ມອບທຶນສົ່ງເສີມລ້ຽງສັດ ແລະ ຜະລິດເຂົ້າໜົມແປ້ງມັນຕົ້ນໃຫ້ 3 ແຂວງ

   ໃນວັນທີ 26 ເມສາ 2019 ທີ່ ກະຊວງແຮງງານ ແລະສະຫວັດດີການໄດ້ມີພິທີມອບ-ຮັບທຶນຈຳນວນ 790,8 ລ້ານກີບ ໃຫ້ກັບ 3 ແຂວງ ຊຶ່ງເຂົ້າຮ່ວມ ມີທ່ານ ນາງ ໃບຄຳ ຂັດທິຍະ ຮອງລັດຖະມົນຕີກະຊວງແຮງງານ ແລະສະຫວັດດີການສັງຄົມ (ຮສສ), ທ່ານ ຕະຄາ ຮິໂຣ ຊຸເອະນະກະເລຂາໂທສະຖານເອກ ອັກຄະຣາຊະທູດຍີ່ປຸ່ນປະຈຳລາວ, ຕາງໜ້າກະຊວງມອບໂດຍທ່ານ ວົງຄຳ ພັນທະນຸວົງ ຮອງຫົວໜ້າກົມສັງຄົມສົງເຄາະ ແລະ ຕາງໜ້າແຂວງເຊັນຮັບແມ່ນ ທ່ານ ໜູພອນ ໄຊປັນຍາຈິດ ຮອງຫົວໜ້າພະແນກ ຮສສ ແຂວງໄຊຍະບູລີ, ທ່ານ ສຸດາໄລ ອິນດາວົງ ຮັກສາການຫົວໜ້າພະແນກ ຮສສ ແຂວງສາລະວັນ ແລະ ທ່ານ ຍົມສອນ ຫົວໜ້າພະແນກ ຮສສ ແຂວງວຽງຈັນ

  ທ່ານ ວົງຄຳ ພັນທະນຸວົງ ກ່າວວ່າ: ໂດຍອີງຕາມຄວາມຮຽກຮ້ອງຕ້ອງການດ້ານການປັບປຸງຊີວິດການເປັນຢູ່ຂອງປະຊາຊົນຜູ້ທີ່ທຸກຍາກຂາດເຂີນ, ຂາດ ໂອກາດໃນການສ້າງອາຊີບ ແລະລາຍຮັບໃຫ້ແກ່ຄອບຄົວຂອງແຂວງດັ່ງກ່າວກໍຄືການສະເໜີຈັດຕັ້ງປະຕິບັດໂຄງການສົ່ງເສີມການລ້ຽງສັດຢູ່ແຂວງໄຊຍະບູລີ ແລະແຂວງສາລະວັນ, ໂຄງການສົ່ງເສີມການຜະລິດເຂົ້າໜົມແປ້ງມັນຕົ້ນຂອງແຂວງວຽງຈັນ, ສະນັ້ນກົມສັງຄົມສົງເຄາະໃນນາມເປັນເສນາທິການໃຫ້ແກ່ຄະນະນຳກະຊວງໄດ້ເປັນເຈົ້າ ການສົມທົບກັບຄະນະຮັບຜິດຊອບກອງ ທຶນເພື່ອນຮ່ວມງານ (KR1) ຄົ້ນຄວ້າ-ປະເມີນບົດສະເໜີໂຄງການຂອງ 3 ແຂວງ ແລະລາຍງງານຄະນະນຳກະຊວງ ຮສສ ເພື່ອເອົາເຂົ້າແຜນງົບປະມານປະຈຳປີ 2019 ຂອງຂະແໜງ ຮສສ ສະເໜີລັດຖະບານພ້ອມທັງສະເໜີຝ່າຍລັດຖະ ບານຍີ່ປຸ່ນ ໂດຍຜ່ານທາງການທູດ ແລະ ໄດ້ຮັບອະນຸມັດງົບດັ່ງກ່າວເພື່ອຈັດຕັ້ງປະຕິບັດໂຄງການດັ່ງກ່າວຊຶ່ງປະກອບມີໂຄງການສົ່ງເສີມການລ້ຽງສັດຢູ່ບ້ານແກ້ງແຂວງໄຊຍະບູລີ 283 ລ້ານກີບ, ໂຄງການລ້ຽງສັດຢູ່ບ້ານວັດກາງເມືອງ ແລະແຂວງສາລະວັນ, ມູນຄ່າ 372,1 ລ້ານກີບ ແລະໂຄງການສ້າງໂຮງງານຜະລິດເຂົ້າໜົມແປ້ງມັນຕົ້ນຢູ່ບ້ານປ່ອງຊ່ອງ, ເມືອງຫີນເຫີບ ແຂວງວຽງຈັນ ມູນຄ່າ 135,7 ລ້ານກີບ.

  ທ່ານ ສຸດາໄລ ອິນດາວົງ ຕາງໜ້າພະແນກ ຮສສ 3 ແຂວງ ກ່າວວ່າ: ເງິນຈຳນວນ 790,8 ລ້ານກີບ ທີ່ໄດ້ໃນຄັ້ງນີ້ບັນດາແຂວງແມ່ນຈະນຳໄປຈັດຕັ້ງໃຫ້ຮອດໃຫ້ເຖິງກຸ່ມເປົ້າໝາຍ ແລະ ໃຫ້ມີຄວາມຍືນຍົງທີ່ສຸດແນໃສ່ເຮັດໃຫ້ປະຊາຊົນມີຊີວິດການເປັນຢູ່ທີ່ດີຂຶ້ນ ແລະ ສາມາດນຳພາຄອບຄົວຫຼຸດພົ້ນອອກຈາກ ຄວາມທຸກຍາກ ແລະທີ່ສຳຄັນຂອບໃຈມາຍັງລັດຖະບານຍີ່ປຸ່ນທີ່ໄດ້ໃຫ້ການສະໜັບສະໜູນທຶນຮອນ, ຕາງໜ້າໃຫ້ພະແນກ ຮສສ ທັງ 3 ແຂວງ ໃຫ້ຄຳໝັ້ນ ວ່າຈະນຳໃຊ້ທຸກເມັດເງິນໃຫ້ເກີດດອກອອກຜົນຫຼາຍເທົ່າທີ່ຈະຫຼາຍໄດ້.

ພາບຂ່າວ: ພິມພອນ

แชร์