ມອບ-ຮັບໜ້າທີ່ຫົວໜ້າກອງຄຸ້ມຄອງພາສີ 1

  ບໍ່ດົນຜ່ານມານີ້ພະແນກການເງິນແຂວງຫຼວງນໍ້າທາໄດ້ຈັດພິທີມອບ-ຮັບໜ້າ ທີ່ຫົວໜ້າກອງຄຸ້ມຄອງພາສີ 1 ລະຫວ່າງຜູ້ເກົ່າ ແລະຜູ້ໃໝ່ທີ່ແຂວງຫຼວງນໍ້າທາ ໂດຍມີທ່ານ ອ່ອນຈັນ ຄໍາພາວົງ ຫົວໜ້າພະແນກການເງິນແຂວງຕະຫຼອດຮອດຂະແໜງການທີ່ກ່ຽວຂ້ອງ ແລະ ພະນັກງານພາສີເຂົ້າຮ່ວມເປັນສັກຂີພິຍານ.

  ການມອບ-ຮັບດັ່ງກ່າວແມ່ນເພື່ອປະຕິບັດຕາມຂໍ້ຕົກລົງສະບັບເລກທີ 1001/ກງ ວ່າດ້ວຍການຍົກຍ້າຍ ແລະ ແຕ່ງຕັ້ງພະນັກງານຮັບໜ້າທີ່ໃໝ່ຢູ່ກອງຄຸ້ມຄອງພາສີ 1 ອີງຕາມກົດໝາຍວ່າດ້ວຍພະນັກງານລັດຖະກອນສະບັບເລກທີ 74/ສພຊ ລົງວັນທີ 18 ທັນວາ 2015 ແລະ ດໍາລັດຂອງນາຍົກລັດຖະ ມົນຕີວ່າດ້ວຍການຈັດຕັ້ງ ແລະການເຄື່ອນໄຫວຂອງກະຊວງການເງິນສະບັບເລກທີ 144/ນຍ ລົງວັນທີ 8 ພຶດສະພາ 2017 ລັດຖະມົນຕີກະຊວງການເງິນຕົກລົງຍົກຍ້າຍທ່ານ ພູວຽງ ແກ້ວມີໄຊ ຫົວໜ້າກອງຄຸ້ມຄອງພາສີ 1, ໄປຮັບໜ້າທີ່ໃໝ່ຢູ່ກົມພາສີ ແລະແຕ່ງຕັ້ງທ່ານ ບຸນເກີດ ສຸວັນນະເສນ ຫົວໜ້າພະ ແນກຈັດຕັ້ງ, ບໍລິຫານ ແລະການເງິນກົມພາສີເປັນຫົວໜ້າກອງຄຸ້ມຄອງພາສີ 1 ໃໝ່ທີ່ແຂວງຫຼວງນໍ້າທາ.

ພາບຂ່າວ: ມຸນຕີ

แชร์