ເປີດນໍາໃຊ້ສວນສາທາລະນະແຄມຂອງນະຄອນປາກເຊ ຢ່າງເປັນທາງການ

ພິທີມອບ-ຮັບ ແລະ ເປີດນໍາໃຊ້ຢ່າງເປັນທາງການໂຄງການ ພັດທະນາສວນສາທາລະນະແຄມຂອງ ນະຄອນປາກເຊ ແຂວງຈໍາປາສັກ, ໂດຍພິທີຈັດຂຶ້ນໃນຕອນບ່າຍຂອງວັນທີ 10 ທັນວາ 2024 ທີ່ສວນສາທາລະນະແຄມຂອງ ນະຄອນປາກເຊ, ໃຫ້ກຽດເຂົ້າຮ່ວມຂອງທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ, ທ່ານ ໂສມ ບຸດຕະກຸນ ຮອງເຈົ້າແຂວງຈໍາປາສັກ, ທ່ານ ບົວລີ ເພັດສົງຄາມ ເຈົ້ານະຄອນປາກເຊ, ທ່ານ ຈັນທະວີສຸກ ວັນສີລິ ຫົວໜ້າພະແນກໂຍທາທິການ ແລະ ຂົນສົ່ງແຂວງຈໍາປາສັກ, ທ່ານ ນາງ ຊິນດາຊອຍ ຜູ້ຕາງໜ້າກອງທຶນການຮ່ວມມືເພື່ອການພັດທະນາເສດຖະກິດ (EDCF) ປະຈໍາລາວ, ມີຜູ້ອໍານວຍການບໍລິສັດຮານຊິນ, ຜູ້ອໍານວຍການບໍລິສັດອີຊານ, ແຂກເຊີນຈາກກະຊວງໂຍທາທິການ ແລະ ຂົນສົ່ງ, ພະແນກການຂອງແຂວງ, ນະຄອນ, ເມືອງເຂົ້າຮ່ວມ.

ໃນພິທີໄດ້ລາຍງານກ່ຽວກັບຈຸດປະສົງ ແລະລະດັບຄາດໝາຍຂອງໂຄງການເປັນຕົ້ນ: ແມ່ນເພື່ອປ້ອງ​ກັນການ​ກັດ​ເຊາະ​ຂອງ​ຕະ​ຝັ່ງຕາມ​ແຄມແມ່​ນໍ້າຂອງ ແລະ ແຄມ​ນໍ້າ​ເຊ​ໂດນ ຢູ່​​ຝັ່ງນະ​ຄອນ​ປາກ​ເຊ ແລະຝັ່ງ​ເມືອງ​ໂພນ​ທອງ, ປ້ອງ​ກັນ​ນໍ້າ​ຖ້ວມສະ​ຖານທີ່​ພັກ​ອາ​ໄສລວມ​ທັງ​ເນື້ອ​ທີ່​ການ​ຜະ​ລິດ​ຂອງ​ປະ​ຊາ​ຊົນ​ບັນ​ດາ​ເຜົ່າ​, ປັບ​ປຸງ-ຍົກ​ລະ​ດັບ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ ຊາວ​ນະ​ຄອນ​ປາກ​ເຊ ແລະ ເມືອງ​ໂພນ​ທອງ, ສ້າງ​ເງື່ອນ​ໄຂ​ໃຫ້​ມີ​ສະ​ຖານ​ທີ່​ພັກ​ຜ່ອນ ແລະ ເປັນ​ບ່ອນ​ອອກ​ກຳ​ລັງ​ກາຍ ເພື່ອ​ສົ່ງ​ເສີມ​ສຸ​ຂະ​ພາບ​ຂອງ​ປະ​ຊາ​ຊົນ ທັງ​ເປັນ​ການ​ດຶງ​ດູດ​ການ​ທ່ອງ​ທ່ຽວ​ໃນ​ໃຈ​ກາງ​ເມືອງ (ນະ​ຄອນ​ປາກ​ເຊ).

ພ້ອມນີ້ກໍມີການກ່າວມອບ-ຮັບໂຄງການລະຫວ່າງຜູ້ຮັບເໝົາກໍ່ສ້າງກັບເຈົ້າຂອງໂຄງການໂດຍປັດຈຸບັນໂຄງການພັດທະນາແຄມຂອງນະຄອນປາກເຊ ແຂວງຈໍາປາສັກ ໄລຍະທີ 01 ສັນຍາ Lao-12 ແມ່ນກໍ່ສ້າງສໍາເລັດໂດຍພື້ນຖານ ແລະ ຜູ້ຮັບເໝົາກໍ່ສ້າງ ໄດ້ກ່າວມອບຮັບໂຄງການໃຫ້ເຈົ້າຂອງໂຄງການຄຸ້ມຄອງນໍາໃຊ້ຕາມລະບຽບການ ສະນັ້ນ, ຕາງໜ້າໃຫ້ເຈົ້າຂອງໂຄງການ ຂໍຖືໂອກາດນີ້ຮັບເອົາໂຄງການດັ່ງກ່າວຈາກຜູ້ຮັບເໝົາກໍ່ສ້າງ ແລະ ຂໍມອບໂຄງການນີ້ໃຫ້ນະຄອນປາກເຊເປັນຜູ້ຄຸ້ມຄອງນໍາໃຊ້ໂດຍສະເພາະສວນທາລະນະແຄມຂອງນະຄອນປາກເຊ ໃນເນື້ອທີ່ 9.50 ເຮັກຕາ ແລະ ສິ່ງປະກອບພາຍໃນສວນ (ທາງຄູປ້ອງກັນນໍ້າຖ້ວມ, ທາງຄົນຍ່າງ, ລະບົບໄຟປະດັບສວນ, ຕົ້ນໄມ້ ແລະ ດອກໄມ້ປະດັບ, ເດີ່ນຫຍ້າ, ອາຄານຫ້ອງນໍ້າ, ສະຖານທີ່ຈອດລົດ ແລະອື່ນໆ) ໃຫ້ນະຄອນປາກເຊ ເປັນຜູ້ຄຸ້ມຄອງ ແລະນໍາໃຊ້.

ໂອກາດນີ້ ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ໄດ້ໃຫ້ກຽດກ່າວເປີດການນໍາໃຊ້ສວນສາທາລະນະແຄມຂອງນະຄອນປາກເຊຢ່າງເປັນທາງການ, ພ້ອມທັງຕັດແຖບຜ້າ, ລັ່ນຄ້ອງຮ່ວມກັບຜູ້ແທນທີ່ເຂົ້າຮ່ວມງານເພື່ອເປັນນິມິດໝາຍທີ່ດີແກ່ການເປີດນໍາໃຊ້ສວນສາທາລະນະແຄມຂອງນະຄອນປາກເຊ.
ຂ່າວ: ຈັນທະວີສັກ

แชร์