ໂຮງງານຂ້າສັດດອນດູ່ ຮັບປະກັນສະໜອງຊີ້ນພຽງພໍ ໄລຍະສົ່ງທ້າຍປີ 2024 ແລະຕ້ອນຮັບປີໃໝ່ສາກົນ 2025

ລັດວິສາຫະກິດ ສະບຽງອາຫານ ນະຄອນຫລວງວຽງຈັນ ພ້ອມຈະສະໜອງຊີ້ນໃຫ້ພຽງພໍກັບຄວາມຕ້ອງການຂອງຜູ້ບໍລິໂພກ ໃນໄລຍະສົ່ງທ້າຍປີ 2024 ແລະຕ້ອນຮັບປີໃໝ່ສາກົນ 2025 ທີ່ຈະມາເຖີງນີ້ຕາມລາຄາທີ່ຂັ້ນເທິງກໍານົດ.

ທ່ານ ຄໍາຫລ້າ ແສງດາວົງ ຜູ້ອໍານວຍການບໍລິສັດລັດວິສາຫະກິດ ສະບຽງອາຫານ ນະຄອນຫລວງວຽງຈັນ ໃຫ້ສໍາພາດວ່າ: ການບໍລິໂພກຊີ້ນໃນໄລຍະເທສະການສົ່ງທ້າຍປີ 2024 ແລະ ຕ້ອນຮັບປີໃໝ່ສາກົນ 2025 ຈະເພີ່ມຂຶ້ນ, ຊຶ່ງບໍລິສັດໄດ້ພົວພັນກັບບັນດາເຈົ້າຂອງຟາມ, ນາຍຮ້ອຍ ຫຼື ຜູ້ສົ່ງຊີ້ນຢູ່ຕ່າງແຂວງ ເພື່ອກະກຽມສະໜອງງົວ ແລະ ຄວາຍ ປ້ອນເຂົ້າໂຮງງານຂ້າສັດ, ສ່ວນໝູ ໄດ້ເຮັດສັນຍາກັບ ບໍລິສັດຊີພີລາວ ເພື່ອສະໜອງໝູໃຫ້ປົກກະຕິມື້ໜຶ່ງ 500-550 ໂຕ, ເຊີ່ງຄາດວ່າຈະຮັບປະກັນໃຫ້ການສະໜອງຊີ້ນພຽງພໍກັບຄວາມຕ້ອງການຂອງການບໍລິໂພກ.

ປັດຈຸບັນ, ໂຮງງານຂ້າສັດດອນດູ່ ຂອງບໍລິສັດລັດວິສາຫະກິດສະບຽງອາຫານ ນະຄອນຫລວງວຽງຈັນ ໄດ້ຮັບການປັບປຸງໃໝ່ທີ່ໄດ້ມາດຕະຖານສາກົນເພື່ອໃຫ້ສັງຄົມໄດ້ບໍລິໂພກຊີ້ນທີ່ສະອາດ, ປອດໄພ ແລະມີຄຸນນະພາບ, ພ້ອມນີ້ຍັງໄດ້ປຸງແຕ່ງອາຫານສໍາເລັດຮູບອອກຈໍາໜ່າຍ 30 ລາຍການ ເປັນຕົ້ນ: ຢໍ່, ລູກຊີ້ນ, ຊີ້ນແຫ້ງ ແລະອື່ນໆ.

ທ່ານ ຄໍາຫລ້າ ແສງດາວົງ ໃຫ້ຮູ້ຕື່ມວ່າ: ການບໍລິໂພກຊີ້ນໃນໄລຍະເທສະການສົ່ງທ້າຍປີເກົ່າ ແລະຕ້ອນຮັບປີໃໝ່ສາກົນກໍຈະຄ້າຍໆຄືກັບທຸກປີຄືກ່ອນມື້ປີໃໝ່ການບໍລິໂພກຊີ້ນຈະເພີ່ມຂຶ້ນຫລາຍ, ຈາກນັ້ນ ເມື່ອຮອດມື້ປີໃໝ່ການບໍລິໂພກຈະຫລຸດລົງ, ແຕ່ຫລັງປີໃໝ່ສາກົນ 3-4 ວັນ ການບໍລິໂພກຊີ້ນຈະກ້າວສູ່ສະພາບປົກກະຕິ, ພ້ອມນີ້ ທ່ານໄດ້ຮຽກຮ້ອງໃຫ້ບັນດາຊາວຄ້າ-ຂາຍຊີ້ນທຸກຄົນ ບໍ່ຄວນກັກຕຸນສິນຄ້າ ແລະ ຈໍາໜ່າຍຊີ້ນຕາມລາຄາທີ່ຂັ້ນເທິງກໍານົດ ເພາະໄລຍະຜ່ານມາມີຊາວຄ້າ-ຂາຍບາງຄົນສວຍໂອກາດຂຶ້ນລາຄາຊີ້ນໃນໄລຍະບຸນປີໃໝ່ສາກົນ ເຊິ່ງເປັນການເອົາປຽບຜູ້ບໍລິໂພກ ແລະ ຜິດຕໍ່ລະບຽບການທີ່ຂັ້ນເທິງວາງອອກ.

ຢ່າງໃດກໍຕາມເພື່ອເປັນການແບ່ງຜົນກຳໄລຄືນໃຫ້ລູກຄ້າບໍລິສັດລັດວິສາຫະກິດສະບຽງອາຫານ ນະຄອນຫລວງວຽງຈັນ ຈະໄດ້ຈັດສ່ວນຫຼຸດລາຄາຊີ້ນທີ່ຕໍ່າກວ່າລາຄາຢູ່ທ້ອງຕະຫຼາດ 5,000 ກີບຕໍ່ກິໂລ ໂດຍຈະເລີ່ມປະຕິບັດນັບແຕ່ວັນທີ 16-27 ທັນວາ 2024 ນີ້, ຊຶ່ງທ່ານສາມາດສັ່ງຊື້ໄດ້ຢູ່ທີ່ລັດວິສາຫະກິດສະບຽງອາຫານ ນະຄອນຫຼວງວຽງຈັນ ບ້ານສີຫອມ ເມືອງຈັນທະບູລີ ນະຄອນຫຼວງວຽງຈັນ.
ໂດຍ: ສາວລາວໃຕ້

แชร์