສາລະວັນ. ສ່ວນວຽກງານສາທາລະນະສຸກ ໄດ້ສໍາເລັດການປະກາດເປັນແຂວງຢຸດຕິການຖ່າຍຊະຊາຍ, ຊຸມຊົນເປັນເຈົ້າການດ້ານສາທາລະນະສຸກ “ຊຈສ” ເປັນແຂວງທີ 8 ຂອງປະເທດ. ສຳລັບ ວຽກງານແຮງງານ ແລະ ສະຫວັດດີການສັງຄົມ ສາມາດຂຶ້ນທະບຽນແຮງງານ ພາຍໃນ ແລະ ຕ່າງປະເທດ ຢ່າງເປັນລະບົບ, ສ້າງເງື່ອນໄຂໃຫ້ປະຊາຊົນ ເຂົ້າເຖິງຕະ ຫລາດແຮງງານ ແລະ ມີວຽກເຮັດງານທໍາຫລາຍຂຶ້ນກວ່າເກົ່າ. ສ່ວນວຽກງານພັດທະນາການທ່ອງທ່ຽວ ແຂວງເຊກອງ ໄດ້ສຸມໃສ່ສົ່ງເສີມການທ່ອງທ່ຽວທາງດ້ານວັັດທະນະທຳ ແລະ ທຳມະຊາດ ເປັນຫລັກ ເພື່ອດຶງດຸດເອົານັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ຽວ ສປປ ລາວ ກໍຄື ແຂວງເຊກອງ ໃຫ້ຫລາຍຂຶ້ນ.
ສຳລັບ ທິດທາງແຜນການ ປີ 2025 ແຂວງເຊກອງ ຈະສືບຕໍ່ຊຸກຍູ້ ເຮັດໃຫ້ເສດຖະກິດຂອງແຂວງຂະຫຍາຍຕົວ ໃນລະດັບ 6,2% ຂອງ GDP, ບັນລຸໄດ້ 3.376 ຕື້ກີບ. ໃນນັ້ນ, ຂະແໜງກະ ສິກຳ ເພີ່ມຂຶ້ນ 4,34% ກວມເອົາ 62,99%, ຂະແໜງອຸດສະຫະກຳ ເພີ່ມຂຶ້ນ 7,90% ກວມເອົາ 23,20% ແລະ ຂະແໜງບໍລິການ ເພີ່ມຂຶ້ນ 6,46 % ກວມເອົາ 13,81% ຂອງ (GDP) ແລະ ຈະສຸມໃສ່ຈັດຕັ້ງປະຕິບັດຈັດເກັບລາຍຮັບໃຫ້ໄດ້ 600 ກວ່າຕື້ກີບ. ໃນນັ້ນ, ພູດຂອງສູນກາງ 95 ຕື້ກີບ ແລະ ພູດຂອງທ້ອງຖິ່ນ 520 ກວ່າຕື້ກີບ ແລະ ປະຕິບັດລາຍຈ່າຍ 472 ຕື້ກີບ ຈະກ້າວຂຶ້ນເປັນແຂວງກຸ້ມຕົນເອງທາງດ້ານການເງິນ ຄັ້ງປະຫວັດສາດ ຂອງແຂວງເຊກອງ ແລະ ຈະສືບຕໍ່ດຶງດູດການລົງທຶນຈາກຕ່າງປະເທດ ໃຫ້ນັບມື້ນັບຫລາຍຂຶ້ນ ແລະ ຄຸ້ມຄອງບັນດາໂຄງການລົງທຶນຂະໜາດໃຫຍ່, ໂຄງ ການຂຸດຄົ້ນບໍ່ຖ່ານຫີນ, ໂຄງການພະລັງງານລົມ, ໂຄງການຂຸດຄົ້ນແຮ່ບົກຊິດ ແລະ ໂຄງການພັດທະນາບໍ່ແຮ່ອື່ນໆ ໃຫ້ໄປຕາມແຜນການທີ່ລັດຖະບານ ວາງໄວ້ ທັງຮັບປະກັນຄວາມຍືນຍົງ, ປົກປັກຮັກສາສິ່ງແວດລ້ອມ ແລະ ຈະສຸມໃສ່ແກ້ໄຂຄວາມທຸກຍາກຂອງປະຊາຊົນ ໃຫ້ດີຂຶ້ນ ເປັນກ້າວໆ. ພ້ອມກັນນັ້ນ, ຍັງຈະເນັ້ນໜັກການສ້າງເສດຖະກິດເອກະລາດເປັນເຈົ້າຕົນເອງ ໃຫ້ເປັນຮູບປະທຳ ແລະ ອື່ນໆ.
ຂ່າວ-ພາບ: ທະນູທອງ

แชร์