ສພຊ ຈະຮັບຮອງເອົາການປັບປຸງລັດຖະທໍາມະນູນ ໃນຕົ້ນເດືອນເມສາ 2025

ໃນວັນທີ 24 ທັນວານີ້, ຢູ່ສະພາແຫ່ງຊາດ(ສພຊ) ຄະນະກໍາມະການລະດັບຊາດປັບປຸງລັດຖະທຳມະນູນ ສະບັບປີ 2015 (ຄລຊ) ຈັດກອງປະຊຸມພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ, ປະທານ ຄລຊ, ມີຄະນະກຳມະການ ແລະອະນຸກຳມະການຕ່າງໆຂອງ ຄລຊ ເຂົ້າຮ່ວມ. ຄາດວ່າ ຈະຮັບຮອງເອົາການປັບປຸງລັດຖະທໍາມະນູນ ສະບັບດັ່ງກ່າວ ໃນຕົ້ນເດືອນເມສາ 2025.

ກອງປະຊຸມ, ໄດ້ຮັບຟັງລາຍງານຜົນການຄົ້ນຄວ້າ ແລະປັບປຸງເນື້ອໃນຮ່າງລັດຖະທໍາມະນູນຕາມການປະກອບຄໍາເຫັນຂອງສະມາຊິກສະພາແຫ່ງຊາດ ໃນກອງປະຊຸມສະໄໝສາມັນເທື່ອທີ 8 ຂອງ ສພຊ ຊຸດທີ IX ຄັ້ງວັນທີ 29 ພະຈິກ 2024 ເຊິ່ງບັນດາຄໍາເຫັນເຫລົ່ານັ້ນຄະນະຮັບຜິດຊອບໄດ້ຈັດກອງປະຊຸມກວດກາ, ຄົ້ນຄວ້າ ແລະ ປັບປຸງເນື້ອໃນດັ່ງກ່າວໃນຄັ້ງວັນທີ 7-8 ທັນວາຜ່ານມາ.

ຕາມການລາຍງານຂອງອະນຸກຳມະການເນື້ອໃນ ໃຫ້ຮູ້ວ່າ: ກ່ອນລົງທາບທາມຮ່າງລັດຖະທໍາມະນູນດັ່ງກ່າວຢ່າງເປີດກວ້າງຢູ່ແຕ່ລະອົງການ ແລະທ້ອງຖິ່ນ, ຈະນໍາເອົາຮ່າງລັດຖະທໍາມະນູນສະບັບນີ້ ເຂົ້າຂໍທິດຊີ້ນໍາຈາກກອງປະຊຸມກົມການເມືອງສູນກາງພັກເພື່ອເປັນທິດທາງໃຫ້ແກ່ການລົງທາບທາມ. ສໍາລັບກໍານົດເວລາໃນການເປີດກອງປະຊຸມ ສະໄໝວິສາມັນຂອງ ສພຊ ເພື່ອພິຈາລະນາຮັບຮອງເອົາລັດຖະທໍາມະນູນ, ຄະນະຮັບຜິດຊອບໄດ້ຄົ້ນຄວ້າ ແລະສະເໜີຈັດໃນໄລຍະວັນທີ 31 ມີນາ ຫາ 4 ເມສາ 2025.
ທີ່ມາ: ຂປລ

แชร์