ແຂວງອັດຕະປື​ ຈັດງານເທດສະການຮ່ອນຄໍາແບບປະເພນີ

ໃນວັນທີ​ 17​ ທັນວາ​ 2024​ ແຂວງອັດຕະປື​ ໄດ້ຈັດງານເທດສະການຮ່ອນຄໍາແບບປະເພນີ ຂຶ້ນທີ່ລໍານໍ້າເຊກະໝານ ບ້ານ​ ທາດພະໄຊ ເມືອງໄຊເສດຖາ,​ ໂດຍຈັດຂຶ້ນເພື່ອສະເຫຼີມສະຫຼອງປີທອງທ່ຽວລາວ 2024​ ຂອງແຂວງ​ ຕິດພັນກັບງານບຸນລະນຶກບຸນຄຸນພຣະເຈົ້າໄຊຍະເຊດຖາທິຣາດ, ເປັນກຽດເຂົ້າຮ່ວມຮັບຊົມມີ ທ່ານ​ ພົນໂທ​ ວັນທອງ​ ກອງ​ມະນີ​ ເຈົ້າແຂວງອັດຕະປື, ມີການນໍາຂອງແຂວງ,​ ເມືອງ​ ຕະຫຼອດຮອດບັນດາມວນຊົນ, ແຂກທີ່ເປັນນັກທ່ອງທ່ຽວເຂົ້າຮ່ວມຮັບຊົມຢ່າງຫຼວງຫຼາຍ.

ໃນພິທີ​ ທາ່ນ​ ບຸນປອນ​ ອ່ອນ​ໄຊ​ວຽງ​ ຫົວໜ້າພະແນກ​ຖະແຫຼງຂ່າວ,​ ວັດທະນະທໍາ​ ແລະ​ ທ່ອງທ່ຽວ ​ແຂວງອັດຕະປື​ ຮອງປະທານຈັດງານປີທ່ອງທ່ຽວ ຂອງແຂວງ​ ໄດ້ກ່າວເປີດງານເທດສະການຮ່ອນຄໍາແບບປະເພນີ ວ່າ: ເທດສະການຮ່ອນຄໍາແບບປະເພນີ ທີ່ຈັດຂຶ້ນເທື່ອນີ້ ແມ່ນໜຶ່ງໃນບັນດາກິດຈະກຳທັງໝົດທີ່ປິ່ນອ້ອມ ປີທ່ອງທ່ຽວ​ 2024​ ຢູ່ແຂວງອັດຕະປື,
ກິດຈະກໍາຮ່ອນຄໍາປະເພນີ​ ແມ່ນມູນເຊື້ອຂອງພໍ່ແມ່ປະຊາຊົນບັນດາເຜົ່າ ຊາວແຂວງອັດຕະປື ທີ່ມີປະຫວັດຄວາມເປັນມາແຕ່ບູຮານນະການ ເພາະການຮ່ອນຄໍາແບບປະເພນີເປັນກິດຈະກຳໜຶ່ງທີ່ ຕິດພັນກັບວີຖີຊີວິດການເປັນຢູ່ຂອງປະຊາຊົນຊາວແຂວງອັດຕະປື​ ມາແຕ່ດຶກດຳບັນ.​ ດັ່ງນັ້ນ: ຄະນະພັກອໍານາດການປົກຄອງແຂວງ,ເມືອງ​ ກໍ່ຄືຄະນະກອງເລຂາຈັດປີທ່ອງທ່ຽວລາວ ປີ​ 2024 ທີ່ແຂວງອັດຕະປື. ຈິ່ງເຫັນຄວາມສໍາຄັນຢາກສະທ້ອນໃຫ້ເຫັນເຖິງຄວາມອຸດົມສົມບູນ ຂອງຊັບໃນດິນສິນໃນນໍ້າກໍ່ຄືມູນເຊື້ອ ແລະ ວິຖີຊີວິດ ທີ່ເປັນເອກະລັກສະເພາະຂອງພໍ່ແມ່ ປະຊາຊົນ,​ ຈິ່ງໄດ້ຈັດງານເທດສະການຮ່ອນຄໍາແບບປະເພນີນີ້ຂຶ້ນ ໂດຍມີມວນຊົນໃນທົ່ວປວງຊົນ​ ທີ່ເປັນຜູ້ທີ່ມີຄວາມຮູ້ ແລະ ປະສົບການກ່ຽວກັບການຮ່ອນຄໍາຕາມສາຍນໍ້າຕ່າງໆເປັນຢ່າງດີ.
ກິດຈະກຳການຮ່ອນແຮ່, ຮ່ອນຄໍາແມ່ນໜຶ່ງໃນກິດຈະກຳທີ່ເປັນວິຖີຊີວິດຂອງພໍ່ແມ່ປະຊາຊົນ ຊາວແຂວງອັດຕະປື ທີ່ເຄີຍຈັດຕັ້ງປະຕິບັດສືບທອດກັນມາໄດ້ຫຼາຍເຊັ່ນຄົນ ເວົ້າໄດ້ວ່າ: ການຮ່ອນຄໍາ ແບບປະເພນີແມ່ນມີມາແຕ່ບູຮານ​ນະການ,​ ການຮ່ອນຄໍາແມ່ນຮູບແບບການດໍາລົງຊີວິດ​ ແລະ​ ວິທີການຫາລ້ຽງຊີບຂອງປະຊາຊົນ ບັນດາເຜົ່າພາຍໃນແຂວງອັດຕະປື ເພື່ອຂຸດຄົ້ນຫຼືຮ່ອນແຮ່ເອົາຄໍາມາເປັນວັດຖຸແລກປ່ຽນເອົາເຄື່ອງນຸ່ງຮົ່ມ, ອາຫານການກິນ ແລະ ສັດສາວາສິ່ງຕ່າງໆ ເພື່ອມາແກ້ໄຂຊີວິກການເປັນຢູ່ພາຍ​ໃນຄອບຄົວ,​ ເຊິ່ງອຸປະກອນຮ່ອນຄໍາແບບປະເພນີ ປະກອບມີ: ບ້າງທີ່ເຮັດດ້ວຍໄມ້ດູ່, ມີເຫຼັກແຫຼມ, ມີສຽມເພື່ອຂຸດເຈາະ ແລະຕັກຂີ້ແຮ່ມາໃສ່ກະບ້າງ, ພ້ອມນີ້ກໍ່ມີກະບອກໄມ້ໄຜ່ເພື່ອໃສ່ຄໍາ ແລະ ໃຊ້ແພກະຕະ ຫຼື ແພຂາດເພື່ອມ້ວນໃຫ້ແໜ້ນເປັນແນວອັດປາກກະບອກໄມ້ໄຜ່,​ ລະດູການລົງຮ່ອນຄໍາແບບປະເພນີ​ ແມ່ນລະດູການສໍາເລັດເສັດສິ້ນການເກັບກ່ຽວ ເຊິ່ງເປັນໄລຍະເດືອນ 12 ລາວ, ເຊິ່ງກ່ອນຈະລົງຮ່ອນຄໍາ ມີພິທີກຳຕາມຮີດຄອງທີ່ເຄີຍປະຕິບັດເພິ່ນໄຫວ້ວານເຈົ້າຖິ່ນ ເຈົ້າຖານ ຫຼື ເປັນການຂໍອະນຸຍາດ, ຂໍໂຊກລາບ ດ້ວຍການເສັ້ນໄຫວ້ ເຫຼົ້າໄຫ, ໄກ່ໂຕ​ ແລະອື່ນໆ
ຂ່າວ: ວັດທະນາ ຂ.ອັດຕະປື

แชร์