ກະຊວງ ກປ ເຜີຍແຜ່ມະຕິກອງປະຊຸມຄະນະບໍລິຫານງານສູນກາງພັກ ແລະ ປະກາດການຈັດຕັ້ງ

ໃນຕອນເຊົ້າທີ 27 ທັນວາ 2024 ນີ້, ກະຊວງກະສິກຳ ແລະ ປ່າໄມ້ (ກປ) ໄດ້ຈັດຕັ້ງເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝທີ XI ຂຶ້ນທີ່ສະໂມສອນກະຊວງ, ໂດຍການເປັນປະທານເຜີຍແຜ່ຂອງ ສະຫາຍ ລິນຄຳ ດວງສະຫວັນ ເລຂາຄະນະພັກກະຊວງ ລັດຖະມົນຕີກະຊວງກະສິກຳ ແລະ ປ່າໄມ້, ມີບັນດາພະນັກງານ-ສະມາຊິກພັກ ພາຍໃນ ກະຊວງ ເຂົ້າຮ່ວມຮັບຟັງ.

ສະຫາຍ ລິນຄຳ ດວງສະຫວັນ ໄດ້ຍົກໃຫ້ເຫັນວ່າ: ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝທີ XI ທີ່ໄດ້ດຳເນີນລະຫວ່າງວັນທີ 28 ຕຸລາ ຫາ 6 ພະຈິກ 2024 ທີ່ຫ້ອງວ່າການສູນກາງພັກພາຍໃຕ້ການເປັນປະທານຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດແຫ່ງ ສປປ ລາວ ໂດຍກອງປະຊຸມດັ່ງກ່າວ ແມ່ນໄດ້ຍົກສູງຄວາມຮັບຜິດຊອບການເມືອງ ໃນການຄົ້ນຄວ້າ, ປະກອບຄໍາເຫັນ ແລະ ເປັນເອກະພາບ ໃຫ້ທິດຊີ້ນໍາ ຕໍ່ບັນດາເນື້ອໃນທີ່ປຶກສາຫາລືກັນ ເປັນຕົ້ນການຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາ ປະຈໍາປີ 2024 ແລະທິດທາງ,ແຜນການປີ 2025 ຕິດພັນກັບການຕີລາຄາການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ; ການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ປະຈໍາປີ 2024 ແລະທິດທາງ ປີ 2025, ການຕີລາຄາຜົນການດໍາເນີນກອງປະຊຸມໃຫຍ່ຂັ້ນຮາກຖານພັກອ້ອມຂ້າງເມືອງ-ນະຄອນ ແລະ ຮາກຖານບ້ານ, ການກະກຽມ ແລະ ດຳເນີນກອງປະຊຸມໃຫຍ່ອົງຄະນະພັກເມືອງ-ນະຄອນ ແລະ ຮາກຖານພັກອ້ອມຂ້າງແຂວງ-ນະຄອນຫຼວງ ແລະຮາກຖານພັກ ອ້ອມຂ້າງກະຊວງ-ອົງການ, ພ້ອມນີ້, ກໍໃຫ້ຮູ້ກ່ຽວກັບການປັບປຸງເອກະສານທີ່ຈະນໍາເຂົ້າລາຍງານຕໍ່ກອງປະຊຸມໃຫຍ່ຜູ້ແທນທົ່ວປະເທດ ສະໄໝທີ XII ຂອງພັກ.

ໃນຕອນເຊົ້າຂອງວັນດຽວກັນກະຊວງກະສິກໍາ ແລະປ່າໄມ້ ກໍໄດ້ຈັດພິທີປະກາດພະນັກງານອອກຮັບການອຸດໜູນບຳນານ 3 ສະຫາຍ ປະກອບມີ: 1. ສະຫາຍ ຈັນທະບູນ ສອນທະວີ ຮອງຫົວໜ້າກົມກວດກາ, 2. ສະຫາຍ ກອງແກ້ວ ວົງປະເສີດ ຫົວໜ້າກົມ ຜູ້ຊ່ວຍວຽກລັດຖະມົນຕີ ແລະ 3. ສະຫາຍ ອຸດົມ ສີປະເສີດ ຮອງຫົວໜ້າກົມກວດກາ, ພ້ອມນັ້ນກໍປະກາດແຕ່ງຕັ້ງ ສະຫາຍ ສັດທາເທບ ທຳມະຈັກ ເປັນຮອງຫົວໜ້າກົມຊົນລະປະທານ ແລະ ສະຫາຍ ຄຳແຫວນ ແກ້ວມະນີວົງ ເປັນຮອງຫົວໜ້າກົມກວດກາປ່າໄມ້ ໂດຍແມ່ນ ສະຫາຍ ລິນຄຳ ດວງສະຫວັນ ເລຂາຄະນະພັກກະຊວງ ລັດຖະມົນຕີກະຊວງກະສິກຳ ແລະປ່າໄມ້ ເປັນຜູ້ມອບຂໍ້ຕົກລົງວ່າດ້ວຍການອະນຸມັດໃຫ້ລັດຖະກອນຮັບອຸດໜູນບຳນານ ແລະຂໍ້ຕົກລົງວ່າດ້ວຍການແຕ່ງຕັ້ງຮອງຫົວໜ້າກົມກວດກາປ່າໄມ້ ແລະຮອງຫົວໜ້າກົມຊົນລະປະທານ.

แชร์