ທ່ານ ຄໍາລາວັນ ຈັນທະລາວັນ ປະທານອົງການກາແດງແຫ່ງຊາດລາວ ກ່າວວ່າ: ການຈັດກິດຈະກຳຄັ້ງນີ້ ກໍເພື່ອເປັນການສະເຫຼີມສະຫຼອງວັນສ້າງຕັ້ງອົງການກາແດງແຫ່ງຊາດລາວ ຄົບຮອບ 70 ປີ ທັງເປັນການສ້າງຂະບວນການຂໍ່ານັບຮັບຕ້ອນການສະເຫຼີມສະຫຼອງ 3 ວັນປະຫວັດສາດຄື: ວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 70 ປີ ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 50 ປີ ແລະ ວັນເກີດປະທານ ໄກສອນ ພົມວິຫານ ຄົບຮອບ 105 ປີ ໃນໂອກາດນີ້ ທ່ານຍັງໄດ້ກ່າວຄືນເຖິງປະຫວັດຫຍໍ້ ແລະຄວາມເປັນມາຂອງອົງການກາແດງແຫ່ງຊາດລາວ ຊຶ່ງໃນວັນທີ 1 ມັງກອນ 1955 ອົງການກາແດງແຫ່ງຊາດລາວ ໄດ້ຖືກສ້າງຕັ້ງຂຶ້ນໂດຍມີຊື່ວ່າ: ສະພາກາຊາດລາວ ຊຶ່ງໄດ້ຈັດຕັ້ງເຄື່ອນໄຫວໜ້າທີ່ຕົ້ນຕໍຄື: ການຈັດຕັ້ງປະຕິບັດພັນທະຕາມພາລະບົດບາດຂອງຕົນ ແລະ ຕາມສົນທິສັນຍາສາກົນທີ່ລາວເປັນພາຄີ ເພື່ອຊ່ວຍເຫຼືອດ້ານມະນຸດສະທຳ ແລະ ປະຊາສົງເຄາະກະທັນຫັນ ໃນປີ 1975 ສະພາກາຊາດລາວ ໄດ້ປ່ຽນຊື່ມາເປັນສະພາກາແດງລາວ ໄດ້ຈັດຕັ້ງເຄື່ອນໄຫວຕາມນິຕິກຳ ໂດຍການຂົນຂວຍຍາດແຍ່ງການຊ່ວຍເຫຼືອຈາກສາກົນ ຊ່ວຍຂະແໜງສາທາລະນະສຸກເຊັ່ນ: ໂຄສະນາປ້ອງກັນພະຍາດ, ຄຸ້ມຄອງອັດຕາການເກີດ, ການຕາຍ, ໝູນໃຊ້ຢາພື້ນເມືອງສົມທົບຢາຫຼວງ ແລະ ຝຶກອົບຮົມຄວາມຮູ້ດ້ານການສົ່ງເສີມສຸຂະພາບໃຫ້ກຸ່ມຄົນເສຍອົງຄະທີ່ຖືກຜົນກະຈາກສົງຄາມ.

ໃນປີ 1999 ຈົນເຖິງປັດຈຸບັນ ສະພາກາແດງລາວ ໄດ້ປ່ຽນຊື່ມາເປັນອົງການກາແດງແຫ່ງຊາດລາວ ໄດ້ປະຕິບັດໜ້າທີ່ໃນການຈັດຕັ້ງປະຕິບັດວຽກງານອີງໃສ່ 7 ຫຼັກການ ແລະ 9 ໜ້າວຽກ ຄື: 1. ການຊ່ວຍເຫຼືອບັນເທົາທຸກເບື້ອງຕົ້ນ, 2. ການປຸກລະດົມ ແລະຂົນຂວາຍບໍລິຈາກເລືອດ ແລະ ການສະໜອງເລືອດປອດໄພ, 3. ການສົ່ງເສີມສຸຂະພາບຂັ້ນພື້ນຖານ, 4. ການປະຖົມພະຍາບານ, 5. ການກູ້ໄພສຸກເສີນ, 6. ການໂຄສະນາຂົນຂວາຍແຫຼ່ງທຶນ, 7. ການສ້າງສະມາຊິກ ແລະອາສາສະໝັກກາແດງ, 8. ການສືບທາວຫາຍາດພີ່ນ້ອງ ແລະ 9. ການພົວພັນ ແລະ ຮ່ວມມືສາກົນ.

ຂ່າວ-ພາບ: ຊີລິການດາ