ສປຈີນ ມີສູນຄຸ້ມຄອງຊັບສິນທາງປັນຍາລະດັບຊາດ 75ແຫ່ງ

ຂປລ.ສຳນັກຂ່າວຊິນຮວາຂອງ ສປຈີນ, ສຳນັກບໍລິຫານ ຊັບສິນທາງປັນຍາ ແຫ່ງຊາດ ສປຈີນ (CNIPA) ເປີດເຜີຍວ່າ:ປັດຈຸບັນ ສປຈີນ ມີສູນຄຸ້ມຄອງ ຊັບສິນທາງປັນຍາ ລະດັບຊາດ 75 ແຫ່ງ, ຊຶ່ງແຈກຢາຍຢູ່ຕາມ ເທດສະບານ, ນະຄອນ, ເຂດປົກຄອງຕົນເອງ ແລະ ແຂວງ 29 ແຫ່ງ.
ເມື່ອບໍ່ດົນມານີ້ ສຳນັກບໍລິຫານ ໄດ້ອະນຸມັດການກໍ່ສ້າງສູນ ຄຸ້ມຄອງຊັບສິນທາງປັນຍາ ລະດັບຊາດໃນເຂດປົກຄອງຕົນເອງ ໜິງເຊຍຫຸຍຊຶງຈະດຳເນີນງານຄຸ້ມຄອງຊັບສິນທາງປັນຍາສຳລັບອຸດສາຫະກຳ ການຜະລິດວັດຖຸໃໝ່ ແລະ ອຸປະກອນຂັ້ນສູງຢ່າງວອງໄວ ໃນອະນາຄົດ.
ເມື່ອສູນດັ່ງກ່າວກໍ່ສ້າງສຳເລັດ ແລະ ເປີດໃຊ້ງານແລ້ວ ຄາດວ່າຈະມີສ່ວນເລັ່ງການປ່ຽນຜ່ານແລະ ຍົກລະດັບແຮງຂັບເຄື່ອນທາງເສດຖະກິດ, ສ້າງນະວັດຕະກຳ ແລະ ສະພາບແວດລ້ອມທາງທຸລະກິດທີ່ດີ,ພ້ອມທັງສະໜັບສະໜູນ ການພັດທະນາທາງເສດຖະກິດ ທີ່ມີຄຸນນະພາບສູງ ໃນພາກຕາເວັນຕົກ ແລະ ພື້ນທີ່ເຊື້ອຊາດຂອງ ສປຈີນ

แชร์