ການສົ່ງເສີມ ແລະຊ່ວຍເຫຼືອຂອງອົງການແຄຣນາໆຊາດ ສ້າງຄວາມເຂັ້ມແຂງໃຫ້ຊຸມຊົນບ້ານໃໝ່ ເມືອງຂວາ

ບ້ານໃໝ່ ເມືອງຂວາ ແຂວງຜົ້ງສາລີ ເປັນສ່ວນໜຶ່ງຂອງ ສປປ ລາວ ທີ່ໄດ້ຮັບການສົ່ງເສີມ ແລະ ຊ່ວຍເຫຼືອຫຼາຍດ້ານຈາກໂຄງການສ້າງຄວາມເຂັ້ມແຂງໃຫ້ແກ່ແມ່ຍິງຊົນເຜົ່າ ເພື່ອປັບໂຕເຂົ້າກັບການປ່ຽນແປງຂອງສະພາບດິນຟ້າອາກາດແບບຍືນຍົງ (WECR) ຂອງ ອົງການແຄຣນາໆຊາດ ປະຈໍາ ສປປ ລາວ ເປັນຕົ້ນແມ່ນ: ລະບົບນໍ້າສະອາດ ແລະ ສຸຂະອານາໄມ, ໂຄງການຄໍ້າສະບຽງອາຫານ, ການສົ່ງເສີມບົດບາດຂອງແມ່ນຍິງ ແລະ ອື່ນໆ.

ທ່ານ ວຽງ ວໍລະອຸນຄໍາ ຮອງເລຂາພັກບ້ານໃໝ່ ເມືອງຂວາ ແຂວງຜົ້ງສາລີ ໃຫ້ສໍາພາດຕໍ່ນັກຂ່າວ ໂຄງການສ້າງຄວາມເຂັ້ມແຂງ ໃຫ້ແກ່ສື່ມວນຊົນລາວ ໂດຍການມີສ່ວນຮ່ວມຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງ ທາງສັງຄົມ ເພື່ອການພັດທະນາສີຂຽວ ໃນ ສປປ ລາວ (GAMCIL) ເມື່ອບໍ່ດົນຜ່ານມານີ້ວ່າ: ບ້ານໃໝ່ ປະກອບດ້ວຍ 38 ຫຼັງຄາເຮືອນ, 53 ຄອບຄົວ, ມີປະຊາຊົນ 203 ຄົນ ຍິງ 98 ຄົນ ເປັນບ້ານຊົນເຜົ່າກຶມມຸ, ຊຶ່ງໃນເມື່ອກ່ອນປະຊາຊົນໄດ້ຖືເອົາການຖາງປ່າເຮັດໄຮ່ແບບເລື່ອນລອຍເປັນຫຼັກ. ມາຮອດປີ 2022 ອົງການແຄຣນາໆຊາດ ປະຈໍາ ສປປ ລາວ ໄດ້ໃຫ້ການຊ່ວຍ ໂດຍສະເພາະ ແມ່ນໂຄງການຄໍ້າສະບຽງອາຫານ, ການສົ່ງເສີມສຸຂະອະນາໄມ ແລະ ການກໍ່ສ້າງລະບົບນໍ້າສະອາດ (ນໍ້າລິນ). ສໍາລັບການຜະລິດກະສິກຳປູກຝັງ-ລ້ຽງສັດ ປະກອບມີການປູກພືດຜັກສວນຄົວ 53 ຄອບຄົວ, ປູກໄມ້ໃຫ້ໝາກ 11 ຄອບຄົວ, ລ້ຽງໄກ່ 10 ຄອບຄົວ, ລ້ຽງໝູ 9 ຄອບຄົວ, ງົວ 14 ຄອບຄົວ, ລ້ຽງປາ 4 ຄອບຄົວ, ລ້ຽງເຜິ້ງ 15 ຄອບຄົວ, ຟອຍກວາດ 10 ຄອບຄົວ. ອັນພົ້ນເດັ່ນທີ່ໂຄງການຈັດຕັ້ງປະຕິບັດຢູ່ບ້ານນີ້ແມ່ນ: ລະບົບນໍ້າສະອາດທຸກຄົວເຮືອນແມ່ນມີນໍ້າລິນທີ່ສະອາດຊົມໃຊ້ ຢ່າງສະດວກສະບາຍ, ບໍ່ຫຍຸ້ງຍາກໃນການໄປຕັກນໍ້າ, ຫາບນໍ້າໃຊ້ ດັ່ງທີ່ແມ່ຍິງເມື່ອກ່ອນປະຕິບັດ. ນອກຈາກນັ້ນໂຄງກ່າວດັ່ງກ່າວ ຍັງໄດ້ສົ່ງເສີມບົດບາດແມ່ຍິງໃນຊຸມຊົນ ຜ່ານການຜະລິດກະສິກຳ ເຮັດໃຫ້ມີໂອກາດໃນການຫາລາຍໄດ້ເພີ່ມຂຶ້ນ. ສິ່ງສໍາຄັນອີກຢ່າງທີ່ເກີດຂຶ້ນແມ່ນ ປະຊາຊົນພາຍໃນບ້ານ ໄດ້ມີສ່ວນຮ່ວມໃນການຄຸ້ມຄອງປ່າ ແລະ ແຫຼ່ງນໍ້າ ດ້ວຍການຫຼຸດຜ່ອນການຕັດໄມ້ທໍາລາຍປ່າ, ການປູກພືດທົດແທນ ແລະ ການຮັກສາແຫຼ່ງນໍ້າທຳມະຊາດ ຊຶ່ງໄດ້ຮັບຄໍາແນະນໍາຈາກ ອົງການແຄຣນາໆຊາດ ປະຈໍາ ສປປ ລາວ.

ຢ່າງໃດກໍຕາມເຖິງວ່າບ້ານໃໝ່ຈະມີພັດທະນາທີ່ດີຂຶ້ນຫຼາຍດ້ານແຕ່ການສັນຈອນໄປມາຫາບ້ານດັ່ງກ່າວຍັງຄົງປະສົບຄວາມຫຍຸ້ງຍາກລໍາບາກ. ສະນັ້ນການປັບປຸງເສັ້ນທາງຈະເປັນຂັ້ນຕໍ່ໄປທີ່ສໍາຄັນ ທີ່ຈະເຮັດໃຫ້ບ້ານໃໝ່ມີຄວາມເຂັ້ມແຂງຍິ່ງຂຶ້ນ. ໂອກາດດັ່ງກ່າວ ທ່ານ ວຽງ ວໍລະອຸນຄໍາ ໄດ້ກ່າວຂອບໃຈມາຍັງອົງການແຄຣນາໆຊາດ ປະຈໍາ ສປປ ລາວ ທີ່ໃຫ້ການສົ່ງເສີມ ແລະ ຊ່ວຍເຫຼືອບັນດາກິດຈະກຳຕ່າງໆ ທັງຍັງມີຄວາມຫວັງວ່າໃນອານາຄົດຈະໄດ້ຮັບການຊຸກຍູ້ຊ່ວຍເຫຼືອຕື່ມອີກເພື່ອການພັດທະນາຊຸມຊົນຕາມທິດສີຂຽວໃຫ້ມີຄວາມກ້າວໜ້າຍິ່ງໆຂຶ້ນ.
ໂດຍ: ສາວລາວໃຕ້

แชร์