ເປີດໂຮງງານປຸງແຕ່ງຜະລິດຕະພັນສັດນໍ້າ ບໍລິສັດແມ່ຂອງອາຫານສົດ ຈໍາກັດ

ໃນວັນທີ 09 ທັນວາ 2024, ທີ່ເມືອງໂຂງ, ແຂວງຈໍາປາສັກ, ໄດ້ມີພິທີເປີດໂຮງງານປຸງແຕ່ງຜະລິດຕະພັນສັດນໍ້າ (ເປີດດໍາເນີນການຜະລິດໂຮງງານປຸງແຕ່ງປາສະຫວາຍ) ຢ່າງເປັນທາງການ, ຂອງບໍລິສັດແມ່ຂອງອຸດສາຫະກໍາການປະມົງ ຈຳກັດຂຶ້ນ, ໃຫ້ກຽດເຂົ້າຮ່ວມຂອງທ່ານ ລິນຄໍາ ດວງສະຫວັນ ລັດຖະມົນຕີກະຊວງກະສິກໍາ ແລະ ປ່າໄມ້, ທ່ານ ໂສມ ບຸດຕະກຸນ ຮອງເຈົ້າແຂວງຈໍາປາສັກ, ເຊິ່ງໂຮງງານດັ່ງກ່າວເປັນການຮ່ວມມືລົງທຶນຂອງບໍລິສັດວິທະຍາສາດ ແລະເຕັກໂນໂລຊີການປະມົງ ເຊີນເຈີນ ຈໍາກັດ ແລະເປັນໜຶ່ງຜົນສໍາເລັດອັນສໍາຄັນ ໃນການພັດທະນາວຽກງານການປະມົງ ຂອງ ສປປ ລາວ.

ບໍລິສັດດັ່ງກ່າວຕັ້ງຢູ່ໃນເຂດອ່າງແມ່ນໍ້າຂອງຕອນລຸ່ມ ທີ່ເປັນແຫຼ່ງນ້າທີ່ອຸດົມສົມບູນ ແລະ ຍັງເປັນແຫຼ່ງຊັບພະຍາກອນຫຼັກຕໍ່ການດຳລົງຊີວິດຂອງປະຊາຊົນບັນດາເຜົ່າ ແລະປະກອບສ່ວນເຂົ້າໃນການພັດທະນາເສດຖະກິດຂອງທ້ອງຖິ່ນພ້ອມທັງຍັງເປັນທ່າແຮງອັນສໍາຄັນໃນການພັດທະນາອຸດສາຫະກໍາການປະມົງ.

ອີງໃສ່ທ່າແຮງທາງດ້ານທຳມະຊາດ ແລະຜັນຂະຫຍາຍການຮ່ວມມືຍຸດທະສາດຮອບດ້ານ ລະຫວ່າງ ລາວ-ຈີນໂດຍສະເພາະໃນຂົງເຂດກະສິກຳ ແລະ ການປະມົງ ໄດ້ສືບຕໍ່ເຂົ້າສູ່ລວງເລິກ, ເນັ້ນໜັກໃສ່ການນຳໃຊ້ເຕັກໂນໂລຊີທີທັນສະໄໝ ຂອງລັດວິສາຫະກິດຈາກ ສປ ຈີນ ໃຫ້ກາຍເປັນໂອກາດ ແລະທ່າແຮງຕໍ່ການພັດທະນາອຸດສາຫະກຳການປະມົງ, ໂຮງງານ ປຸງແຕ່ງປາສະຫວາຍທີ່ທັນສະໄໝຄົບວົງຈອນແຫ່ງນີ້ຈະເປັນຕົວແບບຂອງການຮ່ວມມືດ້ານການປະມົງ ລາວ-ຈີນ, ເຊິ່ງບັນດາບໍລິສັດຮ່ວມລົງທຶນ ຈະຕ້ອງໄດ້ເປັນເຈົ້າການ ໃນການພັດທະນາອຸດສາຫະກຳປາສະຫວາຍ ຢ່າງມີປະສິດທິພາບ, ເປັນອາຊີບ,ສ້າງຕ່ອງໂສ້ອຸດສາຫະກໍາເປັນລະບົບຄົບຊຸດ,ກໍານົດມາດຕະຖານເຕັກນິກ, ເພື່ອສາມາດກ້າວໄປສູ່ຄວາມທັນສະໄໝ ໃນຮູບແບບທີ່ເໝາະສົມກັບການພັດທະນາການປະມົງ ຂອງ ສປປ ລາວ ແລະປະກອບສ່ວນຢ່າງຕັ້ງໜ້າໃນການຄ້າລະຫວ່າງ ລາວ-ຈີນ, ສາມາດແຂ່ງຂັນກັບພາກພື້ນ ແລະ ສາກົນໄດ້.

ການເປີດດໍາເນີນການຜະລິດຂອງໂຮງງານປຸງແຕ່ງນີ້ແມ່ນເປັນຂີດໝາຍສໍາຄັນຕໍ່ກັນການຊຸກຍູ້ສົ່ງເສີມ ແລະພັດທະນາວຽກງານຂະແໜງການປະມົງ ຂອງ ສປປ ລາວ ເຊິ່ງການດໍາເນີນງານຂອງໂຮງງານດັ່ງກ່າວບໍ່ພຽງແຕ່ຈະປັບປຸງລະບົບຕ່ອງໂສ້ອຸດສາຫະກໍາການປະມົງ ຂອງ ສປປ ລາວ, ແຕ່ຍັງເປັນການສ້າງໂອກາດການຈ້າງງານໃນທ້ອງຖິ່ນຈໍານວນຫຼາຍ ແລະຊຸກຍູ້ທຸລະກິດປິ່ນອ້ອມທີ່ກ່ຽວຂ້ອງ. ສິ່ງສໍາຄັນກວ່ານັ້ນ, ບໍລິສັດ ແມ່ຂອງອຸດສາຫະກຳການປະມົງ ຈຳກັດ ແລະ ຄູ່ຮ່ວມລົງທຶນຕ່າງໆ ຈະຊ່ວຍສ້າງຊັບພະຍາກອນມະນຸດໃຫ້ແກ່ແຮງງານ ແລະປະຊາຊົນໃນທ້ອງຖິ່ນ ໂດຍຜ່ານການຝຶກອົບຮົມເຕັກນິກ-ວິຊາການ ເພື່ອວາງພື້ນຖານທີ່ເຂັ້ມແຂງໃຫ້ແກ່ການພັດທະນາອຸດສາຫະກຳການປະມົງ ຂອງ ສປປ ລາວ ໃນອານາຄົດ ໃຫ້ມີຄວາມກ້າວໜ້າ ແລະ ຍືນຍົງ.

ຂ່າວ: ເຂັມມະໄລ ສົນດາວັນ

แชร์