ຊາວເມືອງນາຊາຍທອງ ບໍ່ຕ້ອງການສວນກ້ວຍຮຽກຮ້ອງລັດຊ່ວຍແກ້ໄຂ

ເນື່ອງຈາກໃນຊຸມປີຜ່ານມາຫຼາຍແຂວງໃນຂອບເຂດທົ່ວປະເທດໂດຍສະເພາະບັນດາແຂວງທາງພາກເໜືອຂອງລາວໄດ້ຢຸດຕິອະນຸຍາດໃຫ້ເອກະຊົນທັງພາຍໃນ ແລະຕ່າງປະເທດດຳເນີນໂຄງການປູກກ້ວຍອັນເນື່ອງມາຈາກໃຊ້ສານເຄມີ ຫຼື ຢາໃນການບຳລຸງຮັກສາ ແລະປາບສັດຕູພືດຢູ່ໃນລະດັບສູງເກີນໄປອັນໄດ້ສົ່ງຜົນກະທົບຢ່າງຮ້າຍແຮງຕໍ່ສິ່ງແວດລ້ອມ

  ເປັນຕົ້ນແມ່ນຄຸນນະພາບຂອງດິນເສື່ອມເສຍ, ມົນລະພິດໃນອາກາດທີ່ມີຜົນຕໍ່ສັດສາວາສິ່ງລວມທັງສຸຂະພາບ ແລະຊີວິດຂອງຄົນຢ່າງໃດກໍຕາມຈາກການຢຸດຕິຄືດັ່ງກ່າວເຮັດໃຫ້ໂຄງການປູກພືດຊະນິດນີ້ກຳລັງຫຍັບມາສູ່ນະຄອນຫຼວງວຽງຈັນເຂົ້ານັບມື້ ຊຶ່ງຫຼ້າສຸດແມ່ນຢູ່ ເມືອງນາຊາຍທອງ ໂດຍເວລານີ້ກຳລັງຂຸ້ນຂ້ຽວບຸກເບີກພື້ນທີ່ຢູ່ເຂດບ້ານແສນດິນ ແລະບ້ານອີ່ໄລເໜືອ.

  ສຳລັບຢູ່ບ້ານແສນດິນປະຊາຊົນທີ່ບໍ່ປະສົງອອກນາມໄດ້ແຈ້ງຕໍ່ນັກຂ່າວພວກເຮົາວ່າ: ປະຈຸບັນນີ້ບໍລິສັດເອກະຊົນຕ່າງປະເທດກຳລັງເລັ່ງບຸກເບີກເນື້ອທີ່ດິນເພື່ອດຳເນີນການປູກກ້ວຍທີ່ເຊົ່ານຳປະຊາຊົນຜູ້ເປັນເຈົ້າຂອງກຳມະສິດຢູ່ບ້ານນານາດ ເມືອງນາຊາຍທອງ ລວມທັງໝົດປະມານ 200 ກວ່າເຮັກຕາ ແຕ່ຕອ ນດິນແມ່ນຂຶ້ນກັບບ້ານແສນດິນຊຶ່ງກ່ອນໜ້ານີ້ດິນຈຳນວນໜຶ່ງແມ່ນເຄີຍເປັນນາປູກເຂົ້າ, ສວນມັນຕົ້ນ, ສວນສາລີ ແລະ ປູກພືດສວນຄົວຕ່າງໆທີ່ຜະລິດຕອບສະໜອງໃຫ້ກັບຕະຫຼາດໃຫຍ່ໆພາຍໃນນະຄອນຫຼວງວຽງຈັນ.

 ຈາກການລົງພື້ນທີ່ຕົວຈິງຂອງທີມຂ່າວເຫັນວ່າສວນຈະປູກຕົ້ນກ້ວຍຢູ່ບ້ານແສນດິນ ມີ 2 ຈຸດທີ່ຕັ້ງຫ່າງຈາກຊຸມຊົນບ້ານດັ່ງກ່າວປະມານ 1 ກີໂລແມັດ, ບ້ານນານາດປະມານ 3 ກີໂລແມັດ ແລະ ຫ່າງຈາກບ້ານໂພນໄຊ ເມືອງໄຊທານີ ປະມານ 1 ກີໂລແມັດ ຮ້າຍແຮງໄປກວ່ານັ້ນຄືຕິດກັບຕົ້ນນ້ຳໂຍດທີ່ຈະໄຫຼລົງສູ່ແມ່ນ້ຳງື່ມ ແລະໃກ້ກັບອ່າງເກັບນ້ຳຂອງໂຮງງານນ້ຳປະປາແສນດິນແສນດິນນຳອີກ.

  ສ່ວນທີ່ບ້ານອີ່ໄລເໜືອແມ່ນລວມມີ 100 ກວ່າເຮັກຕາ ທີ່ເຊົ່ານໍາປະຊາຊົນຜູ້ເຈົ້າຂອງກຳມະສິດຫຼາຍຄອບຄົວເວລານີ້ກຳລັງບຸກເບີກເຊັ່ນກັນຊຶ່ງຈຸດທີ່ຕັ້ງແມ່ນຢູ່ຄຸ້ມຫຼັງຕະຫຼາດອີ່ໄລຫ່າງຈາກຊຸມຊົນປະມານ 1-2 ກີໂລເທົ່ານັ້ນເປັນເຂດຕົ້ນຫ້ວຍຊາຍຂາວລົງໃສ່ຫ້ວຍໂຄນກ່ອນໄຫຼລົງສູ່ນ້ຳງື່ມໂດຍມີໂຮງງານຜະລິດນ້ຳປະປາຢູ່ຕອນລຸ່ມ.

 ຕໍ່ກັບສວນກ້ວຍດັ່ງກ່າວຜ່ານມາເຄີຍມີພາກສ່ວນກ່ຽວຂ້ອງສ່ວນລັດມາແນະນຳໃຫ້ຢຸດຕິແຕ່ປະຈຸບັນຍັງດຳເນີນການບຸກເບີກຄືເກົ່າປະຊາຊົນຫຼາຍຄົນຕ່າງກໍສະແດງຄວາມກັງວົນ ແລະ ເປັນຫ່ວງເປັນຢ່າງຍິ່ງຕໍ່ບັນຫາສານເຄມີ ແລະ ຢາປາບສັດຕູພືດຫຼັງຈາກໂຄງການເລີ່ມປູກກ້ວຍອາດໃຊ້ຢາໃນຈຳນວນຫຼາຍ ຍ້ອນການປູກກ້ວຍຈຳເປັນຕ້ອງໃຊ້ຢາຈຳນວນຫຼາຍໂດຍນະຄອນຫຼວງວຽງຈັນ ເມືອງເອກຂອງປະເທດທີ່ມີປະຊາກອນອາໄສຢ່າງໜາແໜ້ນບໍ່ເໝາະສົມທີ່ສຸດ ທີ່ເອົາເລື່ອງສວນກ້ວຍເຂົ້າມາໃກ້ຄວນຈະຈັດຢູ່ຈຸດທີ່ເຂດຫ່າງໄກຊຸມຊົນອາດຈະປອດໄພກວ່າອີກຢ່າງໜຶ່ງໃນຈຸດນັ້ນແມ່ນຢູ່ຕົ້ນນໍ້າແມ່ນຈະສ້າງຜົນກະທົບຢ່າ ງໃຫຍ່ຫຼວງໃຫ້ກັບສັດວາສິ່ງ ແລະ ປະຊາຊົນໃນການດຳລົງຊີວິດທຳມາຫາກິນໂດຍສະເພາະແມ່ນນ້ຳເພື່ອມາຜະລິດນ້ຳປະປາແຕ່ຄວນຈະມາສົ່ງເສີມປູກພືດກະ ສິກຳສະອາດແທນອາດດີກວ່າ.

  ຢ່າງໃດກໍຕາມຜ່ານມາໄດ້ມີຫຼາຍຕົວຢ່າງທາງແຂວງທາງພາກເໜືອຂອງປະເທດເຮົາເປັນຕົ້ນແມ່ນ ແຂວງບໍ່ແກ້ວ, ຫຼວງນ້ຳທາ, ໄຊຍະບູລີ, ວຽງຈັນ ແລະ ແຂວງອື່ນໆເວລານີ້ແມ່ນຢຸດຕິການອະນຸຍາດໂຄງການໃໝ່ປູກພືດຊະນິດນີ້ແລ້ວເນື່ອງມີຜົນກະທົບຢ່າງຮ້າຍແຮງຕໍ່ສິ່ງແວດລ້ອມເປັນຕົ້ນແມ່ນຄຸນນະພາບ ຂອງດິນເສື່ອມເສຍ, ມົນລະພິດໃນອາກາດທີ່ສົ່ງຜົນໂດຍກົງຕໍ່ສັດສາວາສີ່ງລວມທັງສຸຂະພາບ ແລະຊີວິດຂອງຄົນຍ້ອນມີການໃຊ້ສານເຄມີຢາຂ້າສັດຕູພືດຈຳນວນຫຼວງຫຼາຍນອກຈາກນີ້ໃນລະຫວ່າງທ້າຍປີ 2018 ຜ່ານມາທີ່ ເມືອງສັງທອງ ນະຄອນຫຼວງວຽງຈັນ ກໍໄດ້ເກີດມີປາກົດການປາຕາຍຈຳນວນຫຼາຍຢູ່ສາຍນ້ຳຕອນໂດຍມີຜົນມາຈາກຢາເຄມີຈາກສວນກ້ວຍຂອງນັກລົງທຶນຕ່າງປະເທດ.

  ຈາກສະພາບບັນຫາຄືດັ່ງກ່າວຫາງສຽງປະຊາຊົນໃນຈຳນວນບ້ານໃກ້ຄຽງແມ່ນເຫັນດີບໍ່ຮັບເອົາສວນກ້ວຍດັ່ງກ່າວມາຢູ່ພາຍໃນຂອບເຂດບ້ານຂອງຕົນທັງນີ້ ສະເໜີຮຽກຮ້ອງມາຍັງພວກສ່ວນທີ່ກ່ຽວຂ້ອງທຸກຂັ້ນນັບແຕ່ສູນກາງລົງຮອດທ້ອງຖິ່ນໂດຍສະເພາະແມ່ນນະຄອນຫຼວງວຽງຈັນ ຂໍໃຫ້ລົງມາຕິດຕາມກວດກາ ແລະແກ້ໄຂບັນຫາດັ່ງກ່າວຢ່າງຮີບດ່ວນກ່ອນສວນກ້ວຍດັ່ງກ່າວຈະສ້າງຜົນກະທົບຕໍ່ປະຊາຊົນຫຼາຍກວ່ານີ້.

ພາບຂ່າວ: 

ນສພ ເສດຖະກິດ-ສັງຄົມ

แชร์