ບໍລິສັດ ພູເບ້ຍ ມາຍນິງ ແບ່ງປັນວິທີການຜະລິດດີທີ່ສຸດໃນການພັດທະນາຊຸມຊົນ ກັບ ຕາງໜ້າພາກລັດຂັ້ນສູນກາງ ແລະຂັ້ນແຂວງ

ບໍລິສັດ ພູເບ້ຍ ມາຍນິງ ຕ້ອນຮັບການລົງຢ້ຽມຢາມໂຄງການພັດທະນາຊຸມຊົນ ແລະໂຄງການປັບປຸງຊີວິດການເປັນຢູ່ແບບຍືນຍົງຂອງບໍລິສັດ ຂອງຕົວແທນຈາກພາກລັດຂັ້ນສູນກາງ ແລະ ຂັ້ນແຂວງ ເປັນເວລາສອງມື້ (19-21 ພະຈິກ). ຕົວແທນຈາກພາກລັດດັ່ງກ່າວນີ້ລວມມີຄູ ແລະອາຈານຈາກມະຫາວິທະຍາໄລແຫ່ງຊາດ, ພະແນກກະສິກໍາ ແລະ ປ່າໄມ້, ພະແນກພະລັງງານ ແລະບໍ່ແຮ່ ແຂວງໄຊສົມບູນ ແລະຫ້ອງການກະສິກໍາ ແລະປ່າໄມ້ເມືອງອະນຸວົງ.

ໃນລະຫວ່າງການລົງຢ້ຽມຢາມ, ທ່ານ ລອນ ພອນພັກດີ, ຜູ້ຈັດການພະແນກຊີວິດການເປັນຢູ່ຂອງບໍລິສັດ ພູເບ້ຍ ມາຍນິງ, ໄດ້ໃຫ້ການຕ້ອນຮັບຢ່າງອົບອຸ່ນ ແລະ ນໍາພາຄະນະດັ່ງກ່າວຢ້ຽມຢາມໂຄງການຂຸດຄົ້ນ-ປຸງແຕ່ງ ທອງ-ຄໍາ ພູຄໍາ. ຄະນະນີ້ໄດ້ຮັບຊົມວິດີໂອທີ່ອະທິບາຍເຖິງວິທີການທີ່ບໍລິສັດ ພູເບ້ຍ ມາຍນິງ, ເຊິ່ງເປັນບໍລິສັດບໍ່ແຮ່ຊັ້ນນໍາໃນຂະແໜງອຸດສາຫະກໍາຢູ່ພາກພື້ນ, ດໍາເນີນງານທົ່ວທຸກດ້ານຂອງການຜະລິດ-ປຸງແຕ່ງ ແລະ ຄວາມມຸ້ງໝັ້ນໄລຍະຍາວຂອງບໍລິສັດຕໍ່ປະເທດລາວ ເວົ້າລວມ, ເວົ້າສະເພາະແມ່ນວິທີການທີ່ບໍລິສັດໃຫ້ການສະໜັບສະໜູນ ແລະ ຊ່ວຍເຫຼືອບັນດາຊຸມຊົນທ້ອງຖິ່ນ. ນອກຈາກນັ້ນ, ທ່ານ ລອນ ກໍ່ໄດ້ນໍາສະເໜີກ່ຽວກັບໂຄງການພັດທະນາຊຸມຊົນ ແລະ ໂຄງການປັບປຸງຊີວິດການເປັນຢູ່ແບບຍືນຍົງຂອງບໍລິສັດ ຊຶ່ງໄດ້ຮັບການຈັດຕັ້ງປະຕິບັດນັບແຕ່ປີ 2005 ຈົນເຖິງປີ 2023 ດ້ວຍການລົງທຶນຈາກບໍລິສັດ ພູເບ້ຍ ມາຍນິງ ຈໍານວນ 5,8 ລ້ານໂດລາສະຫະລັດ, ເພື່ອສໍາເລັດໂຄງການພັດທະນາຊຸມຊົນ 460 ໂຄງການ ຢູ່ໂຮງງານພູຄໍາ ແລະ ໂຮງງານບ້ານຫ້ວຍຊາຍ. ໂຄງການເຫຼົ່ານີ້ໄດ້ປັບປຸງ ແລະ ສ້າງຖານທີ່ໝັ້ນຄົງເພື່ອເຮັດໃຫ້ຊີວິດການເປັນຢູ່ ແລະ ເສດຖະກິດຂອງທ້ອງຖິ່ນຍືນຍົງ ແລະ ຊ່ວຍຫຼຸດຜ່ອນຄວາມທຸກຍາກ ຢູ່ພາຍໃນບັນດາຊຸມຊົນເຈົ້າພາບຂອງບໍລິສັດ ພູເບ້ຍ ມາຍນິງ ຢູ່ແຂວງໄຊສົມບູນ.

ຄະນະດັ່ງກ່າວຍັງໄດ້ຢ້ຽມຊົມຫ້ອງຄວບຄຸມໃນບໍ່ທີ່ທັນສະໄໝ, ໂຮງງານຜະລິດ-ປຸງແຕ່ງ ແລະບໍ່ເປີດໜ້າດິນຂອງໂຄງການພູຄໍາ. ຫຼັງຈາກນັ້ນທີມງານພະແນກຊີວິດການເປັນຢູ່ຍືນຍົງຂອງບໍລິສັດ ໄດ້ເດີນທາງຮ່ວມກັບແຂກໄປຈຸດທີ່ຕັ້ງໂຄງການປັບປຸງຊີວິດການເປັນຢູ່ແບບຍືນຍົງຂອງບໍລິສັດ ພູເບ້ຍ ມາຍນິງ ເພື່ອເບິ່ງການກໍ່ສ້າງລະບົບຊົນລະປະທານ, ໂຄງການທອມງົວ ແລະ ສວນຜັກຕ່າງໆ. ສິ້ນສຸດການຢ້ຽມຢາມດ້ວຍການປຶກສາຫາລືແບບເປີດກວ້າງກັບບັນດາຕົວແທນຂອງພາກລັດໝົດທຸກຄົນ ທີ່ໄດ້ຖືໂອກາດນີ້ສອບຖາມຄໍາຖາມທີ່ກ່ຽວຂ້ອງກັບວິທີການປະຕິບັດທີ່ດີເລີດຂອງໂຄງການພັດທະນາຊຸມຊົນຢູ່ບັນດາບ້ານດັ່ງກ່າວທີ່ຕັ້ງຢູ່ໃກ້ກັບການດໍາເນີນງານຂອງບໍລິສັດ ພູເບ້ຍ ມາຍນິງ.

ໃນເວລາສິ້ນສຸດການຢ້ຽມຢາມ, ຄະນະດັ່ງກ່າວໄດ້ໃຫ້ຄໍາເຫັນທີ່ດີກ່ຽວກັບໂຄງການລະດັບໂລກຂອງບໍລິສັດ ແລະການປະກອບສ່ວນເຂົ້າໃນການພັດທະນາ ແລະປັບປຸງມາດຕະຖານການດໍາລົງຊີວິດ ແລະ ຊີວິດການເປັນຢູ່ຂອງບັນດາຊຸມຊົນທ້ອງຖິ່ນຢູ່ແຂວງໄຊສົມບູນ.

ທ່ານ ດາລິງ ເຊັງ, ຜູ້ອໍານວຍການ ແລະປະທານບໍລິຫານຂອງບໍລິສັດ ແພນອອສ໌, ໃຫ້ຮູ້ວ່າບໍລິສັດ ພູເບ້ຍ ມາຍນິງ ຮັບປະກັນຈະສືບຕໍ່ພັດທະນາຊຸມຊົນ ແລະ ໂຄງການປັບປຸງຊີວິດການເປັນຢູ່ແບບຍືນຍົງໃຫ້ບັນດາຊຸມຊົນທ້ອງຖິ່ນທີ່ຢູ່ໃກ້ກັບໂຄງການຂອງບໍລິສັດໃນລາວ.

ໂຄງການພັດທະນາຊຸມຊົນ ແລະໂຄງການປັບປຸງຊີວິດການເປັນຢູ່ແບບຍືນຍົງຂອງພວກເຮົາໄດ້ຮັບການຄຸ້ມຄອງຮ່ວມກັບບັນດາຊຸມຊົນທ້ອງຖິ່ນ ແລະປະສານສົມທົບຢ່າງໃກ້ຊິດກັບອໍານາດການປົກຄອງແຂວງໄຊສົມບູນ. ພວກເຮົາຈັດການປຶກສາຫາລືກັບຄູ່ຮ່ວມງານທີ່ກ່ຽວຂ້ອງທັງໝົດເພື່ອຮັບປະກັນວ່າຜົນປະໂຫຍດຂອງໂຄງການພວກເຮົາຈະສືບຕໍ່ຍືນຍົງ ແລະ ປະມໍລະດົກຕົກທອດທີ່ດີໄວ້ເພື່ອອະນາຄົດ.

“ການຢ້ຽມຢາມໃນຄັ້ງນີ້ຊ່ວຍໃຫ້ຕົວແທນຂອງພາກລັດຂັ້ນແຂວງໄດ້ເຫັນຕົວຈິງວ່າພວກເຮົາສືບຕໍ່ຮູບແບບຂອງສະຫະປະຊາຊາດວ່າດ້ວຍເປົ້າໝາຍການພັດທະນາແບບຍືນຍົງ ເພື່ອຫຼຸດຜ່ອນຄວາມທຸກຍາກ, ສະໜັບສະໜູນການເຕີບໂຕຂອງເສດຖະກິດ ແລະສົ່ງເສີມລາຍໄດ້ປົກກະຕິໃຫ້ຊຸມຊົນທ້ອງຖິ່ນ.”

ທ່ານ ຈັນເພັງ ໃຫ້ຮູ້ຕື່ມອີກວ່າ “ພວກເຮົາພາກພູມໃຈຫຼາຍທີ່ໄດ້ເຫັນວ່າໂຄງການພັດທະນາຊຸມຊົນ ແລະໂຄງການປັບປຸງຊີວິດການເປັນຢູ່ແບບຍືນຍົງຂອງພວກເຮົາ ມີບົດບາດສໍາຄັນໃນການຍົກລະດັບການສຶກສາ ແລະສາທາລະນະສຸກ, ເຜີຍແຜ່ທັກສະ ແລະຄວາມຮູ້ໃຫ້ຊຸມຊົນທ້ອງຖິ່ນ. ນອກຈາກນັ້ນ, ຊຸມຊົນທ້ອງຖິ່ນຍັງໄດ້ຮັບພື້ນຖານໂຄງລ່າງຊຸມຊົນທີ່ດີຂຶ້ນ, ສ້າງທຸລະກິດຂະໜາດນ້ອຍຂອງພວກເຂົາ ແລະ ສາມາດເຂົ້າເຖິງແຫຼ່ງທຶນ ແລະຕະຫຼາດຕ່າງໆໃນທົ່ວປະເທດ.”

ສໍາລັບຂໍ້ມູນເພີ້ມຕື່ມ, ກະລຸນາຕິດຕໍ່: ທີມງານພະແນກພົວພັນ-ສື່ສານຂອງບໍລິສັດ ພູເບ້ຍ ມາຍນິງ. ອີເມວ: communications@pbm.panaust.com

แชร์