ກິດຈະກໍາທັດສະນະສຶກສາ ແລະຢ້ຽມຢາມໃນຄັ້ງນີ້, ເພື່ອໃຫ້ສື່ມວນຊົນທີ່ໄດ້ເຂົ້າຮ່ວມຝຶກອົບຮົມ ກັບໂຄງການ GAMCIL ໃນໄລຍະຜ່ານມາໄດ້ເຄື່ອນໄຫວປະຕິບັດວຽກງານໃນຕົວຈິງ ແລະ ມີຄວາມເຂົ້າໃຈກ່ຽວກັບການລາຍງານຂ່າວສີຂຽວ. ໃນໄລຍະການທັດສະນະສຶກສາ ແລະຢ້ຽມຢາມຄັ້ງນີ້, ສື່ມວນຊົນໄດ້ເຂົ້າພົບປະພະນັກງານອົງການແຄຣນາໆຊາດ ປະຈໍາເມືອງຂວາ ແຂວງຜົ້ງສາລີ ເພື່ອຮັບຟັງການລາຍງານຫຍໍ້ກ່ຽວກັບໂຄງການດັ່ງກ່າວ; ໄປຢ້ຽມຢາມກິດຈະກໍາໂຄງການ WECR ທີ່ບ້ານກຸງເກືອຍ, ຢ້ຽມຢາມ, ສໍາພາດ ຄອບຄົວຕົວແບບກິດຈະກໍາປູກຜັກສວນຄົວເຮືອນຮົ່ມ, ຄອບຄົວຕົວແບບກິດຈະກໍາລ້ຽງເຜິ້ງ, ໂຄງການ KFSPF, ກິດຈະກໍານໍ້າລິນ ທີ່ບ້ານໃໝ່ ແລະ ອື່ນໆ.

ນອກຈາກນັ້ນ ສື່ມວນຊົນ ຍັງຈະໄດ້ເດີນທາງໄປທັດສະນະ ແລະຢ້ຽມຢາມວັດພະເຈົ້າສິງຄໍາ ທີ່ເມືອງຫຼາ ແຂວງອຸດົມໄຊ, ໄປທ່ຽວຊົມສະຖານທີ່ທ່ອງທ່ຽວທໍາມະຊາດນໍ້າກັດຢໍລະປາ ເມືອງໄຊ ແຂວງອຸດົມໄຊ. ຫຼັງຈາກນັ້ນ, ຈະໄດ້ສະຫຼຸບ, ຖອດຖອນບົດຮຽນຮ່ວມກັນ. ການທັດສະນະສຶກສາ ແລະ ຢ້ຽມຢາມໃນຄັ້ງນີ້, ສື່ມວນຊົນ ໄດ້ເກັບກຳຮູບພາບ, ວິດີໂອ ແລະ ສຳພາດ ເພື່ອເກັບກໍ້າຂໍ້ມູນຕ່າງໆ. ຫຼັງຈາກສໍາເລັດກິດຈະກໍາ ສື່ມວນຊົນ ຈະນໍາມາຂຽນຂ່າວ, ບົດຕ່າງໆລົງສື່ຂອງຕົນແລ້ວ ແລະ ຍັງຈະໄດ້ສົ່ງວຽກບ້ານໃຫ້ທາງໂຄງການໂດຍສະເພາະຂຽນຂ່າວ/ບົດຄວາມທີ່ກ່ຽວຂ້ອງກັບການພັດທະນາສີຂຽວ ແລະບົດບາດຍິງ-ຊາຍ, ຂຽນບົດເລື່ອງ, ສົ່ງຮູບພາບທີ່ກ່ຽວຂ້ອງກັບການລົງຢ້ຽມໂຄງການ, ຕັດຕໍ່ວິດີໂອ ປະກອບສຽງ ແລະອື່ນໆ ເພື່ອເປັນຜົນງານນໍາໄປຄັດເລືອກ ເຂົ້າຮ່ວມກິດຈະກໍາຂອງໂຄງການໃນຂັ້ນຕໍ່ໄປ.