ລັດຖະມົນຕີກະຊວງປ້ອງກັນປະເທດລາວ-ຣັດເຊຍ ຮ່ວມພົບປະສອງຝ່າຍ
ໃນວັນທີ 20 ພະຈິກ 2024 ສະຫາຍ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ໄດ້ພົບປະສອງຝ່າຍ ກັບ ສະຫາຍ ພົນໂທ ອາເລັກຊັນເດີ ໂຟມິນ ຮອງລັດຖະມົນຕີກະຊວງປ້ອງກັນປະເທດ ແຫ່ງ ສະຫະພັນ ຣັດເຊຍ ໃນໂອກາດທີ່ຄະນະຜູ້ແທນດັ່ງກ່າວ ເດີນທາງມາເຂົ້າຮ່ວມກອງປະຊຸມ ລັດຖະມົນຕີກະຊວງປ້ອງກັນປະເທດ ບັນ ດາ ປະເທດອາຊຽນ-ບວກ ຄັ້ງທີ 11 ທີ່ນະຄອນຫຼວງວຽງຈັນ ສປປ ລາວ.
ການພົບປະໃນຄັ້ງນີ້, ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ, ການຮ່ວມມືອັນເປັນມູນເຊື້ອມາແຕ່ດົນນານ ແລະ ໄດ້ຮັບການສືບຕໍ່ເພີ່ມທະວີຮັດແໜ້ນ ແລະ ເສີມຂະຫຍາຍໃຫ້ນັບມື້ຈະ ເລີນງອກງາມ ແລະ ເລິກເຊິ່ງ ລະຫວ່າງ ສອງກອງທັບລາວ-ຣັດເຊຍ, ຣັດເຊຍ-ລາວ. ພ້ອມກັນນີ້, ສອງຝ່າຍຍັງໄດ້ຕີລາຄາຄືນ ເຖິງຜົນສຳເລັດຂອງການຮ່ວມມືທາງດ້ານທະຫານ ໃນໄລຍະຜ່ານມາ ແລະ ປຶກ ສາຫາລືແຜນການຮ່ວມມືໃນຕໍ່ໜ້າ.
ໂອກາດນີ້, ສະຫາຍ ພົນເອກ ຈັນສະໝອນ ຈັນຍາລາດ ຕາງໜ້າໃຫ້ແກ່ກອງທັບ ແລະ ລັດຖະ ບານ ສະແດງຄວາມຮູ້ບຸນຄຸນຢ່າງສູງມາຍັງລັດຖະບານ ກໍຄື ກະຊວງປ້ອງກັນປະເທດ ແຫ່ງ ສະຫະພັນ ຣັດເຊຍ ທີ່ໄດ້ໃຫ້ການຊ່ວຍເຫລືອອັນລໍ້າຄ່າແກ່ ສປປ ລາວ ກໍຄື ກອງທັບປະຊາຊົນລາວ ໃນຫລາຍດ້ານຕະຫລອດໄລຍະຜ່ານມາ ເປັນຕົ້ນ ການສ້າງພະນັກງານວິຊາການ-ວິຊາສະເພາະ ຂະແໜງການຕ່າງໆ ຢູ່ບັນດາໂຮງຮຽນຂອງກະຊວງປ້ອງກັນປະເທດ ສ ຣັດເຊຍ, ການຮ່ວມມືວຽກງານກວດກູ້ລະ ເບີດເພື່ອມະນຸດສະທຳ ຢູ່ ສປປ ລາວ ແລະ ດ້ານອື່ນໆ ເຊິ່ງເປັນການປະກອບສ່ວນເຂົ້າໃນປົກປັກຮັກ ສາ ແລະ ສ້າງສາພັດທະນາປະເທດຊາດ ກໍຄື ສ້າງກອງທັບປະຊາຊົນລາວ ໃຫ້ເຕີບໃຫຍ່ເຂັ້ມແຂງ ແລະ ທັນສະໄໝເປັນກ້າວໆ.
ທີ່ມາ: ຂປລ.
