ກອງສິລະປະກອນກອງທັບ ສະແດງຜ່ານລາຍການເພື່ອກຽມເຄື່ອນໄຫວສະແດງຢູ່ຫວຽດນາມ

ວັນທີ 3 ທັນວາ 2024, ກອງສິລະປະກອນກອງທັບໄດ້ສະແດງຜ່ານລາຍການເພື່ອກຽມເຄື່ອນໄຫວສະແດງຢູ່ ສສ ຫວຽດນາມ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນຫວຽດນາມ ຄົບຮອບ 80 ປີ ໂດຍການເຂົ້າຮ່ວມຊົມຂອງສະຫາຍ ພົນຕີ ໄພວັນ ຈັນທະພົມມາ ຮອງຫົວໜ້າກົມໃຫຍ່ການເມືອງກອງ ທັບ, ພ້ອມດ້ວຍຄະນະພັກ-ຄະນະບັນຊາກອງສິລະປະກອນກອງທັບ ແລະພະນັກງານ-ນັກຮົບ ເຂົ້າຮ່ວມ.
 
ການສະແດງຜ່ານລາຍການໃນຄັ້ງນີ້ເພື່ອເປັນການປັບປຸງເຮັດໃຫ້ລາຍການສະແດງສິລະປະ-ວັດທະນະທຳ ມີເນື້ອໃນຖືກຕ້ອງເໝາະສົມ ແລະແທດເໝາະກັບຫຼັກວິຊາການ. ລາຍການທີ່ນໍາມາສະແດງຄັ້ງນີ້ປະກອບມີລາຍການ 15 ລາຍການ ຄື: ມີບົດເພງ ພາສາຫວຽດນາມ 4 ບົດ, ເພງລາວ 5 ບົດ, ຂັບລຳພື້ນເມືອງ 1 ບົດ, ເສບດົນຕຣີ ພື້ນເມືອງ 1 ບົດ, ບົດຟ້ອນເອກະລາດ 4 ບົດ ໃຊ້ເວລາປະມານ 1 ຊົ່ວໂມງ 30 ນາທີ.
 
ພາຍຫຼັງສຳເລັດການສະແດງຜ່ານຄະນະຊີ້ນໍາ, ຄະນະພັກ-ຄະນະບັນຊາ ແລະຄະນະຮັບຜິດຊອບແຕ່ລະພາກສ່ວນກໍໄດ້ພ້ອມກັນປະກອບຄໍາຄິດຄໍາເຫັນຢ່າງກົງໄປ ກົງມາເພື່ອພ້ອມກັນປັບປຸງແຕ່ລະລາຍການສະແດງໃຫ້ຖືກຕ້ອງສອດຄ່ອງກັບເນື້ອໃນທີ່ສະແດງອອກຂອງແຕ່ລະລາຍການໃຫ້ມີຄວາມອ່ອນຊ້ອຍ ແລະຈົບງາມຍິ່ງໆ ຂຶ້ນ.
ຂ່າວ: ລີຕ້າ

แชร์