ໄຊຍະບູລີ ຖະແຫລງກ່ຽວກັບການລັກລອບເຄື່ອນຍ້າຍສັດປ່າ ມາແຕ່ປະເທດກູຍານ່າ

ໃນວັນທີ 7 ທັນວາ 2024 ຜ່ານມາ ທີ່ກອງກວດກາປ່າໄມ້, ພະແນກກະສິກໍາ ແລະ ປ່າໄມ້ແຂວງໄຊຍະບູລີ ໄດ້ຖະແຫລງຂ່າວ ກ່ຽວກັບການລັກລອບເຄື່ອນຍ້າຍສັດປ່າ ທີ່ເຄື່ອນຍ້າຍມາແຕ່ປະເທດກູຍານ່າ ໂດຍບໍ່ຖືກຕ້ອງຕາມລະບຽບກົດໝາຍ ໂດຍມີທ່ານ ພອນສະຫວັນ ໂສພາຄໍາພັນ ຫົວໜ້າພະແນກກວດກາສັດນໍ້າ-ສັດປ່າ ກົມກວດກາປ່າໄມ້ ກະຊວງກະສິກໍາ ແລະ ປ່າໄມ້, ທ່ານ ພັນໂທ ບຸນທະວີ ຄໍາວົງສາ ຮອງຫ້ອງຕໍາຫລວດ ປກສ ແຂວງໄຊຍະບູລີ ພ້ອມດ້ວຍພະນັກງານ ແລະ ເຈົ້າໜ້າທີ່ ທີ່ກ່ຽວຂ້ອງເຂົ້າຮ່ວມ.

ທ່ານ ກົງທອງ ສິດທິໄຊ ຮອງຫົວໜ້າພະແນກກະສິກໍາ ແລະ ປ່າໄມ້ ແຂວງໄຊຍະບູລີ ໄດ້ກ່າວວ່າ: ໃນວັນທີ 03 ທັນວາ 2024 ໄດ້ມີພົນລະເມືອງດີ ໂທລາຍງານເຈົ້າໜ້າທີ່ປ່າໄມ້ ວ່າມີການເຄື່ອນຍ້າຍສັດປ່າ (ປະເພດນົກແກ້ວສາຍພັນລິງເນັດ ແລະ ນົກແກ້ວສາຍພັນມາຄໍ) ມາແຕ່ສະໜາມບິນສາກົນວັດໄຕ ໂດຍນໍາໃຊ້ລົດຕູ້ ໝາຍເລກທະບຽນ ໄຊຍະບູລີ ກຄ 2999 ເພື່ອທີ່ຈະເຄື່ອນຍ້າຍມາເມືອງແກ່ນທ້າວ ແຂວງໄຊຍະບູລີ. ມາຮອດວັນທີ 04 ທັນວາ 2024, ກົມກວດກາປ່າໄມ້ ໄດ້ສົມທົບກັບກອງກວດກາປ່າໄມ້ ພະແນກກະສິກຳ ແລະ ປ່າໄມ້ແຂວງໄຊຍະບູລີ ລົງສົມທົບກັບໜ່ວຍງານເຈົ້າໜ້າທີ່ປ່າໄມ້ ເມືອງແກ່ນທ້າວ ແຂວງໄຊຍະບູລີ, ຊຶ່ງໄດ້ພົບເຫັນລົດຕູ້ໝາຍເລກທະບຽນ ໄຊຍະບູລີ ກຄ 2999 ຊຶ່ງເປັນລົດ ທ້າວ ເດຍ ສີສະຫວາດ ປະຊາຊົນບ້ານນໍ້າຊົງ ເມືອງປາກລາຍ ແຂວງໄຊຍະບູລີ ເຄື່ອນຍ້າຍສັດປ່າ (ປະເພດນົກແກ້ວສາຍພັນລິງເນັດ ແລະ ນົກແກ້ວສາຍພັນມາຄໍ) ໃຫ້ກັບທ້າວ ເພັດສະໝອນ ດວງດາລາ ອາຍຸ 30 ປີ ປັດຈຸບັນຢູ່ບ້ານຈອມແກ້ວ ເມືອງແກ່ນທ້າວ ແຂວງໄຊຍະບູລີ ຊຶ່ງມີ 16 ແກັດ ໃນນີ້, ມີນົກແກ້ວລິງເນັດ 189 ໂຕ. ດັ່ງນັ້ນ, ທາງເຈົ້າໜ້າທີ່ປ່າໄມ້ ຈຶ່ງໄດ້ຢຶດ ພ້ອມທັງເຮັດບົດບັນທຶກນໍາພວກກ່ຽວ ໃຫ້ນຳເອົາລົດ ແລະ ນົກແກ້ວລິງເນັດຈໍານວນດັ່ງກ່າວ ມາໄວ້ຢູ່ກອງກວດກາປ່າໄມ້ແຂວງ ເພື່ອດໍາເນີນການສືບສວນ-ສອບສວນ ຕາມລະບຽບກົດໝາຍ.

ທ່ານ ກົງທອງ ສິດທິໄຊ ກ່າວຕື່ມວ່າ: ຜ່ານການເກັບກຳຂໍ້ມູນເບື້ອງຕົ້ນ ເຫັນວ່າສັດປ່າ (ປະເພດນົກແກ້ວສາຍພັນລິງເນັດ ແລະ ນົກແກ້ວສາຍພັນມາຄໍ) ຈໍານວນດັ່ງກ່າວ ໄດ້ເຄື່ອນຍ້າຍມາແຕ່ປະເທດກູຍານ່າ ໂດຍນໍາສົ່ງທາງເຄື່ອງບິນກາໂກ ສາຍການບິນມາເລເຊຍ ຖ້ຽວບິນ 783-5980 2201 ຊຶ່ງບິນຈາກກູຍານ່າ ຜ່ານສະໜາມບິນປະເທດມາເລເຊຍ-ກຳປູເຈຍ-ຫວຽດນາມ ແລະ ລົງຈອດສະໜາມບິນສາກົນວັດໄຕ ສປປ ລາວ ເວລາ 19 ໂມງ ຂອງວັນທີ 03 ທັນວາ 2024. ມາຮອດປັດຈຸບັນທາງກອງກວດກາປ່າໄມ້ ໄດ້ສົມທົບກັບກົມກວດກາ ແລະ ພາກສ່ວນທີ່ກ່ຽວຂ້ອງເກັບກຳຂໍ້ມູນ ພ້ອມທັງດໍາເນີນການສືບສວນ-ສອບສວນ ເພື່ອປະຕິບັດຕາມກົດໝາຍ ວ່າດ້ວຍສັດປ່າ ແລະ ປະມວນກົດໝາຍອາຍາ ໃຫ້ໄປຕາມຂະບວນການຍຸຕິທຳ. ສ່ວນສັດປ່າ (ປະເພດນົກແກ້ວສາຍພັນລິງເນັດ ແລະ ນົກແກ້ວສາຍພັນມາຄໍ) ທີ່ທາງເຈົ້າໜ້າທີ່ປ່າໄມ້ ໄດ້ອາຍັດໄວ້ນັ້ນແມ່ນໄດ້ປົກປັກຮັກສາໄວ້ກ່ອນ ເພື່ອດໍາເນີນຄະດີໃຫ້ສໍາເລັດແລ້ວ ຈະປະສານພາກສ່ວນທີ່ກ່ຽວຂ້ອງເພື່ອສົ່ງຄືນຖິ່ນກຳເນີດ ກໍຄືປະເທດຕົ້ນທາງ.
ຂ່າວ: ມະໄລວັນ

แชร์