ປູກມັນຕົ້ນຂາຍສ້າງລາຍຮັບໃຫ້ຄອບຄົວ

ທ່ານ ມ່ວນ ທາງ ປະຊາຊົນ ບ້ານສະທົວເໜືອ ເມືອງທ່າແຕງ ແຂວງເຊກອງ ທ່ານສ້າງເສດຖະກິດຄອບຄົວຄື: ປູກມັນຕົ້ນຂາຍເຂົ້າລານເກັບຊື້ມັນຕົ້ນພາຍ ໃນ ເມືອງທ່າແຕງ ແລະເມືອງອ້ອມຂ້າງໃນໄລຍະ 2 ປີຜ່ານມານີ້ຊຶ່ງສາມາດສ້າງລາຍຮັບເຂົ້າຄອບຄົວໄດ້ເຖິງ 50 ລ້ານກີບ.

  ທ່ານ ມ່ວນ ທາງ ປະຊາຊົນ ບ້ານສະທົວເໜືອ ໄດ້ໃຫ້ຮູ້ວ່າ: ທ່ານເປັນປະຊາຊົນຜູ້ໜຶ່ງທີ່ມີພອນສະຫວັນຊອກຮູ້ຮໍ່າຮຽນນໍາຂະແໜ່ງການກ່ຽວຂ້ອງຂັ້ນແຂວງ , ຂັ້ນເມືອງທີ່ລົງມາຜັນຂະຫຍາຍເອກະສານກ່ຽວກັບດ້ານເຕັກນິກຕ່າງໆໃນແຕ່ລະຄັ້ງໂດຍສະເພາະບົດຮຽນ, ຂັ້ນຕອນ, ວິທີການບົວລະບັດ,ການປູກມັນຕົ້ນເປັນສິນຄ້າໃຫ້ຖືກຫຼັກການ ແລະມີຄຸນນະພາບສົ່ງອອກໂດຍຕິດພັນກັບການສ້າງເສດຖະກິດຄອບຄົວຊຶ່ງທ່ານໄດ້ເລີ່ມປູກມັນຕົ້ນມາແຕ່ປີ 2017 ຢູ່ບ້ານສະທົວເໜືອ ເມືອງທ່າແຕງ ແຂວງເຊກອງ, ເບື້ອງຕົ້ນທ່ານໄດ້ປູກແບບປະຖົມປະຖານ ແລະ ໄດ້ລົງທຶນປູກ 2 ເຮັກຕາ ໂດຍນໍາໃຊ້ທຶນ 2 ລ້ານ 5 ແສນກີບຕໍ່ປີເຫັນວ່າໄດ້ຮັບຜົນດີ.

ໃນປີ 2018 ກໍໄດ້ຂະຫຍາຍເນື້ອທີ່ປູກເພີ່ມອີກ 2 ເຮັກຕາ ລວມເປັນ 4 ເຮັກຕາ, ໃນ 2 ປີໄດ້ນໍາໃຊ້ທຶນທັງໝົດ 5 ລ້ານກີບ,ໂດຍທ່ານໄດ້ນໍາໃຊ້ດ້ານເຕັກນິກວິ ຊາການທີ່ຕົນໄດ້ຮັບຟັງຂໍ້ມູນຂ່າວ ສານຕ່າງໆທີ່ທາງຂັ້ນເທິງລົງຜັນ ຂະຫຍາຍຢູ່ພາຍໃນບ້ານຂອງຕົນເປັນປົກກະຕິຕໍ່ເນື່ອງເຂົ້າໃນການປູກຝັ່ງຊຶ່ງຈຸດດີຂອງການປູກມັນຕົ້ນຂາຍໃນແຕ່ລະປີເຫັນວ່າໄດ້ຮັບຜົນຜະລິດສູງ ແລະທຸກລານທີ່ຮັບຊື້ມັນຕົ້ນກໍໃຫ້ລາຄາສູງຂຶ້ນຄື 1,2 ລ້ານກີບຕໍ່ໂຕນ, ຂະນະທີ່ປະຈຸບັນນີ້ແມ່ນ 1,4 ລ້ານກີບຕໍ່ໂຕນພ້ອມທັງເພີ່ມຂໍ້ສະດວກໃຫ້ປະຊາຊົນໃນເມື່ອປະຊາຊົນນຳມັນຕົ້ນເຂົ້າມາຂາຍຢູ່ລານເກັບຊື້ມັນຕົ້ນກໍໄດ້ຈ່າຍເງິນໃຫ້ກັບທີ່ໂດຍບໍ່ໄດ້ ຕິດໜີ້ປະຊາຊົນ.

  ທ່ານ ມ່ວນ ທາງ ຍັງກ່າວ ຕື່ມວ່າ: ໃນຄອບຄົວມີ 6 ຄົນ, ມີແຮງງານສົມບູນ 4 ຄົນອາຊີບ ໃນເມື່ອກ່ອນແມ່ນເຮັດນາ, ປູກພືດຜັກ. ພາຍຫຼັງທີ່ຫັນມາປູກມັນຕົ້ນຂາຍປ້ອນເຂົ້າລານເກັບຊື້ມັນຕົ້ນນັບແຕ່ປີ 2017 ເປັນຕົ້ນມາເຫັນວ່າມີລາຍຮັບສູງສົມຄວນຊຶ່ງສາມາດເກັບເງິນເຂົ້າສູ່ຄອບຄົວໄດ້ເຖິງ 50 ລ້ານກີບ ແລະເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນກ່ວາເກົ່າ. ສະເພາະຄອບຄົວອື່ນໆທີ່ປູກມັນຕົ້ນຂາຍກໍເຫັນວ່າຊີວິດການເປັນຢູ່ຂອງເຂົາເຈົ້າກໍມີ ການປ່ຽນແປງດີຂຶ້ນເຊັ່ນດຽວກັນ.

  ສຳລັບໃນແຜນປີ 2019 ທ່ານ ຈະປູກມັນຕົ້ນເພີ່ມອີກ 1 ເຮັກຕາ ລວມເປັນ 5 ເຮັກຕາ ເພື່ອສ້າງລາຍຮັບໃຫ້ສູງຂຶ້ນກວ່າເກົ່າເພາະວ່າລານເກັບຊື້ມັນຕົ້ນຢູ່ພາຍໃນເມືອງທ່າແຕງ ແລະເມືອງອ້ອມຂ້າງແມ່ນຍັງຕ້ອງການຮັບຊື້ມັນຕົ້ນອີກຫຼາຍຮ້ອຍໂຕນເພື່ອໃຫ້ພຽງພໍກັບຄວາມຕ້ອງການຂອງກຳລັງການ ຜະລິດຂອງໂຮງງານໃນຕໍ່ໜ້າ.

ພາບຂ່າວ: ນສພ ເສດຖະກິດ-ສັງຄົມ

แชร์