ກອງປະຊຸມ ໄດ້ຮັບຟັງການຜ່ານຮ່າງບົດລາຍງານການເມືອງທັງສອງພາກ ໂດຍສະເພາະແມ່ນຜົນງານໃນການນຳພາ-ຊີ້ນຳ ຂອງຄະນະໜ່ວຍພັກ, ສະມາຊິກພັກໃນໄລຍະຜ່ານມາ ສາມາດເຮັດລ້ອນໜ້າທີ່ໃນຫຼາຍດ້ານ ແລະ ສາມາດບັນລຸຜົນສຳເລັດຕາມແຜນການທີ່ວາງໄວ້, ບັນດາສະມາຊິກພັກໄດ້ມີແນວຄິດອຸ່ນອຽງທຸ່ນທ່ຽງເຊື່ອໝັ້ນຕໍ່ການນຳພາຂອງພັກ, ມີຈັນຍາບັນ, ຈັນຍາທຳ, ມີລະບຽບວິໄນ, ມີການຕັດສິນໃຈສູງ ແລະ ມີນ້ຳໃຈເສຍສະຫຼະ. ພ້ອມກັນນີ້ກອງປະຊຸມຍັງໄດ້ເປັນເອກະພາບຮັບຮອງເອົາບົດລາຍງານການເມືອງ, ການຈັດຕັ້ງປະຕິບັດວຽກງານໃນໄລຍະຜ່ານມາ, ທິດທາງແຜນການໃນ 5 ປີ ແລະ ຄາດໝາຍສູ້ຊົນໃນຕໍ່ຫນ້າ ພ້ອມທັງກຳນົດມາດຕະການ ແລະ ວິທີການຈັດຕັ້ງປະຕິບັດ ເພື່ອເພີ່ມທະວີຄວາມສາມາດໃນການນຳພາ-ຊີ້ນຳ ຂອງຄະນະໜ່ວຍພັກໃຫ້ເຂັ້ມແຂງ, ໜັກແໜ້ນ ແລະ ທັນກັບຄວາມຕ້ອງການຂອງວຽກງານ.

ກອງປະຊຸມຄັ້ງນີ້ ສະມາຊິກພັກສົມບູນໄດ້ພ້ອມກັນປ່ອນບັດຄັດເລືອກເອົາຄະນະພັກຊຸດໃໝ່ ເຊິ່ງໃນມະຕິຂອງກອງປະຊຸມຄັ້ງປະຖົມມະລຶກ ໄດ້ຕົກລົງເຫັນດີເປັນເອກະພາບຮັບຮອງເອົາສະຫາຍ ພຸດທະວີໄຊ ບຸດດາວົງ ເປັນເລຂາ,ສະຫາຍ ເພັດສົມພູ ຊອນລະດາ ເປັນຮອງເລຂາ ທັງເປັນຜູ້ກວດກາໜ່ວຍພັກ.

ສະຫາຍ ພູມະໂນ ລັດຖະຈັກ ໄດ້ມີຄໍາເຫັນໂອ້ລົມ ກ່ອນອື່ນແມ່ນໄດ້ຍ້ອງຍໍຊົມເຊີຍຕໍ່ການຈັດຕັ້ງປະຕິບັດວຽກງານໃນໄລຍະຜ່ານມາ ແລະ ຮຽກຮ້ອງໃຫ້ ຄະນະພັກຊຸດໃໝ່ ຈົ່ງພ້ອມກັນສືບຕໍ່ປັບປຸງກົງຈັກຂອງໜ່ວຍພັກ, ມີການແບ່ງຄວາມຮັບຜິດຊອບພາຍໃນໜ່ວຍພັກໃຫ້ລະອຽດຈະແຈ້ງ, ມີແບບແຜນນຳພາ-ແບບແຜນວິທີເຮັດວຽກບົນພື້ນຖານຫຼັກການລວມສູນປະຊາທິປະໄຕ, ພ້ອມກັນເຕົ້າໂຮມຄວາມສາມັກຄີໃຫ້ໜັກແໜ້ນ ເພື່ອສ້າງເປັນໜ່ວຍພັກປອດໃສ ເຂັ້ມແຂງ ແລະ ໜັກແໜ້ນໃນຕໍ່ໜ້າ.

ຂ່າວ-ພາບ: ກອງຄຳ