ສຳມະນາການນຳໃຊ້ພາສາລາວ ແລະ ການຄຸ້ມຄອງສື່ສັງຄົມອອນລາຍ

  ຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ຈັດກອງປະຊຸມກ່ຽວກັບການນໍາໃຊ້ພາສາລາວ, ການຄຸ້ມຄອງ ແລະນໍາໃຊ້ສື່ສັງຄົມອອນລາຍຄັ້ງທີ 2 ຂຶ້ນໃນລະຫວ່າງວັນທີ 29-30 ເມສາ 2019 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ພາຍໃຕ້ການເປັນປະທານຂອງ ທ່ານ ຈະເລີນ ເຢຍປາວເຮີ ລັດຖະ ມົນຕີປະຈໍາສໍານັກງານນາຍົກລັດຖະມົນຕີໂຄສົກລັດຖະບານ,

  ມີທ່ານ ສະຫວັນຄອນ ຣາຊະມຸນຕີ ຮອງລັດຖະມົນຕີກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວ, ຫົວໜ້າກົມ, ຮອງຫົວໜ້າກົມຕ່າງໆຈາກຫ້ອງວ່າ ການສໍານັກງານນາຍົກລັດຖະມົນຕີ, ກະຊວງ ຖວທ, ວິທະຍາກອນຈາກມະຫາວີທະຍາໄລແຫ່ງຊາດ, ສະຖາບັນຄົ້ນຄວ້າວັດທະນະທໍາ ແລະວິທະຍາສາດສັງຄົມແຫ່ງຊາດ, ພ້ອມດ້ວຍສື່ມວນຊົນ ຈາກສໍານັກຂ່າວຕ່າງໆຂອງສູນກາງ ແລະທ້ອງຖິ່ນເຂົ້າຮ່ວມ.

 ທ່ານ ຈະເລີນ ເຢຍປາວເຮີ ກ່າວວ່າ: ກອງປະຊຸມຄັ້ງນີ້ເປັນການພົບປະປຶກສາຫາລືຮ່ວມກັນລະຫວ່າງໂຄສົກລັດຖະບານ ແລະພາກສ່ວນຕ່າງໆທີ່ເຮັດວຽກຕິດພັນກັບການນໍາໃຊ້ພາສາລາວໂດຍສະເພາະສື່ມວນຊົນ, ເປັນຄວາມເອົາໃຈໃສ່ໃນການຄຸ້ມຄອງຂໍ້ມູນຂ່າວສານຂອງລັດຖະບານຕໍ່ການນໍາໃຊ້ພາສາລາວ, ການຄຸ້ມຄອງ ແລະການນໍາໃຊ້ຂໍ້ມູນທາງສື່ອອນລາຍໃຫ້ໄປໃນທິດທາງດຽວກັນເປັນຕົ້ນ: ການຂຽນຂ່າວ, ການກ່າວຄໍາເຫັນຕ່າງໆ, ການໃຊ້ຄໍາສັບ, ວະລີ, ປະໂຫຍກໃຫ້ຖືກຕ້ອງຕາມຫຼັກໄວຍາກອນ, ໃຫ້ມີຄວາມໝາຍຊັດເຈນເພື່ອເຮັດໃຫ້ການຄຸ້ມຄອງ ແລະນໍາໃຊ້ຂໍ້ມູນຂ່າວສານທາງສື່ອອນລາຍມີຄວາມຖືກຕ້ອ ງເໝາະສົມ, ທັງເກີດຜົນປະ ໂຫຍດຕໍ່ຕົວເອງ ແລະສັງຄົມຢ່າງແທ້ຈິງ, ຫຼີກລຽງການນໍາໃຊ້ຂໍ້ມູນໄປໃນທາງທີ່ບໍ່ຖືກຕ້ອງບິດເບືອນຄວາມຈິງ ຫຼື ມີລັກສະນະໂຈມຕີຕໍ່ການນໍາພາຂອງພັກ, ການບໍລິຫານປະເທດຂອງລັດດັ່ງທີ່ພວກເຮົາເຄີຍພົບເຫັນຈໍານວນໜຶ່ງໃນໃນໄລຍະຜ່ານມາ.

  ກອງປະຊຸມຄັ້ງນີ້ຜູ້ເຂົ້າຮ່ວມຈະໄດ້ຮຽນຮູ້ກ່ຽວກັບຫຼັກການພື້ນຖານໃນການນໍາໃຊ້ພາສາລາວ, ສະພາບການນໍາໃຊ້ພາສາລາວຕົວຈິງໃນສັງຄົມປະຈຸບັນ ແລະທິດທາງໃນຕໍ່ໜ້າ, ທັກສະການເວົ້າ, ການຄຸ້ມຄອງ ແລະການນໍາໃຊ້ສື່ສັງຄົມອອນລາຍ ແລະການຄຸ້ມຄອງສື່ມວນຊົນໃນຍຸກ 4.0 ຊຶ່ງດໍາເນີນໄປເປັນເວລາ 2 ວັນຈິ່ງສໍາເລັດ. ໂດຍມີວິທະຍາກອນຈາກສະຖາບັນວິທະຍາສາດສັງຄົມແຫ່ງຊາດ, ຄະນະອັກສອນສາດ, ມະຫາວິທະຍາໄລແຫ່ງຊາດ ແລະ ວິທະຍຸກະຈາຍສຽງແຫ່ງຊາດຈະຂຶ້ນມານໍສສະເໜີຊີ້ແຈງເນື້ອໃນຕ່າງໆທີ່ຜູ້ໃຊ້ຫຼາຍຄົນຍັງບໍ່ທັນເປັນເອກະພາບກັນ (ຕົວຢ່າງຂາຍທີ່ດິນແມ່ນຜິດຖືກແທ້ແມ່ນໂອນສິດນໍາໃຊ້ທີ່ ດິນ, ບ້ານພັກແມ່ນຜິດຖືກແທ້ແມ່ນເຮືອນພັກ ແລະບັນຫາອື່ນໆອີກ). ທັງນີ້ກໍເພື່ອເຮັດໃຫ້ການນໍາໃຊ້ພາສາລາວຖືກຕ້ອງ ແລະເປັນເອກພາບກັນເປັນຕົ້ນແມ່ນພາສາຂຽນໃຫ້ຖືກໄວຍາກອນ, ການໃຊ້ຄໍາໃຫ້ຖືກຕ້ອງຊັດເຈນ, ມີການຮຽບຮຽງຖ້ອຍຄໍາ, ສໍານວນ, ປະໂຫຍກເປັນຢ່າງດີລວມທັງເຮັດໃຫ້ທຸກຄົນໃນສັງຄົມມີສະຕິຕື່ນຕົວໃນການບໍລິໂພກຂໍ້ມູນຂ່າວສານ ແລະການນໍາໃຊ້ສື່ອອນລາຍຕ່າງໆຖືກຕ້ອງຕາມກົດໝາຍ, ລະບຽບການທີ່ກໍານົດໄວ້ ແລະ ເປັນປະ ໂຫຍດຕໍ່ປະເທດຊາດ ແລະ ປະຊາຊົນລາວບັນດາເຜົ່າ.

ພາບຂ່າວ:

ນສພ ເສດຖະກິດ-ສັງຄົມ

แชร์