ໂຮງຮຽນວິຊະນຸ​ ວິທະຍາ​ ກິດຈະກຳສະແດງສິລະປະ ເພື່ອຕ້ອນຮັບປີໃໝ່ສາກົນ

ວັນທີ​ 25​ ທັນວາ​ 2024, ໂຮງຮຽນວິຊະນຸ​ ວິທະຍາ​ ໄດ້ຈັດງານສະແດງສິລະປະໂຮງຮຽນ​ ເພື່ອສົ່ງທ້າຍປີເກົ່າ​ ຄສ​ 2024​ ແລະ​ ຕ້ອນຮັບປີໃໝ່ສາກົນ ຄສ​ 2025.​ ການສະແດງສິລະປະຄັ້ງນີ້ ຈັດຂຶ້ນ​ຢູ່ໂຮງແຮມຈໍາປາສັກແກຣນ​ ນະຄອນປາກເຊ​ ແຂວງຈໍາປາສັກ​ ໂດຍການເຂົ້າຮ່ວມຂອງ​ ທ່ານ​ ນາງ​ ເພັດພູທອນ ແສນສີ ຜູ້ປະກອບການໂຮງຮຽນວິຊະນຸ​ ວິທະຍາ,​ ທ່ານ​ ເພັດສະໝອນ​ ແກ້ວອ່ອນຫຼ້າ​ ຫົວໜ້າອໍານວຍການ​ໂຮງຮຽນວິຊະນຸ​ ວິທະຍາ​ ພ້ອມດ້ວຍຄະນະອໍານວຍການ,​ ພະນັກງານ,​ ຄູ​ -​ ອາຈານ,​ ພໍ່ແມ່ຜູ້ປົກຄອງ​ ແລະ​ ນ້ອງນ້ອຍນັກຮຽນພາຍໃນໂຮງຮຽນດັ່ງກ່າວເຂົ້າຮ່ວມ.​

ໃນໂອກາດກ່າວເປີດງານ,​ ທ່ານ​ ເພັດສະໝອນ​ ແກ້ວອ່ອນຫຼ້າ​ ຫົວໜ້າອໍານວຍການ​ໂຮງຮຽນວິຊະນຸ​ ວິທະຍາ​ ຍົກໃຫ້ເຫັນການເຄື່ອນໄຫວດ້ານການຮຽນການສອນຂອງໂຮງຮຽນ​ ເຊິ່ງມີທັງຊັ້ນຮຽນລ້ຽງເດັກ​ -​ ອະນຸບານ,​ ປະຖົມ​ ແລະ​ ມັດທະຍົມ,​ ພ້ອມນັ້ນ ຍັງໄດ້ສະແດງໃຫ້ເຫັນຜົນງານອັນພົ້ນເດັ່ນຂອງນັກຮຽນໂຮງຮຽນວິຊະນຸ ວິທະຍາ ທີ່ໄດ້ເຂົ້າຮ່ວມການແຂ່ງຂັນນັກຮຽນເກັ່ງຂອງັ້ນປະຖົມ ແລະຊັ້ນມັດທະຍົມຕອນຕົ້ນ ສາມາດຍາດໄດ້ຫຼາຍລງວັນ ແລະຜົນງານການເຂົ້າຮ່ວມປະກວດສິລະປະ-ດົນຕຣີໂຮງຮຽນທ່ວນະຄອນປາກເຊ.​ ສໍາລັບການສະແດງສິລະປະຂອງໂຮງຮຽນຄັ້ງນີ້ ເປັນງານສະແດງສິລະປະ ປະຈໍາປີ ເຊິ່ງໄດ້ໝູນວຽນມາຄົບຮອບອີກວາລະໜຶ່ງ,​ ຈຸດປະສົງ​ ກໍເພື່ອສ້າງໃຫ້ນ້ອງນັກຮຽນໄດ້ມີສ່ວນຮ່ວມໃນການອອກຄວາມຄິດເຫັນ, ການເຮັດກິດຈະກໍາລວມໝູ່ ແລະ ການກ້າສະແດງອອກ ເພື່ອຄວາມສໍາເລັດຮ່ວມກັນ. ພ້ອມດຽວກັນນັ້ນຍັງ​ເຮັດໃຫ້​ ຄູ​ - ອາຈານ ໄດ້ພົບປະຢ່າງໃກ້ຊິດ ກັບຜູ້ປົກຄອງ, ພໍ່ແມ່ ນັກຮຽນ ແລະ ເຮັດໃຫ້ຜູ້ປົກຄອງໄດ້ເຂົ້າຮ່ວມຊົມການສະແດງອອກຂອງລູກຫຼານ.​ ງານສິລະປະໂຮງຮຽນ ຍັງເປັນສ່ວນໜຶ່ງທີ່ນອນໃນໂຄງການຫຼັກສູດການຮຽນ​ -​ ການສອນ ຕາມ 3 ລັກສະນະ ແລະ 5 ຫຼັກມູນຂອງການສຶກສາ ທີ່ກະຊວງສຶກສາທິການ ແລະ ກິລາວາງອອກ. ໃນງານຄັ້ງນີ້ ປະກອບມີ ການສະແດງສິລະປະດົນຕຣີ, ບົດຟ້ອນໝູ່ຄະນະຂອງຫຼານນ້ອຍ​ນັກຮຽນໃນທຸກຊັ້ນຮຽນ, ການເຕັ້ນ, ຮ້ອງເພງ ແລະ ການສະແດງອື່ນໆ ລວມທັງໝົດມີ 41 ລາຍການ.​ ງານສິລະປະຄັ້ງນີ້ ຍັງໄດ້ສິດສອນ ແລະ ປູກຝັງໃຫ້ເດັກນ້ອຍ ຮູ້ອະນຸລັກ,​ ປົກປັກຮັກສາວັດທະນະທໍາອັນດີງາມຂອງຊາດ​ ແລະ​ຂອງທ້ອງຖິ່ນ ໃຫ້ຍືນຍົງຄົງຢູ່ ສືບທອດສູ່ຄົນຮຸ່ນໃໝ່.​

ພ້ອມກັນນັ້ນໃນງານສະແດງສິລະປະໂຮງຮຽນ ຍັງປະກອບມີງານເທດສະການອາຫານ ໂຮງຮຽນ ກໍແມ່ນສ່ວນໜຶ່ງນອນໃນໂຄງການຫຼັກສູດການຮຽນ​ -​ ການສອນ ໃນວິຊາພື້ນຖານວິຊາຊີບ ເຊີ່ງນ້ອງນັກຮຽນຊັ້ນມັດທະຍົມຕອນປຍໄດ້ຊ່ວຍກັນເປີດຮ້ານຂາຍອາຫານ ລວມທັງໝົດມີ 9 ຮ້ານ ເພື່ອຈໍາໜ່າຍໃຫ້ນັກຮຽນ ແລະ ຜູ້ປົກຄອງທີ່ເຂົ້າມາຮ່ວມງານ ຫຼາຍກວ່າ 2 ພັນຄົນ. ກິດຈະກໍານີ້ຊ່ວຍສ້າງໃຫ້ນ້ອງນັກຮຽນໄດ້ຮຽນຮູ້ ດ້ານການສ້າງກິດຈະກໍາລວມໝູ່, ການບໍລິຫານທຸລະກິດ, ການສ້າງຄວາມເຂົ້າໃຈພື້ນຖານດ້ານການເງີນ, ການພັດທະນາຄວາມຄິດສ້າງສັນ,​ ນະວັດຕະກໍາ,​ ການສ້າງຄວາມຮັບຜິດຊອບຕໍ່ສັງຄົມ ແລະ ສິ່ງແວດລ້ອມ. ໃນສອງກິດຈະກໍາທີ່ກ່າວມານີ້ ແມ່ນຈະໄດ້ສືບຕໍ່ຈັດຂຶ້ນ​ເປັນຈໍາໃນທຸກໆປີ.​ ໃນງານຍັງໄດ້ປະກາດ, ມອບລາງວັນ ສໍາລັບນັກຮຽນເກັ່ງ ແລະ ຍ້ອງຍໍຄູອາຈານສອນດີ ປະຈໍາສົກຮຽນຕື່ມອີກ.
ຂ່າວ​-ພາບ​: ທູນທອງໃຈ
.
ງຄົມ

แชร์