ໂອກາດນີ້, ທ່ານ ພົນເອກ ຈັນສະໝອນ ຈັນຍາລາດ ໄດ້ກ່າວສະແດງຄວາມຕ້ອນຮັບບັນດາທ່ານຜູ້ແທນທີ່ເຂົ້າຮ່ວມ ກອງປະຊຸມລັດຖະມົນຕີປ້ອງກັນປະເທດອາຊຽນ-ບວກ (ADMM-ບວກ) ຄັ້ງທີ 11, ສະແດງຄວາມຊົມເຊີຍ ມາຍັງລັດຖະມົນຕີປ້ອງກັນປະເທດຈີນ, ຍີ່ປຸ່ນ, ມາເລເຊຍ, ນິວຊີແລນ, ສ ເກົາຫຼີ ແລະ ຣາຊະອານາຈັກໄທ ທີ່ໄດ້ເຂົ້າຮ່ວມກອງປະຊຸມ ADMM-ບວກ ເປັນຄັ້ງທໍາອິດ ແລະ ຖືໂອກາດນີ້, ສະແດງຄວາມຊົມເຊີຍ ອິນໂດເນເຊຍ ທີ່ໄດ້ເຮັດສໍາເລັດການເປັນປະທານກອງປະຊຸມ ADMM-ບວກ ຄັ້ງທີ 10 ໃນປີ 2023 ຢ່າງຈົບງາມ ແລະ ຈະສາມາດສືບຕໍ່ຜົນສໍາເລັດ ຂອງອິນໂດເນເຊຍ ໃນປີຜ່ານມາ.

ກອງປະຊຸມ ADMM-ບວກ ຄັ້ງທີ 11 ໃນມື້ນີ້ ໄດ້ດໍາເນີນພາຍໃຕ້ ຫົວຂໍ້ “ຮ່ວມມືກັນເພື່ອສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງ ຂອງອາຊຽນ”. ກອງປະຊຸມຄັ້ງນີ້, ໄດ້ຈັດຂຶ້ນທ່າມກາງສະພາບການຂອງໂລກ ແລະ ພາກພື້ນ ມີຄວາມຫຍຸ້ງຍາກສັບສົນ, ສະລັບສັບຊ້ອນ ແລະ ຍາກທີ່ຈະຄາດຄະເນໄດ້. ມີຫຼາຍພາກພື້ນໃນໂລກກໍາລັງປະເຊີນໜ້າກັບຄວາມໝັ້ນຄົງທາງການທະຫານ ແລະ ບໍ່ແມ່ນທາງການທະຫານ ທີ່ສົ່ງຜົນກະທົບຕໍ່ຊີວິດ ແລະ ຊັບສິນ ຂອງປະຊາຊົນ ກໍຄື ການພັດທະນາເສດຖະກິດ-ສັງຄົມ ໂດຍລວມ.

ດັ່ງນັ້ນ, ຈຶ່ງເປັນໂອກາດທີ່ດີ ທີ່ບັນດາທ່ານລັດຖະມົນຕີປ້ອງກັນປະເທດ ໄດ້ມາພົບກັນ ເພື່ອປຶກສາຫາລື ແລະ ແລກປ່ຽນສະພາບກ່ຽວກັບຄວາມໝັ້ນຄົງຂອງພາກພື້ນ ແລະ ສາກົນ ເພື່ອເສີມຂະຫຍາຍການຮ່ວມມື ດ້ານວຽກງານປ້ອງກັນຊາດ ແລະ ຄວາມໝັ້ນຄົງ, ສົ່ງເສີມຄວາມເຂົ້າໃຈ ແລະ ແລະ ຄວາມໄວ້ວາງໃຈຊຶ່ງກັນ ແລະ ກັນ ເພື່ອປະກອບສ່ວນເຂົ້າໃນການປົກປັກຮັກສາ ແລະ ສ້າງສາສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງ ຂອງພາກພື້ນ ແລະ ສາກົນ. ຫວັງຢ່າງຍິ່ງວ່າ ບັນດາທ່ານຈະສະໜັບສະໜູນ ແລະ ປະກອບສ່ວນ ເພື່ອເຮັດໃຫ້ກອງປະຊຸມໃນຄັ້ງນີ້ ສາມາດບັນລຸຜົນສໍາເລັດຕາມການມອບໝາຍ.

ໃນຕອນທ້າຍ, ທ່ານ ພົນເອກ ຈັນສະໝອນ ຈັນຍາລາດ ກ່າວຕື່ມວ່າ: ສະແດງຄວາມຍິນດີ ທີ່ແຜນການສາມປີ ຂອງໜ່ວຍງານຜູ້ຊ່ຽວຊານ ກອງປະຊຸມ ADMM-ບວກ ໄດ້ຖືກຮັບຮອງ, ແຜນການດັ່ງກ່າວ ຈະເປັນບາດກ້າວສໍາຄັນໜຶ່ງ ສົ່ງເສີມການຮ່ວມມືທີ່ເປັນຮູບປະທໍາ ແລະ ການສ້າງຂີດຄວາມສາມາດ ຂອງບັນດາປະເທດສະມາຊິກ. ປີ 2024 ນີ້, ສປປ ລາວ ໄດ້ຮັບກຽດເປັນປະທານອາຊຽນ ຊຶ່ງກະຊວງປ້ອງກັນປະເທດ ແຫ່ງ ສປປ ລາວ ຮັບໜ້າທີ່ເປັນເຈົ້າພາບ ແລະ ປະທານກອງປະຊຸມລັດຖະມົນຕີປ້ອງກັນປະເທດອາຊຽນ, ອາຊຽນບວກ ແລະ ບັນດາກອງປະຊຸມປິ່ນອ້ອມອື່ນໆ. ຖືໂອກາດນີ້ ສະແດງຄວາມຂອບໃຈຢ່າງຈິງໃຈມາຍັງບັນດາປະເທດສະມາຊິກອາຊຽນ, ອາຊຽນ-ບວກ, ຕີມໍແລັດສະເຕ ແລະ ກອງເລຂາອາຊຽນ ທີ່ໄດ້ໃຫ້ການສະໜັບສະໜູນ, ຊ່ວຍເຫຼືອ ແລະ ການປະກອບສ່ວນຢ່າງຕັ້ງໜ້າ ໃຫ້ແກ່ການເປັນປະທານອາຊຽນ ຂອງ ສປປ ລາວ ເວົ້າລວມ, ເວົ້າສະເພາະ ຂອງກະຊວງປ້ອງກັນປະເທດ ຂອງ ສປປ ລາວ.

ຂ່າວ-ພາບ: ບຸນຕອມ, ແສງຈັນ