ຄະນະຜູ້ແທນສື່ມວນຊົນລາວ ເຂົ້າຮ່ວມກອງປະຊຸມເວທີສື່ສານສາກົນ ຢຸນນານ ຄັ້ງທີ 3

ຄະນະຜູ້ແທນສື່ຈາກ ສປປ ລາວ ນຳໂດຍ ທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ ປະຊາຊົນປະຕິວັດລາວ ໄດ້ເຂົ້າຮ່ວມກອງປະຊຸມເວທີສື່ສານສາກົນຢຸນນານ ຄັ້ງທີ 3 ທີ່ ແຂວງ ຢຸນນານ ສປ ຈີນ ເພື່ອຮ່ວມແລກປ່ຽນທັດສະນະ ແລະ ປະສົບການກ່ຽວກັບວຽກງານສື່ ແລະ ຊ່ອງທາງໃນການສົ່ງເສີມການຮ່ວມມືດ້ານສື່ມວນຊົນ ລະຫວ່າງບັນດາປະເທດສະມາຊິກ ເຊິ່ງໄຂຂຶ້ນ ໃນວັນທີ 10 ທັນວາ 2024 ທີ່ ສິບສອງປັນນາ ແຂວງຢຸນນານ ສປ ຈີນ.

ໃນໂອກາດເຂົ້າຮ່ວມຄັ້ງນີ້ ທ່ານ ສະຫວັນຄອນ ຣາຊະມົນຕຣີ ປະທານສະມາຄົມນັກຂ່າວແຫ່ງ ສປປ ລາວ ໄດ້ມີຄຳເຫັນໃນກອງປະຊຸມວ່າການຮ່ວມມືທີ່ເຂັ້ມແຂງລະຫວ່າງອົງການສື່ມວນຊົນຂອງປະເທດສະມາຊິກ ແມ່ນມີຄວາມສຳຄັນຕໍ່ການກຳນົດ ແລະການສົ່ງເສີມການພັດທະນາທາງດ້ານສັງຄົມ ວັດທະນະທຳ ແລະ ທາງດ້ານເສດຖະກິດ ແລະຕໍ່ກັບການສົ່ງເສີມຄວາມເຂົ້າໃຈ ແລະຄວາມເຊື່ອໝັ້ນເຊິ່ງກັນ ແລະກັນລະຫວ່າງປະເທດສະມາຊິກເພື່ອກ້າວສູ່ເປົ້າໝາຍແຫ່ງການພັດທະນາສີຂຽວ ແລະ ຍືນຍົງ.

ກອງປະຊຸມຄັ້ງນີ້ເປັນການເຕົ້າໂຮມບັນດາເຈົ້າໜ້າທີ່ສື່ມວນຊົນ ຫົວໜ້າອົງການສື່ມວນຊົນ ນັກຂ່າວອາວຸໂສ ແລະ ຕົວແທນສື່ມວນຊົນຈາກພາກພື້ນອາຊີໃຕ້ ແລະ ອາຊີຕາເວັນອອກສຽງໃຕ້ ເພື່ອແລກປ່ຽນບົດຮຽນ ແລະ ປະສົບການ ກໍຄືຂໍ້ລິເລີ່ມຕ່າງໆໃນການສົ່ງເສີມການພົວພັນຮ່ວມມືໃນຂົງເຂດສື່ ທັງເປີດໂອກາດໃຫ້ຕົວແທນຈາກປະເທດສະມາຊິກ ໄດ້ເຊັນບົດບັນທຶກຂະຫຍາຍການຮ່ວມມືໃນວຽກງານສື່ ໃນນັ້ນກໍລວມມີການລົງນາມໃນບົດບັນທຶກວ່າດ້ວຍການຮ່ວມມື ລະຫວ່າງກະຊວງຖະແຫຼງຂ່າວກຳປູເຈຍ ແລະ ຄະນະໂຄສະນາອົບຮົມແຂວງຢຸນນານ ແລະ ການເປີດໂຄງການຖ່າຍພາບສະຖານທີ່ມໍລະດົກໂລກ ລະຫວ່າງ ຕົວແທນຈາກປະເທດ ກຳປູເຈຍ ອີຍິບ ເບຣຊິນ ແລະ ສປ ຈີນ.

ເວທີປຶກສາຫາລື ສື່ສານສາກົນຢຸນນານ ໄຂຂຶ້ນເປັນຄັ້ງທຳອິດໃນປີ 2022 ຫລັງຈາກທີ່ໃນປີ 2021 ເກີດເຫດການຝູງຊ້າງຈຳນວນຫນຶ່ງອົບພະຍົບຈາກພາກໃຕ້ຂອງຈີນ ເດີນທາງສູ່ແຂວງພາກເໜືອຂອງປະເທດ ແລະ ກັບສູ່ຖິ່ນເກົ່າຫຼັງຈາກຜ່ານໄປໄດ້ 116 ມື້ ເຮັດໃຫ້ສື່ມວນຊົນຈີນ ແລະ ທົ່ວໂລກຕ່າງກໍລາຍງານເຫດການດັ່ງກ່າວຢ່າງກວ້າງຂວາງຜ່ານສື່ສັງຄົມອັນເຮັດໃຫ້ລັດຖະບານຈີນ ເຫັນໄດ້ເຖິງຄວາມຈຳເປັນທີ່ຈະຕ້ອງຮ່ວມມືກັນໃນບັນດາວົງການສື່ມວນຊົນໃນປະເທດຕ່າງໆເພື່ອເຜີຍແຜ່ຂໍ້ມູນຂ່າວສານຢ່າງຖືກຕ້ອງກ່ຽວກັບເຫດການສຳຄັນຕ່າງໆຂອງກັນແລະກັນ.

แชร์