ທົ່ວປະເທດ ປະຊາຊົນໄດ້ໃຊ້ໄຟຟ້າ 1,346,677 ຄອບຄົວ 95.57%

ທ່ານ ອາຄົມເດດ ວົງໄຊ ຜູ້ອໍານວຍການໃຫຍ່ ບໍລິສັດລັດວິສາຫະກິດໄຟຟ້າລາວ (ຟຟລ) ໄດ້ໃຫ້ສໍາພາດຕໍ່ນັກຂ່າວໜັງສືພິມປະຊາຊົນກ່ຽວກັບການເຕີບໃຫຍ່ຂອງ ຟຟລ ໃນແຕ່ລະໄລຍະໂດຍຫຍໍ້ ວ່າ: ຟຟລ ໄດ້ສ້າງຕັ້ງຂຶ້ນ ໃນປີ 1960 ໃນເບື້ອງຕົ້ນມີເຂື່ອນຂະໜາດນ້ອຍ ເຊັ່ນ: ເຂື່ອນເຊລະບຳ ແລະ ສ່ວນໃຫຍ່ ແມ່ນໃຊ້ເຄື່ອງຈັກປັ່ນໄຟຟ້າ, ຢູ່ວຽງຈັນກໍເຊັ່ນດຽວກັນ ນໍາໃຊ້ໂຮງປັ່ນໄຟທີ່ໃຊ້ນໍ້າມັນ, ເມື່ອຕົກມາຮອດ ປີ 1970 ຈຶ່ງມີເຂື່ອນໄຟຟ້າແຫ່ງທໍາອິດ ຄື: ເຂື່ອນ ໄຟຟ້ານໍ້າງື່ມ 1 ມີກຳລັງຕິດຕັ້ງ 30 ເມກາວັດ.

ໃນປີ 1975 ຂະບວນການຮັກຊາດລຸກຮືຂຶ້ນເພື່ອໂຄ່ນລົ້ມລະບອບເກົ່າ ໃນເຫດການດັ່ງກ່າວ ຂະບວນການຂອງພະນັກງານ, ກໍາມະກອນ ຟຟລ ໄດ້ເປັນຕົວແທນໃຫ້ຊົນຊັ້ນກໍາມະກອນ ລຸກຮືຂຶ້ນ ເຮັດໃຫ້ການນໍາຂອງ ຟຟລ ໄດ້ມີຜົນງານໂດດເດັ່ນ ແລະ ຫຼາຍທ່ານ ກໍໄດ້ ຮັບຄວາມໄວ້ເນື້ອເຊື່ອໃຈຈາກພັກ-ລັດ ໄດ້ກາຍມາເປັນການນໍາຫຼາຍທ່ານ.

ຂະບວນວິວັດແຫ່ງການສ້າງສາປະເທດຊາດ, ເພື່ອສະໜອງຄວາມຕ້ອງການໃຫ້ປະຊາຊົນ, ເພື່ອສະໜອງກະແສໄຟຟ້າລົງສູ່ຊົນນະບົດ, ສະໜອງໄຟຟ້າໃຫ້ແກ່ຊົນລະປະທານການກະເສດ, ການຜະລິດອຸດສາຫະກຳ ແລະ ສະໜອງນະໂຍບາຍ ເປັນແບັດເຕີຣີ (ໝໍ້ໄຟ) ອາຊຽນ. ພັກ-ລັດຖະບານໄດ້ ລົງທຶນໃສ່ຢ່າງມະຫາສານ ເພື່ອຄວາມສົມບູນພູນສຸກຂອງປະຊາຊົນ; ຈາກລະບອບເກົ່າ ປະຊາຊົນ ໄດ້ຊົມໃຊ້ໄຟຟ້າພຽງ 3% ປັດຈຸບັນ ປະຊາຊົນໄດ້ໃຊ້ໄຟຟ້າ ຈໍານວນ 1,346,677 ຄອບຄົວ ເທົ່າກັບ 95.57% ໃນທົ່ວປະເທດ ໃນນັ້ນ ເມືອງທີ່ຊົມໃຊ້ໄຟຟ້າ ຈໍານວນ 148 ເມືອງ ເທົ່າກັບ 100%, ບ້ານ ທີ່ຊົມໃຊ້ໄຟຟ້າ ຈໍານວນ 8,040 ບ້ານ ເທົ່າກັບ 94.51% ຊຶ່ງທຽບໃສ່ ໃນປະເທດ ອາຊຽນ ແລະ ໃນໂລກ ປະເທດລາວເຮົາ ຖືວ່າຈັດໃນລະດັບດີພໍສົມຄວນ ອັນນີ້ແມ່ນຢັ້ງຢືນວ່ານະໂຍບາຍ ພັກ-ລັດ ແມ່ນແກ້ໄຂຄວາມທຸກຍາກ ໃຫ້ປະຊາຊົນຢ່າງແທ້ຈິງ. ພາຍໃຕ້ການນໍາພາຂອງການນໍາແຕ່ລະສະໄໝ. ປັດຈຸບັນ ຟຟລ ມີພະນັກງານ ກຳມະກອນ ຈໍານວນ 5,619 ຄົນ ຍິງ 1,125 ຄົນ; ມີ ສາຂາ ຈໍານວນ 19 ສາຂາແຂວງ ທົ່ວປະເທດ ເຮັດໜ້າທີ່ສະໜອງ ບໍລິການໄຟຟ້າ ໃນທົ່ວປະເທດ ແລະ ສົ່ງຂາຍອອກຕ່າງປະເທດ. ແຕ່ມື້ສ້າງຕັ້ງຮອດປັດຈຸບັນ ມີ ຜູ້ອໍານວຍການ ມາແລ້ວ 13 ທ່ານ.

ທ່ານ ກ່າວຕື່ມອີກວ່າ: ຕໍ່ກັບຫາງສຽງສັງຄົມ ແລະ ສະພາບຄວາມເປັນຈິງ ທີ່ວ່າ ຟຟລ ບໍ່ມີປະສິດທິຜົນ ທັ້ງທີ່ເປັນລັດວິສາຫະກິດຂະໜາດໃຫຍ່ ແລະ ມີໜີ້ສິນຫຼວງຫຼາຍ. ຄືດັ່ງ ໄດ້ເວົ້າມານັ້ນ ວ່າລັດໄດ້ລົງທຶນຫຼາຍທີ່ສຸດ ເພື່ອໃຫ້ປະຊາຊົນໄດ້ຊົມໃຊ້ໄຟຟ້າໄປທົ່ວປະເທດ, ສາຍສົ່ງໄກປານໃດ ກໍຕ້ອງລົງທຶນ ຈຶ່ງມີບາງກໍລະນີ ອາດບໍ່ມີປະສິດທິຜົນທາງເສດຖະກິດ ແຕ່ມີປະສິດທິຜົນທາງດ້ານສະຖຽນລະພາບ, ດ້ານຄວາມສະຫງົບ ໃຫ້ປະຊາຊົນຫຼຸດພົ້ນຈາກຄວາມທຸກຍາກ. ສະນັ້ນ, ຈຶ່ງເກີດມີໜີ້ສິນຫຼາຍ ເພາະໄດ້ລົງທຶນ ເພື່ອແກ້ໄຂໃຫ້ປະຊາຊົນ ທີ່ອາໄສຢູ່ເຂດຫ່າງໄກສອກຫຼີກໄດ້ຊົມໃຊ້ໄຟຟ້າ. ສະນັ້ນ, ຈຶ່ງກະທົບໃສ່ກະແສລາຍຮັບ-ລາຍຈ່າຍ ຂອງບໍລິສັດ ແຕ່ໄລຍະກາງ ໄລຍະຍາວກໍຈະສາມາດແກ້ໄຂໄດ້.

ທ່ານໄດ້ກ່າວອີກວ່າ: ສໍາລັບນະໂຍບາຍທີ່ຈະຟື້ນຟູ ຟຟລ ແລະ ເຮັດໃຫ້ ຟຟລ ເປັນລັດວິສາຫະກິດນໍາທາງ ຕາມນະໂຍບາຍຂອງພັກ ແລະ ລັດ ນັ້ນ ຊຶ່ງສະພາບປັດຈຸບັນ ຟຟລ ມີຄວາມຫຍຸ້ງຍາກຫຼາຍ ໂດຍສະເພາະ ທາງດ້ານການດໍາເນີນທຸລະກິດ ແລະ ຄວາມເຊື່ອໝັ້ນຈາກສັງຄົມ ແລະ ຄວາມເຊື່ອຖືຕໍ່ສະຖາບັນການເງິນບໍ່ສູງ. ແຕ່ເບິ່ງພາບລວມ ຖານະໜີ້ສິນຕໍ່ຊັບສິນຍັງບໍ່ເຖິງຂັ້ນວ່າແກ້ບໍ່ໄດ້. ທັງໝົດນີ້ ແມ່ນໜ້າທີ່ຂອງພວກເຮົາທີ່ຂັ້ນເທິງໄດ້ມອບໝາຍໃຫ້ ຕ້ອງຮ່ວມກັບໝູ່ຄະນະ ພະນັກງານໃນທຸກຂັ້ນ, ອົງການພັກ, ອົງການຈັດຕັ້ງມະຫາຊົນ ຈະພ້ອມກັນແກ້ໄຂ ຊຶ່ງກ່ອນອື່ນໝົດຈະໄດ້ເຮັດ 3 ວຽກໄປພ້ອມໆກັນຄື: 1. ຟື້ນຟູ ເສີມຂະຫຍາຍມູນເຊື້ອ ຂອງ ຟຟລ ມູນເຊື້ອການຕໍ່ສູ້ ຂອງພະນັກງານ-ກຳມະກອນ ມາຮ່ວມກັນຟື້ນຟູ ຟຟລ, 2. ຮັກສາສະຖຽນລະພາບຄວາມສະຫງົບພາຍໃນ ໃນທຸກຂະແໜງການ ທັງສູນກາງ ແລະ ທ້ອງຖິ່ນ, ພັກເປັນແກນນໍາ ສະມາຊິກພັກ ເປັນຕົວແບບ ແລະ ນໍາພາໃນທຸກຂະບວນການ. ຄວບຄຸມທຸກການໃຊ້ຈ່າຍ ຕາມນະໂຍບາຍປະຢັດ ມີປະສິດທິຜົນ, ຄວບຄຸມການຈັດຊື້ຈັດ-ຈັດຈ້າງ ໂປ່ງໃສກວດສອບໄດ້ ແລະ ເຄັ່ງຄັດຕາມລະບຽບການຂອງລັດ ທຸກປະການ, ຄວບຄຸມການຕົກເຮ່ຍຂອງກະແສໄຟຟ້າໃຫ້ຫຼຸດລົງ, ຫຼຸດຜ່ອນການນໍາເຂົ້າກະແສໄຟຟ້າ ດ້ວຍການຂະຫຍາຍກໍາລັງການຜະລິດ. ສະຫຼຸບແລ້ວຈະຕ້ອງຄວບຄຸມລາຍຈ່າຍ ແລະ ຊອກວິທີເພີ່ມລາຍຮັບ ແລະ 3. ໄດ້ມີມາດຕະການສະເໜີ ໃຫ້ລັດຖະບານ ແກ້ໄຂບາງນະໂຍບາຍ ທີ່ບໍ່ຢູ່ໃນສິດອຳນາດ ຂອງ ຟຟລ, ຖ້າພວກເຮົາແກ້ໄດ້ໃນ ຂໍ້ 2 ແລະ ລັດຖະບານ ແກ້ໄຂໃຫ້ ໃນຂໍ້ 3 ພວກເຮົາ ຈະຄອ່ຍແກ້ໄຂຂໍ້ຄົງຄ້າງທີ່ຜ່ານມານັ້ນໄດ້ ແລະ ເຊື່ອໝັ້ນວ່າ ໄຟຟ້າລາວມີມູນເຊື້ອທີ່ເຂັ້ມແຂງ ມີຄວາມເປັນເອກະພາບໃນທຸກຂັ້ນ ແນ່ນອນວ່າ ຟຟລ ຈະຜ່ານຜ່າໄດ້ ເຮັດໃຫ້ ຟຟລ ເຕີບໃຫຍ່ ແລະ ເປັນເຈົ້າພາທາງຂອງລັດວິສາຫະກິດ.

ເນື່ອງໃນໂອກາດວັນຊາດທີ 2 ທັນວາ ຊຶ່ງປີນີ້ກໍຄົບຮອບ 49 ປີ (2 ທັນວາ 1975 - 2 ທັນວາ 2024) ໃນຖານະການນໍາຂອງ ຟຟລ ຂໍຕາງໜ້າໃຫ້ ທຸກອົງການຈັດຕັ້ງ ເຊັ່ນ: ສະພາບໍລິຫານ, ຄະນະພັກຮາກຖານພັກ, ຄະນະໜ່ວຍພັກ ອົງການຈັດຕັ້ງມະຫາຊົນເຊັ່ນ: ກຳມະບານ, ຊາວໜຸ່ມ, ແມ່ຍິງ ແລະ ພະນັກງານ-ກຳມະກອນ ຂໍຊົມເຊີຍ ຢ່າງສຸດໃຈ ຕໍ່ທຸກໄຊຊະນະ ທຸກຜົນສໍາເລັດ ໃນໄລຍະ 49 ປີ, ຂໍອວຍພອນໃຫ້ການນໍາພັກ-ລັດ ທຸກທ່ານ; ພະນັກງານອາວຸໂສບໍານານ ປະຊາຊົນລາວບັນດາເຜົ່າ ຈົ່ງມີສຸຂະພາບແຂງແຮງ ຊີ້ນໍາ-ນໍາພາປະເທດຊາດ ກ້າວສູ່ຄວາມຈະເລີນ ສີວິໄລ ປະຊາຊົນ ມີຊີວິດທີ່ດີ ໃນທຸກໆດ້ານ.
ຂໍ້ມູນ: ຟຟລ

แชร์