ໂຮງງານແປ້ງມັນຕົ້ນສ້າງລາຍຮັບ ແລະສ້າງວຽກເຮັດງານທໍາໃຫ້ປະຊາຊົນໄດ້ມີຊີວິດການເປັນຢູ່ດີຂຶ້ນ

ເມື່ອບໍ່ດົນມານີ້, ທ່ານ ບຸນຫຼາຍ ວົງດາລາ ເລຂາພັກເມືອງ ເຈົ້າເມືອງໆປາກລາຍແຂວງໄຊຍະບຸລີ ໄດ້ໃຫ້ສໍາພາດວ່າ: ໂຮງງານແປ້ງມັນຕົ້ນທີ່ຈີນມາລົງທຶນຢູ່ເມືອງປາກລາຍໄດ້ຊ່ວຍເຮັດໃຫ້ປະຊາຊົນມີລາຍໄດ້ຈາກການປູກມັນຕົ້ນຫຼາຍຂຶ້ນ ແລະ ເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນ.

ທ່ານ ເຈົ້າເມືອງໆປາກລາຍກ່າວວ່າ: ເມືອງປາກລາຍແມ່ນໜື່ງໃນ 11 ເມືອງຂອງແຂວງໄຊຍະບູລີ ເປັນເມືອງທາງຜ່ານຈາກນະຄອນຫຼວງວຽງຈັນໄປຫາຫາເທດສະບານແຂວງໄຊຍະບູລີແລະເມືອງອື່ນໆຂອງບັນດາແຂວງພາກເໜືອຂອງລາວ.ສະນັ້ນ,ຈຸດທີ່ຕັ້ງຂອງເມືອງແມ່ນໄດ້ເອື້ອອໍານວຍໃຫ້ແກ່ການສ້າງເສດຖະກິດ ໂດຍສະເພາະການຜະລິດເປັນສິນຄ້າ. ເມືອງປາກລາຍມີ 69 ບ້ານ, ພົນລະເມືອງປະມານ 17,000 ກວ່າຄົນ, ໃນດ້ານທີ່ຕັ້ງເປັນຈຸດສຸມຂອງບັນດາ 4 ເມືອງໃຕ້ຂອງແຂວງໄຊຍະບູລີ. ປະຊາຊົນມີມູນເຊື້ອຜະລິດເປັນສິນຄ້າ ເມື່ອກ່ອນແມ່ນປູກຝ້າຍ, ປູກສາລີ. ມາຮອດປະຈຸບັນ ເປັນເວລາ 10 ກວ່າປີມານີ້ ປະຊາຊົນໄດ້ຫັນມາປູກມັນຕົ້ນ,ເພາະທຽບໃສ່ການປູກສາລີກັບການປູກມັນ ຕົ້ນ ແມ່ນປູກມັນຕົ້ນຮັກສາດິນໄດ້ດົນກວ່າ ແລະ ກໍເປັນພືດເສດຖະກິດກວ່າ,ທັງປູກງ່າຍເພາະໃຊ້ລໍາມາປູກ,ສາມາດຮັກສາ ລໍາໄວ້ປູກປີຕໍ່ໄປໂດຍບໍ່ຕ້ອງໄດ້ລົງທຶນຫຼາຍຕ່າງຈາກປູກສາລີທີ່ ຕ້ອງໄດ້ເອົາແນວພັນຈາກຕ່າງປະເທດເຂົ້າມາປູກ.ມັນ ຕົ້ນນອກຈາກປູກງ່າຍແລ້ວ,ຖ້າປີນີ້ເຮົາເກັບກຸ້ບໍ່ທັນ ຂ້າມໄປປີໜ້າ ຈຶ່ງໄປເກັບກູ້ກໍຍັງໄດ້.
ທ່ານເຈົ້າເມືອງປາກລາຍກ່າວຕື່ມວ່າ:ພາຍຫຼັງທີ່ບໍລິສັດຈີນໄດ້ມາລົງທຶນສ້າງໂຮງງານຜະລິດແປ້ງມັນຕົ້ນເປັນຕົ້ນມາ,ປະ ຊາຊົນໄດ້ຫັນມາປູກມັນຕົ້ນຫຼາຍຂື້ນ, ເພື່ອສົ່ງຂາຍໃຫ້ໂຮງງານເຮັດໃຫ້ເຂົາເຈົ້າມີລາຍຮັບປີຕໍ່ປີຫຼາຍຂື້ນ. ນອກຈາກນັ້ນ,ປະຊາຊົນພາຍໃນເມືອງປາກລາຍຈຳນວນໜຶ່ງຍັງໄດ້ເປັນພະນັກງານກໍາມະກອນຂອງໂຮງງານແປ້ງມັນຕົ້ນ ເຮັດໃຫ້ປະຊາຊົນໄດ້ມີວຽກເຮັດງານທໍາຫຼາຍຂຶ້ນ ແລະຄາດວ່າໃນຕໍ່ໜ້າເມືອງປາກລາຍ ຈະສືບຕໍ່ຊຸກຍູ້ປະຊາຊົນປູກມັນຕົ້ນໃຫ້ເປັນພືດສິນຄ້າຕົ້ນຕໍຫຼາຍຂື້ນເພື່ອສ້າງເສດຖະກິດຄອບຄົວກໍຄືໃຫ້ເມືອງປາກລາຍມີລາຍຮັບຈາກການມອບພັນທະອາກອນແລະພາສີຕ່າງໆຈາກໂຮງງານແປ້ງມັນຕົ້ນໄດ້ຕື່ມອີກ.

ທີ່ມາ: CMG

แชร์