ປະທານສະພາແຫ່ງຊາດ ຕີລາຄາສູງຕໍ່ຄວາມບຸກບືນຫ້າວຫັນ ຂອງນັກຮົບສື່ມວນຊົນ

ໃນໂອກາດວັນອອກຫນັງສືພິມຜູ້ແທນປະຊາຊົນ ສະບັບທີ 1,000 ແລະ ສ້າງຕັ້ງສື່ມວນຊົນສະພາແຫ່ງຊາດ ຄົບຮອບ 28 ປີ (12 ມິຖຸນາ 1996-12 ມິຖຸນາ 2024), ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ພົບປະໂອລົມສື່ມວນຊົນ ໃນຕອນບ່າຍວັນທີ 27 ທັນວາ 2024, ທີ່ສະພາແຫ່ງຊາດ, ໃຫ້ກຽດເຂົ້າຮ່ວມຮັບຟັງ ມີທ່ານ ໂພສີ ແກ້ວມະນີວົງ ຮອງລັດຖະມົນຕີ ກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ ພ້ອມດ້ວຍສື່ມວນຊົນ.

ທ່ານ ໄຊສົມພອນ ພົມວິຫານ ໄດ້ຕີລາຄາສູງຕໍ່ຄວາມບຸກບືນ,ຫ້າວຫັນ ຂອງນັກຮົບສື່ມວນຊົນ ໃນການປະຕິບັດໜ້າ ທີ່ການເມືອງຂອງຕົນ ໄດ້ຮັບຜົນສໍາເລັດຫລາຍດ້ານເປັນຕົ້ນການໂຄສະນາເຜີຍແຜ່ການເຄື່ອນໄຫວວຽກງານຂອງສູນກາງພັກ, ການດໍາເນີນກອງປະຊຸມສະໄໝສາມັນ ຂອງສະພາແຫ່ງຊາດແຕ່ລະຄັ້ງ, ການເປັນເຈົ້າພາບຈັດກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 ໄດ້ຮັບຜົນສໍາເລັດເປັນຢ່າງດີ ເຮັດໃຫ້ປະຊາຊົນບັນດາເຜົ່າ ໄດ້ຮັບຮູ້ການເຄື່ອນໄຫວຂອງພັກ-ລັດ. ພ້ອມນັ້ນ ທ່ານຍັງໄດ້ຍົກໃຫ້ເຫັນຄວາມສຳຄັນຂອງ ວຽກງານສື່ມວນຊົນ ໃນການເປັນປາກກະບອກສຽງ ໃນການໂຄສະນາ ເຜີຍແຜ່ແນວທາງ ນະໂຍບາຍຂອງພັກ, ລັດຖະທໍາມະນູນ, ກົດໝາຍ ລວມທັງການເຄື່ອນໄຫວວຽກງານຂອງສູນກາງພັກ, ສະພາແຫ່ງຊາດກໍຄືລັດຖະບານ ໃຫ້ພະນັກງານ, ທະຫານຕໍາຫລວດກໍຄືປະຊາຊົນບັນດາເຜົ່າໄດ້ຮັບຮູ້ເຂົ້າໃຈ, ເຊື່ອມຊຶມ ແລະເຂົ້າຮ່ວມໃນການຈັດຕັ້ງປະຕິບັດວຽກງານຕ່າງໆ ໃຫ້ໄດ້ຮັບຜົນສໍາເລັດ, ນໍາເອົາໝາກຜົນແຫ່ງການສ້າງສາພັດທະນາເສດຖະກິດ-ສັງຄົມ ມາສູ່ປະເທດຊາດ, ປັບປຸງຊີວິດການເປັນຢູ່ຂອງປະຊາຊົນບັນດາເຜົ່າ ໃຫ້ນັບມື້ດີຂຶ້ນ. ໝາຍຄວາມວ່າ ສື່ມວນຊົນປະເພດຕ່າງໆ ມີບົດບາດສໍາຄັນຫລາຍ ໃນການນໍາເອົາແນວທາງ ນະໂຍບາຍຂອງພັກ, ກົດໝາຍ, ແຜນພັດທະນາເສດຖະກິດ-ສັງຄົມ ໄປເຜີຍແຜ່ໃຫ້ພໍ່ແມ່ປະຊາຊົນຢູ່ ບັນດາແຂວງ, ເມືອງ, ບ້ານ ລວມທັງເຂດຫ່າງໄກສອກຫລີກ ໂດຍຜ່ານສື່ປະເພດຕ່າງໆ ເປັນຕົ້ນ ໂທລະພາບ, ວິທະຍຸກະຈາຍສຽງ, ໜັງສືພິມ, ສື່ສັງຄົມອອນໄລ. ອີກດ້ານໜຶ່ງ ນັກຮົບສື່ມວນຊົນ ກໍເປັນຜູ້ທີ່ມີພອນສະຫວັນ ໃນການເວົ້າຈາປາໃສ, ມີຄວາມຊໍານານໃນການຜັນຂະຫຍາຍເນື້ອໃນເອກະສານສໍາຄັນຕ່າງໆ ໃຫ້ຜູ້ອ່ານ, ຜູ້ຟັງມີຄວາມສົນໃຈຕິດຕາມຢ່າງຕັ້ງໜ້າ. ວຽກງານສື່ມວນຊົນໃນປັດຈຸບັນ ໄດ້ມີການພັດທະນາ, ກ້າວໜ້າ​, ຂະຫຍາຍຕົວຢ່າງວ່ອງໄວໂດຍສະເພາະສື່ສັງຄົມອອນລາຍເຮັດໃຫ້ອິດທິກໍາລັງປໍລະປັກ ນໍາໃຊ້ສື່ສັງຄົມອອນລາຍ ໃນທາງທີ່ບໍ່ຖືກຕ້ອງ,ໃສ່ຮ້າຍປ້າຍສີໃນທາງທີ່ບໍ່ຖືກຕ້ອງຕາມຄວາມເປັນຈິງ ເຮັດໃຫ້ປະຊາຊົນຈໍານວນໜຶ່ງ ທີ່ມີທັດສະນະຫລັກໝັ້ນການເມືອງບໍ່ທັນໜັກແໜ້ນ ຫລົງເຊື່ອ, ສ້າງຄວາມແຕກແຍກພາຍໃນຂອງພວກເຮົາ ຊຶ່ງເປັນໄພອັນຕະລາຍໄລຍະຍາວ. ຕໍ່ໜ້າສະພາບການດັ່ງກ່າວສື່ມວນຊົນຈະຕ້ອງໄດ້ຄົ້ນຄວ້າວິທີການແກ້ໄຂ.

ການເຄື່ອນໄຫວວຽກງານສື່ມວນຊົນຕ້ອງຮັບປະກັນການຜັນຂະຫຍາຍ ແລະໂຄສະນາເຜີຍ ແຜ່ແນວທາງນະໂຍບາຍຂອງພັກໃຫ້ສັງຄົມໄດ້ຮັບຮູ້ເຂົ້າໃຈ ແລະ ເຂົ້າຮ່ວມການຈັດຕັ້ງປະຕິບັດ  ດັ່ງຄໍາເຫັນຂອງ ປະທານ ໄກສອນ ພົມວິຫານ ໄດ້ກ່າວໄວ້ວ່າ “ທຸກການເຄື່ອນໄຫວດ້ານຖະແຫລງຂ່າວ, ໜັງສືພິມ, ການກະຈາຍສຽງ, ການພິມຈໍາໜ່າຍ, ຮູບເງົາ, ສີລະປະວັນນະຄະດີ ຕ້ອງສະແດງອອກເປັນຈິງເຖິງເນື້ອໃນ ແລະ ລັກສະນະວັດທະນະທໍາໃໝ່ທີ່ກ້າວໜ້າ, ຕ້ອງຕິດແໜ້ນກັບແນວທາງນະໂຍບາຍຂອງພັກ ແລະ ລັດ, ຕ້ອງຕິດແໜ້ນກັບຊີວິດອອກແຮງງານກໍ່ສ້າງ ແລະ ການຕໍ່ສູ້ຂອງປະຊາຊົນບັນດາເຜົ່າ ແນໃສ່ເຊີດຊູສະຕິຕື່ນຕົວສັງຄົມນິຍົມ, ນໍ້າໃຈຟົດຟື້ນອອກແຮງງານ, ປະດິດສ້າງຂອງປະຊາຊົນບັນດາເຜົ່າໃນພາລະກິດປົກປັກຮັກສາ ແລະ ສ້າງສາປະເທດຊາດ”.

ສຳລັບການໂຄສະນາເຜີຍແຜ່ການເຄື່ອນໄຫວວຽກງານຂອງ ສະພາແຫ່ງຊາດ, ສະພາປະຊາຊົນຂັ້ນແຂວງ ມີຄວາມສໍາຄັນຫລາຍ ໂດຍສະເພາະ ການດໍາເນີນກອງປະຊຸມສະໄໝສາມັນຂອງສະພາແຫ່ງຊາດ, ສະພາປະຊາຊົນຂັ້ນແຂວງ, ການເຄື່ອນໄຫວຕິດຕາມກວດກາການປະຕິບັດກົດໝາຍ ແລະ ອື່ນໆ. ເນື່ອງຈາກວ່າ ສະພາແຫ່ງຊາດ ເປັນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ ເປັນອົງການສູງສຸດແຫ່ງອໍານາດລັດ; ສະພາປະຊາຊົນຂັ້ນແຂວງ ກໍເປັນອົງການຕົວແທນຂອງປະຊາຊົນບັນດາເຜົ່າຢູ່ທ້ອງຖິ່ນ ຈຶ່ງມີໜ້າທີ່ຕ້ອງໄດ້ລາຍງານ ການເຄື່ອໄຫວວຽກງານຂອງຕົນ ໃຫ້ຜູ້ມີສິດເລືອກຕັ້ງ ກໍຄື ປະຊາຊົນບັນດາເຜົ່າໄດ້ຮັບຮູ້, ເຂົ້າໃຈ ແລະ ເຂົ້າຮ່ວມການຈັດ ຕັ້ງປະຕິບັດມະຕິຂອງສະພາແຫ່ງຊາດ, ມະຕິຂອງສະພາປະຊາຊົນຂັ້ນແຂວງ ໃຫ້ເກີດໝາກຜົນຕໍ່ປະເທດຊາດ.

ນອກຈາກນີ້, ທ່ານ ໄຊສົມພອນ ພົມວິຫານ ສະເໜີໃຫ້ສື່ມວນຊົນເອົາໃຈໃສ່ການສໍາພາດສະມາຊິກສະພາແຫ່ງຊາດຕໍ່ຫົວຂໍ້ຕ່າງໆ ທີ່ຕິດພັນກັບບັນຫາພົ້ນເດັ່ນຂອງສັງຄົມ, ບັນຫາທີ່ສັງຄົມມີຄວາມສົນໃຈຫລາຍ ເພື່ອໃຫ້ຜູ້ແທນອະທິບາຍ ທີ່ມີເຫດມີຜົນ ໃຫ້ຜູ້ມິສິດເລືອກຕັ້ງໄດ້ເຂົ້າໃຈຕໍ່ບັນຫາຕ່າງໆ; ການຖ່າຍທອດ ການປະກອບຄໍາເຫັນຂອງ ສະມາຊິກສະພາແຫ່ງຊາດ ຢູ່ກອງປະຊຸມ ກໍເປັນວຽກງານທີ່ສໍາຄັນ ເພື່ອເຮັດໃຫ້ຜູ້ມີສິດເລືອກຕັ້ງ ໄດ້ຮັບຮູ້ການປະຕິ ບັດໜ້າທີ່ຕົວແທນຂອງ ສະມາຊິກສະພາແຫ່ງຊາດ ຢູ່ກອງປະຊຸມສະພາແຫ່ງຊາດ; ໃນປີ 2025 ນີ້ ເປັນປີທີ່ຈະມີການກະກຽມໃຫ້ແກ່ ການເລືອກຕັ້ງສະມາຊິກສະພາແຫ່ງຊາດ ຊຸດທີ X ກໍຄືສະມາຊິກສະພາປະຊາຊົນຂັ້ນແຂວງ ຊຸດທີ II ຊຶ່ງເປັນປາງບຸນໃຫຍ່ຂອງທົ່ວປວງຊົນລາວທັງຊາດ. ເພື່ອເຮັດໃຫ້ ການເລືອກຕັ້ງບັນລຸຕາມລະດັບຄາດໝາຍເປັນຕົ້ນເພດ, ເຜົ່າ, ໄວນັ້ນການໂຄສະນາເຜີຍແຜ່ວຽກງານເລືອກຕັ້ງຂອງ ສື່ມວນຊົນປະເພດຕ່າງໆ ມີຄວາມສໍາຄັນຫລາຍຈຶ່ງສະເໜີໃຫ້ສື່ມວນຊົນຈົ່ງໄດ້ກະ ກຽມດ້ານເຄື່ອງມື, ຮູບແບບ, ວິທີການໂຄສະນາ ໃຫ້ສອດຄ່ອງກັບທຸກເປົ້າໝາຍທັງສາມາດດຶງດູດຄວາມສົນໃຈຂອງປະຊາຊົນໃນການຕິດຕາມການໂຄສະນາ.

ຂ່າວ: ສາວລາວໃຕ້

แชร์