ພິທີສະເຫຼີມສະຫຼອງເປີດທະນາຄານຄໍາລາວຢ່າງເປັນທາງການ

ພິທີເປີດທະນາຄານຄໍາລາວຢ່າງເປັນທາງການທີ່ມີສໍານັກງານຕັ້ງທີ່ບ້ານໂພນໄຊ ເມືອງໄຊເສດຖາ ນະຄອນຫຼວງວຽງຈັນ ຈັດຂຶ້ນວັນທີ 3 ທັນວາ 2024 ໃຫ້ກຽດເຂົ້າຮ່ວມເປັນສັກຂີພິຍານໂດຍທ່ານ ສອນໄຊ ສີພັນດອນ ນາຍົກລັດຖະມົນຕີ ບັນດາການນໍາພັກ-ລັດ ຕາງໜ້າຈາກບັນດາກະຊວງອົງການຈັດຕັ້ງຕ່າງໆ ຄະນະນໍາ ແລະທຸກພາກສ່ວນທີ່ຮັບຜິດຊອບຂອງທະນາຄານຄໍາລາວເຂົ້າຮ່ວມ.

ພິທີເປີດທະນາຄານຄ້າລາວຢ່າງເປັນທາງການຄັ້ງນີ້ຖືເປັນບາດກ້າວອັນສໍາຄັນຕໍ່ການປະກອບສ່ວນຈັດຕັ້ງຜັນຂະຫຍາຍຄວາມຕັ້ງໃຈຂອງພັກ ແລະ ລັດຖະບານລາວທີ່ຢາກໃຫ້ມີທະນານຄານຄໍາຂຶ້ນ ເພື່ອປະຕິບັດພາລະບົດບາດໃນການສໍາຮອງຄໍາເພື່ອຄໍ້າປະກັນຄວາມໝັ້ນຄົງ ແລະສ້າງສະພາບຄ່ອງທາງດ້ານການເງິນ ແລະການຄັງຄໍ້າປະກັນຄ່າເງິນກີບໃຫ້ຢູ່ໃນລະດັບທີ່ໝັ້ນທ່ຽງອີກທັງຈະປະກອບສ່ວນການຍົກລະດັບມາດຕະຖານອຸດສາຫະກຳຄໍາລາວໃຫ້ໄດ້ໃນລະດັບສາກົນເພີ່ມພູນມູນຄ່າແກ່ຊັບພະຍາກອນໃຫ້ໄດ້ມູນຄ່າ ແລະປະໂຫຍດສູງສຸດສ້າງສະຖຽນລະພາບທາງດ້ານເສດຖະກິດໃຫ້ລາວເຮົານັບມື້ນັບເຂັ້ມແຂງ ແລະ ຂະຫຍາຍຕົວຢ່າງໝັ້ນຄົງຢືນຍົງສີວິໄລ.

ໂອກາດນີ້ ທ່ານ ປອ ຈັນທອນ ສິດທິໄຊ ຜູ້ອຳນວຍການໃຫຍ່ທະນາຄານຄໍາລາວ ໄດ້ກ່າວວ່າ: ການເປີດບໍລິການທະນາຄານຄໍາລາວຢ່າງເປັນທາງການຄັ້ງນີ້ໄດ້ສະແດງໃຫ້ເຫັນເຖິງຄວາມມຸ້ງໝັ້ນຕັ້ງໃຈ ແລະ ການຮ່ວມຈິດຮ່ວມໃຈອັນແຮງກ້າລະຫວ່າງພັກ-ລັດກັບປະຊາຊົນລາວໃນການສຸມສະຕິປັນຍາແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນທີ່ປະເທດເຮົາພວມປະເຊີນຢູ່ນີ້ໃຫ້ຄ່ອຍໆບັນເທົ່າ ແລະ ໝົດໄປໃນຕໍ່ໜ້າທ່ານກ່າວຕື່ມວ່າ: ເພື່ອເປັນການຮັບປະກັນການບໍລິການທີ່ໄດ້ມາດຕະຖານ ແລະ ເປັນມືອາຊີບທະນາຄານຄໍາລາວໄດ້ຮ່ວມມືກັບພາກສ່ວນທີ່ກ່ຽວຂ້ອງຂອງລັດຖະບານໂດຍສະເພາະກະຊວງການເງິນ ແລະທະນາຄານ ແຫ່ງ ສປປ ລາວ ພ້ອມກັບຄູ່ຮ່ວມມືຍຸດທະສາດດ້ານການຄ້າຈາກທັງພາຍ ແລະສາກົນກໍຄືບັນດາທະນາຄານ ສະຖາບັນການເງິນ ວິສາຫະກິດວັດຖຸມີຄ່າໃຫ້ມີຄວາມພ້ອມຮອບດ້ານບໍ່ວ່າຈະເປັນໃນດ້ານການຄຸ້ມຄອງບໍລິຫານຈັດການ ເຄື່ອງມືອຸປະກອນຕ່າງໆທີ່ທັນສະໄໝ ຕາມມາດຕະຖານທີ່ສາກົນຍອມຮັບ.

ໃນມື້ນີ້ທະນາຄານຄໍາລາວພ້ອມແລ້ວທີ່ຈະສະໜອງການຜະລິດຕະພັນ ແລະການບໍລິການທີ່ຫຼາກຫຼາຍ ແລະເຂົ້າເຖິງໄດ້ງ່າຍສູ່ສັງຄົມລາວເປັນຕົ້ນການເປີດບັນຊີຝາກຄໍາ ສິນເຊື່ອກູ້ຄໍາ ການອອກໃບຢັ້ງຢືນຄໍາ ເພື່ອນໍາໃຊ້ເປັນຫຼັກຊັບຄໍ້າປະກັນ ການຮັບຝາກຄໍາດ້ວຍຫ້ອງໝັ້ນຄົງເກັບຮັກ ສາ ແລະ ຕູ້ນິລະໄພຂຶ້ນສູງ ການຂົນສົ່ງວັດຖຸມີຄ່າຕະຫຼອດຮອດຕູ້ສະໜອງກົດຄໍາອັດຕະໂນມັດ ແລະ ອື່ນໆ ທີ່ພ້ອມໃຫ້ບໍລິການແກ່ສັງຄົມລາວແລ້ວນັບແຕ່ນີ້ເປັນຕົ້ນໄປ ນອກນີ້ໄດ້ກຽມພ້ອມທີ່ຈະສະໜອງອີກຫຼາກຫຼາຍຜະລິດຕະພັນເຊັ່ນການບໍລິການຄ້າຄໍາໃນ Digital Platform ລະດັບສາກົນ (International Gold Trading) ການກັ່ນຫຼອມຄໍາການປະເມີນມູນຄ່າແຮ່ຄໍາທີ່ຍັງບໍ່ໄດ້ຂຸດຄົ້ນເພື່ອຕີມູນຄ່າເປັນຊັບສິນປະກອບເຂົ້າງົບປະມານໃຫ້ລັດຖະບານ ແລະ ການສໍາຮອງຄໍາໃຫ້ປະເທດຊາດໃນອະນາຄົດຕໍ່ໜ້າ.

ພາຍຫຼັງສຳເລັດພິທີທີ່ຈັດຂຶ້ນທີ່ຕຶກສໍານັກງານທະນາຄານຄໍາລາວແລ້ວໄດ້ມີການສືບຕໍ່ສະເຫຼີມສະຫຼອງພິທີເປີດບໍລິການຢ່າງເປັນທາງການທີ່ໂຮງແຮມແລນມາກຣີເວີ້ໄຊ ໃຫ້ກຽດເຂົ້າຮ່ວມເປັນສັກຂີພິຍານໂດຍທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີບັນດາການນໍາພັກ-ລັດ ຕາງໜ້າຈາກບັນດາກະຊວງ ແລະອົງການຈັດຕັ້ງຕ່າງໆ ຄະນະນໍາຕາງໜ້າບັນດາທະນາຄານ ວິສາຫະກິດຜູ້ປະ ກອບການທີ່ເປັນຄູ່ຮ່ວມມືພັນທະມິດຂອງທະນາຄານຄໍາລາວຈາກທັງພາຍໃນ ແລະຕ່າງປະເທດຕະຫຼອດຮອດບັນດາລູກຄ້າຂອງທະນາຄານຄໍາລາວເຂົ້າຮ່ວມຢ່າງເບີກບານຟົດຟື້ນ.

ໃນພິທີດັ່ງກ່າວທະນາຄານຄໍາລາວໄດ້ມີການລົງນາມເຊັນສັນຍາຮ່ວມມືທາງດ້ານທຸລະກິດ ແລະຍຸດທະສາດກັບບັນດາທະນາຄານສະຖາບັນການເງິນ ແລະ ວິສາຫະກິດຜູ້ປະກອບການວັດຖຸມີຄ່າເພື່ອຮ່ວມກັນສ້າງປັດໄຈ ແລະ ກົນໄກການຮ່ວມມືເພື່ອເປັນພື້ນຖານອັນສໍາຄັນໃນການປະກອບສ່ວນສ້າງສາພັດທະນາປະເທດຮ່ວມກັນຕໍ່ໄປ.

ໂອກາດນີ້ທ່ານ ນາງ ວັດທະນາ ດາລາລອຍ ຮັກສາການຜູ້ວ່າການທະນາຄານແຫ່ງ ສປປ ລາວ ໄດ້ມີຄໍາເຫັນວ່າ: ທະນາຄານຄ້າລາວມີຄວາມສໍາຄັນໃນລະບົບເສດຖະກິດ ຈຶ່ງເຫັນດີໃຫ້ອະນຸຍາດດໍາເນີນທຸລະກິດທະນາຄານຄ້າເພື່ອເປັນອົງປະກອບໜຶ່ງໃນລະບົບການເງິນ-ເງິນຕາ ປະກອບສ່ວນຮັກສາສະຖຽນລະພາບດ້ານການເງິນ ແລະພັດທະນາເສດຖະກິດ-ສັງຄົມຂອງລາວ ເຊິ່ງທະນາຄານແຫ່ງ ສປ ປ ລາວ ເປັນຜູ້ຄຸ້ມຄອງມະຫາພາກກ່ຽວກັບການເປີດບໍລິ ການທະນາຄານຄໍາລາວຢ່າງເປັນທາງການຄັ້ງນີ້ເປັນໜຶ່ງໃນຂີດໝາຍອັນສໍາຄັນທີ່ສະແດງໃຫ້ເຫັນເຖິງເຈດຕະນາຄວາມມຸ່ງໝັ້ນຕັ້ງໃຈ ແລະການຮ່ວມແຮງຮ່ວມໃຈໃນການປະກອບສ່ວນພັດທະນາລະບົບສະຖາບັນການເງິນ-ການຄັງໃຫ້ມີຄວາມເຂັ້ມແຂງ ສາມາດເຊື່ອມໂຍງກັບພາກພື້ນ ແລະສາກົນອີກທັງເປັນການຊຸກຍູ້ກິດຈະກຳທາງດ້ານເສດຖະກິດໃຫ້ຂະຫຍາຍຕົວຢ່າງ ຕໍ່ເນື່ອງ ແລະໝັ້ນຄົງຍືນຍົງສອດຄ່ອງກັບແນວທາງນະໂຍບາຍພັດທະນາເສດຖະກິດ-ສັງຄົມຂອງພັກ ແລະ ລັດຖະບານທີ່ເປັນວາລະແຫ່ງຊາດໃຫ້ນັບມື້ນັບປາກົດຜົນເປັນຈິງ.

ທີ່ມາ: ວຽງຈັນໃໝ່

แชร์