ງານວາງສະແດງກະສິກຳ ລາວ 2024 ຈະຈັດຂຶ້ນວັນທີ 16-20 ທັນວາ

ກະຊວງ​ກະສິກຳ ແລະ ປ່າໄມ້ ຈະຈັດງານວາງສະແດງກະສິກຳ ລາວ ປະຈຳປີ 2024 (Agri Expo Laos 2024) ຂຶ້ນທີ່ສູນການຄ້າລາວໄອເຕັກ ນະຄອນຫລວງວຽງ ໃນລະຫວ່າງວັນທີ 16-20 ທັນວາ ທີ່ຈະມາເຖິງນີ້, ພາຍໃນງານ ຈະມີການສະແດງຜົນງານຜະລິດກະສິກຳ ແບບຍືນຍົງ, ການສຶກສາເຕັກໂນໂລຊີ ທີ່ທັນສະໄໝໃນກະສິກຳ, ການວາງ ສະແດງອຸປະກອນ ແລະ ສິນຄ້າກະສິກຳ, ການສຳມະນາ ແລະກອງປະຊຸມຕ່າງໆ.

ທ່ານ ປອ. ລິນຄໍາ ດວງສະຫວັນ ລັດຖະມົນຕີ ກະຊວງກະສິກໍາ ແລະ ປ່າໄມ້ ໄດ້ຖະແຫລງການໃນວັນທີ 10 ທັນວາ ທີ່ກະຊວງກະສິກຳ ແລະ ປ່າໄມ້ ວ່າ: ການຈັດງານວາງສະແດງສິນຄ້າກະສິກຳ ປີ 2024 ແມ່ນເປັນໂອກາດທີ່ສຳຄັນຢ່າງຍິ່ງ ສໍາລັບການຍົກລະດັບວຽກງານ ການຜະລິດກະສິກຳໃນປະເທດລາວ, ຊຶ່ງກະຊວງກະສິກໍາ ແລະ ປ່າໄມ້ ມີໜ້າທີ່ໃນການຄຸ້ມຄອງມະຫາພາກ ກ່ຽວກັບວຽກງານກະສິກຳ, ປ່າໄມ້, ການປຸງແຕ່ງກະສິກຳຂັ້ນຕົ້ນ, ຄົ້ນຄວ້າວິທະຍາສາດເຕັກນິກ, ຊີວະເຕັກໂນໂລຊີ ແລະ ລະບົບນິເວດກະສິກຳ ແລະ ປ່າໄມ້ ແລະ ເປັນໃຈກາງໃນການຈັດຕັ້ງປະຕິບັດວຽກງານພັດທະນາຊົນນະບົດ ໃນຂອບເຂດທົ່ວປະເທດ ໂດຍສະເພາະ ແມ່ນ ການຊຸກຍູ້ສົ່ງເສີມ, ຕິດຕາມກວດກາ ແລະ ພັດທະນາວຽກງານການຜະລິດກະສິກໍາ ໃຫ້ການເປັນກະສິກຳອຸດສາຫະກຳ ໂດຍນຳໃຊ້ ເຕັກນິກ-ເຕັກໂນໂລຊີທີ່ທັນສະໄໝ ແລະ ກ້າວໜ້າ ຕິດພັນກັບການຜະລິດກະສິກຳແບບຄົບວົງຈອນ ແລະ ຍືນຍົງ ເພື່ອຄໍ້າປະກັນສະບຽງອາຫານ ແລະ ເປັນສິນຄ້າ ສົ່ງອອກສູ່ຕະຫຼາດພາກພື້ນ ແລະ ສາກົນ ໃຫ້ນັບມື້ນັບສູງຂຶ້ນ.

ຈຸດປະສົງຂອງງານ ແມ່ນ ເພື່ອເປັນການ ໂຄສະນາເຜີຍແຜ່ ບັນດາ ຜົນຜະລິດກະສິກຳ, ກົນຈັກ, ເຄື່ອງມື ແລະ ນະວັດຕະກຳ, ເຕັກນິກ-ເຕັກໂນໂລຊີ ດ້ານການຜະລິດກະສິກໍາ ທີ່ທັນສະໄໝ; ສົ່ງເສີມການແບ່ງປັນຄວາມຮູ້ ແລະ ການສ້າງຄວາມອາດສາມາດ ໃນຂົງເຂດການຜະລິດກະສິກຳ-ປ່າໄມ້; ຍົກສູງຄວາມຮັບຮູ້ ກ່ຽວກັບ ຄວາມປອດໄພ ແລະ ການຄ້ຳປະກັນ ດ້ານສະບຽງອາຫານ ແລະ ໂພຊະນາການ ຕິດພັນກັບ ການປັບຕົວເຂົ້າ ກັບການປ່ຽນແປງຂອງສະພາບດິນຟ້າອາກາດ; ແລະ ຍົກສູງການພົວພັນ ລະຫວ່າງ ພາກລັດ ແລະ ເອກະຊົນ, ອົງການຈັດຕັ້ງສາກົນ, ອົງການຈັດຕັ້ງທີ່ບໍ່ສັງກັດລັດຖະບານ, ອົງການຈັດຕັ້ງທາງສັງຄົມ ແລະ ທຸກພາກສ່ວນທີ່ກ່ຽວຂ້ອງ.

ເພື່ອເຮັດໃຫ້ການຈັດງານວາງສະແດງສິນຄ້າກະສິກຳ ປະຈໍາປີ 2024 ໃຫ້ມີບັນຍາກາດຄຶກຄື້ນມ່ວນຊື່ນ ແລະ ເຕັມໄປດ້ວຍຄວາມໝາຍ ຄວາມສໍາຄັນ, ກະຊວງກະສິກໍາ ແລະ ປ່າໄມ້ ຈຶ່ງໄດ້ເປັນໃຈກາງປະສານສົມທົບກັບທຸກພາກສ່ວນທີ່ກ່ຽວຂ້ອງ ຂອງພາກລັດ ແລະເອກະຊົນ ເປັນຕົ້ນແມ່ນອົງການອາຫານ ແລະ ການກະເສດ, ສະມາຄົມນັກທຸລະກິດກະສິກໍາລາວ ແລະ ທຸກພາກສ່ວນທີ່ກ່ຽວຂ້ອງ ໃນການຫ້າງຫາກະກຽມຈັດງານດັ່ງກ່າວ ນັບແຕ່ເດືອນ ກັນຍາ ປີ 2024 ເປັນຕົ້ນມາ.ພາຍໃນງານຈະໄດ້ລວບລວມເອົາບັນດາຜູ້ປະກອບການກະສິກໍາ, ຜູ້ໃຫ້ທຶນ, ນັກທຸລະກິດກະສິກໍາທັງພາຍໃນ ແລະຕ່າງປະເທດ ແລະຊາວກະສິກອນຂອງລາວເພື່ອເປັນແຮງກະຕຸ້ນສໍາຄັນທີ່ຈະນໍາພາການຜະລິດກະສິກໍາຂອງ ສປປ ລາວ ເຮົາກ້າວໄປສູ່ການກະສິກຳອຸດສາຫະກຳ ແລະຄວາມຍືນຍົງໃນອະນາຄົດ.

ໂອກາດດັ່ງກ່າວ ທ່ານລັດຖະມົນຕີ ກະຊວງກະສິກໍາ ແລະ ປ່າໄມ້ ຂໍເຊີນຊວນບັນດາທ່ານ, ພະນັກງານ, ທະຫານ, ຕຳຫຼວດ ນັກທຸລະກິດ, ພໍ່ຄ້າຊາວຂາຍ ຕະຫຼອດຮອດປະຊາຊົນລາວບັນດາເຜົ່າໃນທົ່ວປະເທດ ແລະ ແຂກຕ່າງປະເທດ ເຂົ້າຮ່ວມ ແລະ ທ່ຽວຊົມງານວາງສະແດງສິນຄ້າກະສິກຳ ປີ 2024 ໃນຄັ້ງນີ້ດ້ວຍ.

ຂ່າວ: ສາວລາວໃຕ້

แชร์