ງານມະຫາກຳສີມືຫັດຖະກຳລາວ ປີ 2024 ພາຍໃຕ້ຄໍາຂວັນ “ ສີໄມ້ລາຍມື ຄືອຸທິຍານແຫ່ງການທ່ອງທ່ຽວ, ເຊື່ອມໂຍງມໍລະດົກຜ້າແພພື້ນເມືອງອາຊຽນ” ໄດ້ປິດລົງວັນທີ 24 ທັນວາ 2024 ນີ້, ພາຍຫຼັງທີ່ເປີດວາງສະແດງ ແລະ ຊື້ຂາຍສິນຄ້າເປັນເວລາ 9 ວັນທີ່ສູນວາງສະແດງສິນຄ້າລາວ-ໄອເຕັກ, ນະຄອນຫຼວງວຽງຈັນ ໂດຍມີຈໍານວນ 243 ຫ້ອງວາງສະແດງ.

ງານດັ່ງກ່າວຈັດໂດຍສະມາຄົມຫັດຖະກຳ​ລາວ ​ຮ່ວມ​ກັບກະຊວງ ອຸດສາຫະກຳ ແລະ ການຄ້າ, ສະພາ​ການ​ຄ້າ ​ແລະ ອຸດສາຫະກໍາແຫ່ງ​ຊາດ​ລາວໂດຍມີ ຫຼາຍກິດຈະກໍາເຊັ່ນ: ການວາງ​ສະ​ແດງ ​ແລະ ຂາຍ​ສິນຄ້າ​ຫັດຖະກຳ; ການປະກວດແຂ່ງຂັນຜະລິດຕະພັນຫັດຖະກຳດີເດັ່ນພາຍໃຕ້ 2 ຫົວຂໍ້ຄື: “ສິລະປະລາຍນາກ” ແລະ “ລວດລາຍດອກໄມ້ປະຈໍາທ້ອງຖິ່ນ”; ການສາທິດຂັ້ນຕອນການຜະລິດສິນຄ້າ​ຫັດຖະກຳລາວ; ສ້າງຄວາມມ່ວນຊື່ນປະຈໍາວັນ ຊຶ່ງມີການສະແດງສິລະປະວັນນະຄະດີ, ການເດີນແບບອາພອນເພດຊົງລາວ ຂອງພາກສ່ວນຕ່າງໆ ເຊັ່ນ: ສິນລະປະສະໝັກຫຼິ້ນກຸ່ມຜູ້ອາວຸໂສບ້ານນາພາສຸກ, ສະແດງສິລະປະ ແລະ ຫຼີ້ນດົນຕີພື້ນເມືອງລາວ, ເດິນແບບ 17 ຊົນເຜົ່າ ແຂວງຫຼວງນໍ້າທາ ຈາກສູນສົ່ງເສີມເຮືອນຫູກມີຖຸນາ; ກິດຈະກໍາເດີນແບບການກຸສົນ ພາຍໃຕ້ໂຄງການ “ຫ່ວງໃຍໄປເຖິງ”.

ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ ກ່າວວ່າ: ການຈັດກອງປະຊຸມຜ້າແພພື້ນເມືອງອາຊຽນ ຄັ້ງທີ9 ຂື້ນເປັນຄັ້ງທຳອິດຢູ່ປະເທດເຮົາສະແດງໃຫ້ເຫັນຂົງເຂດວຽກງານຫັດຖະກຳ ໄດ້ປະຈັກຕາເຖິງການພັດທະນາ​ ສີໄມ້ລາຍມື ຄວາມປານີດບັນຈົງ ແລະ ມໍລະດົກຕົກທອດທີ່ລໍ້າຄ່າຂອງແຜ່ນແພລາວ ທີ່ມີຄວາມໂດດເດັ່ນໃຫ້ເປັນທີ່ຍອມຮັບພາກພື້ນ ແລະ ສາກົນ.