ປີ 2024 ແຂວງຫຼວງພະບາງ ເກັບລາຍຮັບລື່ນແຜນ 233.76 ຕື້ກີບ

ກອງປະຊຸມສະຫຼຸບວຽກງານການເງິນ ປະຈຳປີ 2024 ແລະ ທິດທາງ ປະຈຳປີ 2025 ໄດ້ໄຂຂຶ້ນໃນລະຫວ່າງວັນທີ 26-27 ທັນວາ 2024 ຜ່ານມາ, ພາຍໃຕ້ການເປັນປະທານຂອງທ່ານ ສັນຕິພາບ ພົມວິຫານ ກໍາມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງການເງິນ.

ທ່ານ ບຸນເຫຼືອ ສິນໄຊວໍຣະວົງ ຮອງເຈົ້າແຂວງຫຼວງພະບາງ ໄດ້ຕາງໜ້າອົງການປົກຄອງແຂວງ ຂຶ້ນປະກອບຄໍາເຫັນໂດຍສັງເຂບ ກ່ຽວກັບການຈັດປະຕິບັດແຜນງົບປະມານ ປີ 2024 ແລະ ທິດທາງ ປີ 2025 ຂອງ ແຂວງຫຼວງພະບາງ ເຊິ່ງຄຽງຄູ່ກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍທ່ານໄດ້ລາຍງານໃຫ້ຮູ້ວ່າ: ການຈັດຕັ້ງປະຕິບັດແຜນງົບປະມານແຫ່ງລັດ (ຕົວເລກຂາດຕົວຮອດ ວັນທີ 19 ທັນວາ 2024) ດ້ານລາຍຮັບປະຕິບັດໄດ້ 946.44 ຕື້ກີບ ເທົ່າກັບ 132.80% ຂອງແຜນດັດແກ້, ລື່ນແຜນ 233.76 ຕື້ກີບ (ແຜນການ ສູນກາງ ແລະ ທ້ອງຖິ່ນ: 712.67 ຕື້ກີບ); ດ້ານລາຍຈ່າຍ: ປະຕິບັດໄດ້ 772.01 ຕື້ກີບ ເທົ່າກັບ 84.14% ຂອງແຜນດັດແກ້ (ແຜນການ: 917.58 ຕື້ກີບ); ການດຸ່ນດ່ຽງ: ສູນກາງດຸນໃຫ້ແຂວງ ປະຕິບັດໄດ້ 207.08 ຕື້ກີບ ເທົ່າກັບ 131.83% ແຜນດັດແກ້ (ແຜນ: ຈໍານວນ 157.08 ຕື້ກີບ).
ພ້ອມກັນນັ້ນ, ການຈັດຕັ້ງປະຕິບັດວຽກງານຄຸ້ມຄອງການເງິນທີ່ຕິດພັນກັບວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ມີຄືດັ່ງນີ້: ໄດ້ລົງເກັບກໍາຂໍ້ມູນ ບັນດາຜູ້ຮັບເໝົາຫຼັກ ແລະ ຜູ້ຮັບເໝົາຊ່ວງຕໍ່ ຂອງຫົວໜ່ວຍວິສາຫະກິດຂະໜາດໃຫຍ່ ເພື່ອຕິດຕາມ ກວດກາ ການຈັດເກັບລາຍຮັບ ທີ່ຕິດພັນກັບການຈັດຕັ້ງປະຕິບັດ ໂຄງການກໍ່ສ້າງ ເຂື່ອນໄຟຟ້ານ້ຳຂອງ ຈຸດຫຼວງພະບາງ; ໄດ້ຈັດຕັ້ງປະຕິບັດການກວດກາຫຼັງການແຈ້ງ ໂຄງການກໍ່ສ້າງ ບໍ່ຕິດພັນກັບງົບປະມານ ປະຕິບັດໄດ້ 9 ຕື້ກີບ; ຄຸ້ມຄອງ, ຕິດຕາມເລັ່ງທວງໜີ້ສິນ ແລະ ແກ້ໄຂຜົນການກວດສອບ ສາມາດເລັ່ງທວງມອບເຂົ້າງົບປະມານ ໄດ້ຈໍານວນ 21.48 ຕື້ກີບ; ການຄຸ້ມຄອງເກັບລາຍຮັບຄ່າເຊົ່າ-ສໍາປະທານ ປີ 2024 ທັງໝົດ 60 ຫົວໜ່ວຍ (ແຜນ 679,122 ໂດລາ), ຜ່ານການຈັດຕັ້ງປະຕິບັດ 10 ເດືອນ ສາມາດເກັບລາຍຮັບຈາກຄ່າເຊົ່າ ໄດ້ 25.74 ຕື້ກີບ ແລະ ເກັບລາຍຮັບຈາກຄ່າສໍາປະທານໄດ້ 6.44 ຕື້ກີບ, ນອກຈາກນັ້ນການຄຸ້ມຄອງເກັບລາຍຮັບຊັບສິນທີ່ສູນກາງມອບໃຫ້ 03 ຫົວໜ່ວຍ ກໍຄື: ບໍລິສັດ ທຽນຈີນຫົວຄານ ບໍ່ແຮ່ (ລາວ) ຈໍາກັດ; ບໍລິສັດ ໄຟຟ້ານ້ຳອູ ຈໍາກັດ ແລະ ບໍລິສັດ ແມ່ຂອງລີເວີມາຍນິ້ງ ຈໍາກັດ. ໃນນີ້, ສາມາດປະຕິບັດໄດ້ແຕ່ ບໍລິສັດ ທຽນຈີນຫົວຄານ ບໍ່ແຮ່ (ລາວ) ຈໍາກັດ ຈໍານວນ 41,15 ຕື້ກີບ ເທົ່າກັບ 86.10% ແລະ ໄດ້ນໍາໃຊ້ລະບົບ POS ໃນການຄຸ້ມຄອງການຈັດເກັບລາຍຮັບຢູ່ແຫຼ່ງທ່ອງທ່ຽວພາຍໃນແຂວງຫຼວງພະບາງ ເຮັດໃຫ້ປະຕິບັດຈັດເກັບລາຍຮັບໄດ້ລື່ນແຜນ 68.08 ຕື້ກີບ ຫຼື ເທົ່າກັບ 311.90%.
ສຳລັບ, ແຜນງົບປະມານແຫ່ງລັດປີ 2025, ຊຶ່ງອີງຕາມຂໍ້ມູນຖານລາຍຮັບ-ທ່າແຮງຕົວຈິງຂອງ ແຂວງຫຼວງພະບາງ, ດ້ານລາຍຮັບ: ລາຍຮັບພູດທ້ອງຖິ່ນ ແຜນ 928.14 ຕື້ກີບ, ໃນນີ້ສ່ວຍສາອາກອນ 836.70 ຕື້ກີບ ແລະ ລາຍຮັບຄຸ້ມຄອງຊັບສິນຂອງລັດ 91.44 ຕື້ກີບ, ດ້ານລາຍຈ່າຍ ທົ່ວແຂວງ 786.40 ຕື້ກີບ; ເກີນດຸ່ນງົບປະມານ ປີ 2025 ຈໍານວນເງິນ 50.3 ຕື້ກີບ, ແຕ່ອີງຕາມກະຊວງການເງິນ ສະເໜີແຜນ ປີ 2025 ຂອງແຂວງຫຼວງພະບາງ ຕໍ່ກອງປະຊຸມສະໄໝສາມັນ ເທຼື່ອທີ 8 ສະພາແຫ່ງຊາດ ຊຸດທີ IX ຄັ້ງວັນທີ 18 ພະຈິກ-11 ທັນວາ 2024 ແມ່ນໄດ້ເພີ່ມແຜນເກັບລາຍຮັບທັງໝົດເປັນ 1,202.20 ຕື້ກີບ ທຽບໃສ່ປີແຜນດັດແກ້ປີ 2024 ເພີ່ມຂຶ້ນ 68.69%; ດ້ານລາຍຈ່າຍ: ລາຍຈ່າຍທົ່ວແຂວງ 994.83 ຕື້ກີບ ທຽບໃສ່ປີແຜນດັດແກ້ປີ 2024 ເພີ່ມຂຶ້ນ 8.42%. ເກີນດຸນງົບປະມານ ປີ 2025 ຈໍານວນເງິນ 157.56 ຕື້ກີບ.

ຂ່າວ: ຈັນທະລາ

แชร์