ເປີດສູນກວດສຸຂະພາບແຮງງານພາຍໃນ ແລະ ຕ່າງປະເທດ

  ໃນວັນທີ 26 ເມສາ 2019 ໄດ້ມີພິທີເປີດສູນກວດກາແຮງງານພາຍໃນ ແລະຕ່າງປະເທດຂຶ້ນ, ພາຍໃຕ້ການເຂົ້າຮ່ວມ ແລະຕັດແຖບຜ້າຂອງ ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະສະຫວັດດີການສັງຄົມ (ຮສສ) ມີບັນດາ ທ່ານ ຮສ.ດຣ ບຸນໜັກ ໄຊຊະນະສົງຄາມ ຫົວໜ້າກົມປິ່ນ ປົວ ແລະຟື້ນຟູໜ້າທີ່ການຈາກກະຊວງສາທາລະນະສຸກ, ຫົວໜ້າກົມຄຸ້ມຄອງແຮງງານຈາກກະຊວງ ຮສສ ແລະທ່ານນາງ ມະນີລັກ ຈັນທະບູລີ ຜູ້ອຳນວຍ ການສູນກວດກາສຸຂະພາບແຮງງານພາຍໃນ ແລະຕ່າງປະເທດ, ພ້ອມນັ້ນຍັງມີບັນດາແຂກຖືກເຊີນເຂົ້າຮ່ວມ.

  ທ່ານ ພົງໄຊສັກ ອິນຖາລາດ ກົວໜ້າກົມຄຸ້ມຄອງແຮງງານກ່າວວ່າ: ສູນແຫ່ງນີ້ປະກອບດ້ວຍເຄື່ອງກວດສຸຂະພາບ, ເຄື່ອງວິເຄາະ, ກວດທາດເບື່ອ, ກວດ ຜົນກະທົບຈາກວຽກງານ ແລະມີລົດ ເອັກສະເລທີ່ສາມາດໃຫ້ບໍລິການແບບເຄື່ອນທີ່ໃນຂອບເຂດທົ່ວປະເທດ. ໄດ້ຮັບການສ້າງຕັ້ງຂຶ້ນພາຍໃຕ້ເງື່ອນໄຂ ແລະສະພາບແຫ່ງຄວາມຮຽກຮ້ອງຕ້ອງການຂອງວຽກງານປົກປ້ອງສິດ ແລະ ຜົນປະໂຫຍດຂອງຜູ້ອອກແຮງງານທາງດ້ານວຽກງານຄວາມປອດໄພ ແລະສຸຂະພາ ບແຮງງານຕາມທີ່ໄດ້ກຳນົດໄວ້ໃນກົດໝາຍວ່າດ້ວຍແຮງງານ ແລະລະບຽບການທີ່ກ່ຽວຂ້ອງກັບການປ້ອງກັນການເກີດພະຍາດຕ່າງໆຈາກການເຮັດວຽກຂອງຜູ້ອອກແຮງງານ, ຊຶ່ງເປັນສູນດຽວ ແລະ ເປັນຄັ້ງທຳອິດທີ່ຈະໄດ້ມີການບໍລິການກວດສຸຂະພາບແຮງງານປະຈຳປີແບບເປັນລະບົບຄົບຊຸດ ແລະ ທັນສະໄໝຢູ່ລາວ.

  ສູນກວດສຸຂະພາບແຮງງານແຫ່ງນີ້ຈະເປັນທັງບ່ອນໃຫ້ບໍລິການກວດສຸຂະພາບປະຈຳປີຂອງຜູ້ອອກແຮງງານ, ກວດສຸຂະພາບຂອງແຮງງານຕ່າງປະເທດທີ່ເຂົ້າມາເຮັດວຽກຢູ່ລາວ ແລະຈະເປັນທັງສູນຂໍ້ມູນຂ່າວສານດ້ານສຸຂະພາບແຮງງານໃນທົ່ວປະເທດທີ່ຕ້ອງການໃຫ້ຜູ້ອອກແຮງງານໄດ້ຮັບການກວດສຸຂະພາບຢ່າງໜ້ອນໜຶ່ງຄັ້ງຕໍ່ປີ, ພ້ອມທັງເປັນການຕິດຕາມຄວາມພ້ອມດ້ານສຸຂະພາບຂອງຜູ້ອອກແຮງງານໃນການເຮັດວຽກ, ປ້ອງກັນ ແລະ ຮັກສາໃຫ້ທັນຕໍ່ພະຍາດຕ່າງໆທີ່ເກີດຂຶ້ນຈາກການເຮັດວຽກ, ປ້ອງກັນ ຫຼື ຫຼຸດຜ່ອນພາລະຕ່າງໆທີ່ອາດເກີດຂຶ້ນຕໍ່ຜູ້ອອກແຮງງານ, ຜູ້ໃຊ້ແຮງງານ, ຄອບຄົວ ແລະ ສັງຄົມອັນເນື່ອງມາຈາກການເປັນພະຍາດທີ່ສາມາດປ້ອງກັນໄດ້ກ່ອນ, ຊຶ່ງຂໍ້ມູນຂອງຜູ້ອອກແຮງງານນີ້ຍັງສາມາດນຳມາວິເຄາະ ແລະກຳນົດເປັນນະໂຍບາຍຕ່າງໆເພື່ອປ້ອງກັນ ແລະແກ້ໄຂບັນຫາທາງດ້ານສຸຂະພາບທັງເປັນການເພີ່ມຂີດຄວາມສາມາດໃນການເຮັດວຽກຂອງແຮງງານໃນລະບົບເສດຖະກິດຂອງປະເທດໃຫ້ສູງ ຂຶ້ນ.

ພາບຂ່າວ: ພິມພອນ

• 30/04/2019