ລົງນາມໂຄງການສ້າງຄວາມເຂັ້ມແຂງວຽກງານປຸກລະດົມບໍລິຈາກເລືອດ ແລະສະໜອງເລືອດປອດໄພ

ໃນວັນທີ 23 ທັນວາ 2024 ທີ່ ນະຄອນຫຼວງວຽງຈັນ, ອົງການກາແດງແຫ່ງຊາດລາວ ແລະອົງການກາແດງສະວິດສ໌ ປະຈຳ ສປປ ລາວ ໄດ້ລົງນາມບົດບັນທຶກຄວາມເຂົ້າໃຈ “ໂຄງການ ສ້າງຄວາມເຂັ້ມແຂງໃຫ້ແກ່ວຽກງານປຸກລະດົມບໍລິຈາກເລືອດ ແລະ ສະໜອງເລືອດປອດໄພ” ລະຫວ່າງ ທ່ານ ດຣ. ຈັນທະລາ ສຸກສາຄອນ ຫົວໜ້າສະຖາບັນເລືອດແຫ່ງຊາດ ແລະ ທ່ານນາງ ບີນີຕາ ໂປ່ເດ໋ວ ຜູ້ຕາງໜ້າອົງການກາແດງສິວິດສ໌ ປະຈຳ ສປປ ລາວ ໂດຍມີ ທ່ານ ຄຳລາວັນ ຈັນທະລາວັນ ປະທານອົງການກາແດງແຫ່ງຊາດລາວ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

ໂຄງການດັ່ງກ່າວ ເປັນໂຄງການຮ່ວມມື ແລະ ແລກປ່ຽນທາງດ້ານວິຊາການ ແລະ ງົບປະມານ ເພື່ອປະກອບສ່ວນເຂົ້າໃນການຈັດຕັ້ງປະຕິບັດແຜນຍຸດທະສາດຂອງອົງການກາແດງແຫ່ງຊາດລາວ ໂດຍສະເພາະແມ່ນແຜນຈັດຕັ້ງປະຕິບັດ ເພື່ອປຸກລະດົມບໍລິຈາກເລືອດ ແລະ ຮັບປະກັນການສະໜອງເລືອດໃຫ້ມີຄຸນນະພາບສູງຂຶ້ນ ໂດຍແນ່ໃສ່ການສະໜອງເລືອດພຽງພໍ ແລະ ປອດໄພໃຫ້ແກ່ຄົນເຈັບທຸກຄົນທີ່ຕ້ອງການເລືອດ. ໂຄງການນີ້ ຈະໄດ້ຮັບການຈັດຕັ້ງປະຕິບັດໂດຍ ສະຖາບັນເລືອດແຫ່ງຊາດ, ອົງການກາແດງແຫ່ງຊາດລາວ ເລີ່ມຕັ້ງແຕ່ ເດືອນມັງກອນ 2025 ເປັນຕົ້ນໄປ ແລະ ໂຄງການຈະສິ້ນສຸດໃນວັນທີ 31 ທັນວາ 2028 ໂດຍໄດ້ຮັບການສະໜັບສະໜູນຈາກອົງການກາແດງສະວິດສ໌ ເຊິ່ງງົບປະມານໂຄງການທັງໝົດ ແມ່ນ 716,642 ສະວິດສ໌ ຝຣັ່ງ (CHF).

ທ່ານ ດຣ. ຈັນທະລາ ສຸກສາຄອນ ກ່າວວ່າ: ໂຄງການດັ່ງກ່າວມີເປົ້າໝາຍຄື: 1) ເພີ່ມທະວີການເຂົ້າເຖິງການບໍລິການເລືອດ ແລະ ປັບປຸງຄຸນນະພາບຂອງການບໍລິຈາກເລືອດ, ປັບປຸງການປະສານງານ ແລະ ສົ່ງເສີມໃຫ້ສັງຄົມປະກອບສວ່ນໃນການບໍລິຈາກເລືອດໃຫ້ຫຼາຍຂຶ້ນ ເພື່ອໃຫ້ບັນລຸ 100% ການບໍລິຈາກເລືອດແບບສະຫມັກໃຈໂດຍບໍ່ຮຽກຮ້ອງສິ່ງຕອບແທນ, 2) ປຸງປຸງການບໍລິການເລືອດໃຫ້ມີຄຸນນະພາບໂດຍຜ່ານໂດຍເພີ່ມການເຂົ້າເຖິງ, ຄຸນນະພາບ, ຄວາມປອດໄພ, ປະສິດທິພາບ ແລະ ຄວາມຍືນຍົງຂອງວຽກງານບໍລິການເລືອດ, 3) ໃຫ້ປະຊາຊົນມີສ່ວນຮ່ວມໃນການປ່ຽນແປງພຶດຕິກຳ ໂດຍເພີ່ມການບໍລິຈາກເລືອດໃນກຸ່ມສະເພາະເພື່ອປ່ຽນພຶດຕິກຳໄປສູ່ການບໍລິຈາກເລືອດ, ແລະ 4) ສ້າງຄວາມເຂັ້ມແຂງ ແລະ ອຳນວຍຄວາມສະດວກເພື່ອໃຫ້ມີຄວາມຍືນຍົງ, ການຕັດສິນໃຈໃນລະດັບຂັ້ນທ້ອງຖິ່ນ ແລະ ຊຸກຍູ້ໃຫ້ໄດ້ຮັບການສະໜັບສະໜູນທາງດ້ານນະໂຍບາຍ.

ທ່ານ ນາງ ບີນີຕາ ໂປ່ເດ໋ວ ກ່າວວ່າ: ອົງການກາແດງສະວິດສ໌ ຮູ້ສຶກພາກພູມໃຈທີ່ໄດ້ໃຫ້ການສະໜັບສະໜູນສະເພາະດ້ານໃຫ້ແກ່ສະຖາບັນເລືອດແຫ່ງຊາດລາວ. ການຮ່ວມມືໃນຄັ້ງນີ້ ຈະຊ່ວຍຍົກລະດັບດ້ານຂີດຄວາມສາມາດ ແລະ ດ້ານປະສິດທິພາບຂອງວຽກງານປຸກລະດົມບໍລິຈາກເລືອດ ແລະ ສະໜອງເລືອດປອດໄພໃນຂອບເຂດທົ່ວປະເທດ. ໂຄງການນີ້ ບໍ່ພຽງແຕ່ໃຫ້ບຸລິມະສິດທາງດ້ານວິຊາການໃນວຽກງານປຸກລະດົມບໍລິຈາກເລືອດ ແລະ ສະໜອງເລືອດປອດໄພເທົ່ານັ້ນ ແຕ່ຍັງຊ່ວຍສ້າງຄວາມເຂັ້ມແຂງພື້ນຖານການເຄື່ອນໄຫວຂອງວຽກງານປຸກລະດົມບໍລິຈາກເລືອດ ແລະ ສະໜອງເລືອດປອດໄພອີກດ້ວຍ ໂດຍຜ່ານການຝຶກອົບຮົມ, ປັບປຸງພື້ນຖານໂຄງລ່າງ, ແລະ ສົ່ງເສີມວັດທະນະທຳການບໍລິຈາກເລືອດດ້ວຍຄວາມສະໝັກໃຈ.”

ໂອກາດດັ່ງກ່າວທ່ານປະທານອົງການກາແດງແຫ່ງຊາດລາວ ໄດ້ຕີລາຄາສູງຕໍ່ການຮ່ວມມືໃນຄັ້ງນີ້, ຊຶ່ງເປັນ “ບາດກ້າວໜຶ່ງທີ່ສຳຄັນສຳລັບວຽກງານປຸກລະດົມບໍລິຈາກເລືອດ ແລະ ສະໜອງເລືອດປອດໄພ ທີ່ມີຄວາມເຂັ້ມແຂງ ແລະ ເຊື່ອຖືໄດ້ ຊຶ່ງມີຄວາມສຳຄັນທີ່ສຸດຕໍ່ການຊ່ວຍຊີວິດ ແລະຊ່ວຍສະໜັບສະໜູນລະບົບການປິ່ນປົວສຸຂະພາບ ໃນ ສປປ ລາວ.”
ຂ່າວ: ສາວລາວໃຕ້

แชร์