ປີ 2025 ອົງການກວດສອບແຫ່ງລັດ ຈະກວດສອບໃຫ້ໄດ້ 154 ເປົ້າໝາຍ

ທ່ານ ວຽງທະວີສອນ ເທບພະຈັນ ປະທານອົງການກວດສອບແຫ່ງລັດ ໄດ້ລາຍງານການຈັດຕັ້ງປະຕິບັດແຜນການ ປະຈໍາປີ 2024 ແລະແຜນການ ປະຈໍາປີ 2025; ຜົນການກວດສອບປະຈຳປີ 2024 ຂອງອົງການກວດສອບແຫ່ງລັດຕໍ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 27 ພະຈິກ ວ່າ: ໃນປີ 2024 ນີ້ ອົງການກວດສອບແຫ່ງລັດ ປະຕິບັດການກວດສອບໄດ້ 120 ເປົ້າໝາຍ ເທົ່າກັບ 102,56% ຂອງແຜນການ, ພ້ອມນັ້ນ ໄດ້ລົງຕິດຕາມຊຸກຍູ້ການແກ້ໄຂຜົນການກວດສອບ 23 ເປົ້າໝາຍ. ໃນນັ້ນ, ກວດສອບວິສາຫະກິດ 15 ເປົ້າໝາຍ ແລະກວດສອບອົງການຈັດຕັ້ງລັດ 8 ເປົ້າໝາຍ.

ສໍາລັບເປົ້າໝາຍອື່ນໆ ທີ່ບໍ່ໄດ້ອອກໜັງສືແຈ້ງຕອບເປັນລາຍລັກອັກສອນ ແມ່ນໄດ້ດໍາເນີນການກວດສອບຄືນຕາມແຜນກວດສອບປະຈໍາປີ ຈໍານວນ 86 ເປົ້າໝາຍ. ໃນນັ້ນ, ກົມກວດສອບອົງການຈັດຕັ້ງລັດ 19 ເປົ້າໝາຍ, ກົມກວດສອບທະນາຄານ 10 ເປົ້າໝາຍ, ກົມກວດສອບວິສາຫະກິດ 10 ເປົ້າໝາຍ, ກົມກວດສອບໂຄງການ 11 ເປົ້າໝາຍ, ອົງການກວດສອບປະຈໍາພາກເໜືອ 1 ຈໍານວນ 8 ເປົ້າໝາຍ, ອົງການກວດສອບປະຈໍາພາກເໜືອ 2 ຈໍານວນ 9 ເປົ້າໝາຍ, ອົງການກວດສອບປະຈໍາພາກກາງ 1 ຈໍານວນ 9 ເປົ້າໝາຍ, ອົງການກວດສອບປະຈໍາພາກກາງ 2 ຈໍານວນ 5 ເປົ້າໝາຍ ແລະ ອົງການກວດສອບປະຈໍາພາກໃຕ້ 5 ເປົ້າໝາຍ. ພ້ອມນັ້ນ, ອົງການກວດສອບແຫ່ງລັດ ໄດ້ອອກຄໍາແນະນໍາວ່າດ້ວຍການແກ້ໄຂຜົນການກວດສອບ ສະບັບເລກທີ 1329/ອກສລ, ລົງວັນທີ 26 ສິງຫາ 2024 ຊຶ່ງໄດ້ກໍານົດເນື້ອໃນ, ຫຼັກການ ແລະ ວິທີການແກ້ໄຂຜົນການກວດສອບເປັນແຕ່ລະກໍລະນີ ຕິດພັນກັບການແກ້ໄຂບັນຫາທີ່ຄຸມເຄືອສະສົມມາຫຼາຍປີຄື: ໜີ້ຕ້ອງຮັບສ່ວຍສາອາກອນ ແລະ ຊັບສິນ; ລາຍຈ່າຍລ່ວງໜ້າ ໃນລະບົບຄັງເງິນແຫ່ງຊາດ; ໜີ້ຕ້ອງສົ່ງ ຫຼື ໜີ້ຄ້າງຊໍາລະ ແລະ ຍອດເງິນຄ້າງໃນບັນຊີເງິນຝາກຄັງເງິນແຫ່ງຊາດ; ໄດ້ແຕ່ງຕັ້ງຄະນະລະດັບຕ່າງໆ ລົງຕິດຕາມ, ຊຸກຍູ້ ການແກ້ໄຂຜົນການກວດສອບ ຢູ່ເປົ້າໝາຍຈຳນວນໜຶ່ງ ເພື່ອຕິດຕາມຄວາມຄືບໜ້າໃນການແກ້ໄຂຜົນການກວດສອບເປັນແຕ່ລະໄລຍະ; ໄດ້ປະສານສົມທົບ ກັບເປົ້າໝາຍຖືກກວດສອບ ແລະ ອົງການຄຸ້ມຄອງເປົ້າໝາຍ ເພື່ອຊຸກຍູ້, ຕິດຕາມການແກ້ໄຂຜົນການກວດສອບ ເປັນປົກກະຕິຜ່ານກົນໄກການເຊັນບົດບັນທຶກ ແລະ ແຜນວາດລະອຽດການແກ້ໄຂຜົນການກວດສອບຮ່ວມກັນ.

ທ່ານ ວຽງທະວີສອນ ເທບພະຈັນ ໃຫ້ຮູ້ຕື່ມວ່າ: ແຜນການ ປະຈໍາປີ 2025 ນີ້, ອົງການກວດສອບແຫ່ງລັດ ຈະດໍາເນີນການເຄື່ອນໄຫວວຽກງານກວດສອບໃຫ້ໄດ້ 154 ເປົ້າໝາຍ. ໃນນັ້ນ, ຈະກວດສອບອົງການຈັດຕັ້ງລັດ 28 ເປົ້າໝາຍ, ກວດສອບທະນາຄານ 15 ເປົ້າໝາຍ, ກວດສອບວິສາຫະກິດ 15 ເປົ້າໝາຍ, ກວດສອບໂຄງການ 18 ເປົ້າໝາຍ, ອົງການກວດສອບປະຈໍາພາກເໜືອ 1 ຈໍານວນ 16 ເປົ້າໝາຍ, ອົງການກວດສອບປະຈໍາພາກເໜືອ 2 ຈໍານວນ 12 ເປົ້າໝາຍ, ອົງການກວດສອບປະຈໍາພາກກາງ 1 ຈໍານວນ 18 ເປົ້າໝາຍ, ອົງການກວດສອບປະຈໍາພາກກາງ 2 ຈໍານວນ 12 ເປົ້າໝາຍ ແລະອົງການກວດສອບປະຈໍາພາກໃຕ້ ຈໍານວນ 20 ເປົ້າໝາຍ.

แชร์