ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງສະຫວັນນະເຂດ ຊຸດທີ II ໄຂຂຶ້ນຢ່າງເປັນທາງການແລ້ວ

ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງສະຫວັນນະເຂດຊຸດທີ II ໄຂຂຶ້ນຢ່າງເປັນທາງການໃນຕອນເຊົ້າວັນທີ 24 ທັນວາ 2024 ທີ່ຫໍວັດທະນະທຳໄກສອນ ພົມວິຫານ ນະຄອນໄກສອນພົມວິຫານ ແຂວງສະຫວັນນະເຂດ. ໂດຍການເປັນປະທານຂອງທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ. ເຂົ້າຮ່ວມມີທ່ານ ປະລິນຍາເອກ ນາງ ສູນທອນ ໄຊຍະຈັກ ຄະນະເລຂາທິການສູນກາງພັກ, ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ,  ທ່ານ ບຸນໂຈມ ອຸບົນປະເສີດ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສະຫວັນນະເຂດ ພ້ອມບັນດາທ່ານ ສະມາຊິກສະພາແຫ່ງຊາດ,ສະມາຊິກສະພາປະຊາຊົນແຂວງ,ເຈົ້າເມືອງ,ເຈົ້ານະຄອນໄກສອນພົມວິຫານ, ຫົວໜ້າພະແນກການຕ່າງໆອ້ອມຂ້າງແຂວງເຂົ້າຮ່ວມນຳ.

ທ່ານ ກົງແກ້ວ ມີວໍລະຈັກ ປະທານສະພາປະຊາຊົນແຂວງ ໄດ້ກ່າວສູນທອນພົດໄຂກອງປະຊຸມຢ່າງເປັນທາງການວ່າ: ກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນແຂວງ ຊຸດທີ II  ຈະໄດ້ພິຈາລະນາ, ຮັບຮອງບັນດາເນື້ອໃນທີ່ສໍາຄັນ ຕ່າງໆຂອງແຂວງເປັນຕົ້ນແມ່ນ: ພິຈາລະນາ, ຮັບຮອງເອົາບົດ​ລາຍ​ງານ ຂອງທ່ານ​ເຈົ້າ​ແຂວງ​ສະຫວັນ​ນະ​ເຂດ ກ່ຽວ​ກັບ ການຈັດຕັ້ງປະຕິບັດແຜນ​ພັດທະນາ​ເສດຖະກິດ​-ສັງຄົມ, ​ແຜນ​ງົບປະມານ​ແຫ່ງ​ລັດຂອງແຂວງ ປະຈຳປີ 2024 ແລະ ທິດທາງແຜນ​ການ ປະຈໍາປີ 2025, ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ; ຮັບຟັງລາຍງານຂອງພະແນກສຶກສາທິການ ແລະກິລາແຂວງ ກ່ຽວກັບການຈັດຕັ້ງປະຕິບັດຍຸດທະສາດການປະຕິຮູບລະບົບການສຶກສາ ແລະ ພັດທະນາຊັບພະຍາກອນມະນຸດໃນໄລຍະຜ່ານມາ, ຮັບຟັງລາຍງານຂອງກອງບັນຊາການ ປກສ ແຂວງ ກ່ຽວກັບການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດ ໃນໄລຍະຜ່ານມາ;ພິຈາລະນາ ຮັບຮອງເອົາ ບຸກຄະລາກອນຂອງອົງການປົກຄອງແຂວງ; ຮັບຟັງລາຍງານຂອງອົງການກວດສອບ ປະຈໍາພາກກາງ 2 ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2024 ແລະ ທິດທາງແຜນການ ປະຈໍາປີ 2025; ຮັບຟັງລາຍງານຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2023, ຮັບຟັງລາຍງານຂອງອົງການກວດກາລັດແຂວງ ກ່ຽວກັບ ການຈັດຕັ້ງປະຕິບັດແຜນ ການເຄື່ອນໄຫວວຽກງານ ປະຈໍາປີ 2024 ແລະ ທິດທາງແຜນການປະຈໍາປີ 2025; ບົດລາຍງານ ການແກ້ໄຂຜົນການກວດກາ ຕາມຜົນການກວດສອບ ປະຈຳປີ 2023; ຮັບຟັງລາຍງານຂອງ ອົງການໄອຍະການປະຊາຊົນແຂວງ ກ່ຽວກັບ ການຈັດຕັ້ງປະຕິບັດການເຄື່ອນໄຫວວຽກງານ ປະຈໍາປີ 2024 ແລະ ທິດທາງແຜນການ ປະຈໍາປີ 2025; ຮັບຟັງລາຍງານຂອງສານປະຊາຊົນແຂວງ ກ່ຽວກັບ ການຈັດຕັ້ງປະຕິບັດການເຄື່ອນໄຫວວຽກງານ ປະຈໍາປີ 2024 ແລະ ທິດທາງແຜນການ ປະຈໍາປີ 2025ແລະ ພິຈາລະນາ, ຮັບຮອງການສ້າງ ແລະ ປັບປຸງນິຕິກໍາໃຕ້ກົດໝາຍ 3 ສະບັບ, ປັບປຸງ 2 ສະບັບ ສ້າງໃໝ່ ຈໍານວນ 1 ສະບັບ ຄື: ຮ່າງຂໍ້ຕົກລົງຂອງທ່ານເຈົ້າແຂວງ ວ່າດ້ວຍ ການຄຸ້ມຄອງທີ່ດິນວັດທະນາທໍາ ພາຍໃນແຂວງສະຫວັນນະເຂດ (ສ້າງໃໝ່) ແລະ ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການກຳນົດເຂດປະເມີນເຂດລາຄາທີ່ດິນ ແລະສິ່ງປຸກສ້າງພາຍໃນແຂວງສະຫວັນນະເຂດ (ປັບປຸງ); ແລະ ຂໍ້ຕົກລົງຂອງທ່ານເຈົ້າແຂວງວ່າດ້ວຍການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະກາງ (ປັບປຸງ), ຮັບຟັງລາຍງານຂອງສະພາປະຊາຊົນແຂວງກ່ຽວກັບການຈັດຕັ້ງປະຕິບັດການເຄື່ອນໄຫວວຽກງານ ປະຈໍາປີ 2024 ແລະ ທິດທາງແຜນການ ປະຈໍາປີ 2025.

ກອງປະຊຸມຄັ້ງນີ້ຍັງຈະໄດ້ຮັບຟັງການຊີ້ແຈງຂອງອົງການປົກຄອງແຂວງ ແລະພາກສ່ວນທີ່ກ່ຽວຂ້ອງຕໍ່ຄຳຖາມຂອງບັນດາທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ແລະສະມາຊິກສະພາປະຊາຊົນແຂວງຕື່ມອີກ.

ສຳລັບກອງປະຊຸມສະໄໝສາມັນເທື່ອທີ 8  ຂອງສະພາປະຊາຊົນແຂວງຊຸດທີ II ຈະໄດ້ດໍາເນີນໄປເປັນເວລາ 4 ວັນນັບແຕ່ວັນທີ 24 –-  27 ທັນວາ 2024 ນີ້ ຈຶ່ງສຳເລັດ.

แชร์