ປະກາດການຈັດຕັ້ງພະນັກງານ-ນໍາພາຄຸ້ມຄອງຂັ້ນສູງຂອງເມືອງອາດສະພັງທອງ ແຂວງສະຫວັນນະເຂດ

ໃນວັນທີ 21 ພະຈິກ 2024 ນີ້ ທີ່ສະໂມສອນຂອງແຕ່ລະເມືອງ, ໄດ້ມີພິທີປະກາດການຈັດຕັ້ງພະນັກງານ-ນໍາພາຄຸ້ມຄອງຂັ້ນສູງຂອງເມືອງອາດສະພັງທອງ ແຂວງສະຫວັນນະເຂດ; ໂດຍການເຂົ້າຮ່ວມຂອງ ທ່ານ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ, ຄະນະນໍາຂັ້ນສູງຂອງເມືອງ, ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີ, ຕາງໜ້າຄະນະຈັດຕັ້ງແຂວງໄດ້ຜ່ານຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ສະບັບເລກທີ 3489/ຈຂ, ລົງວັນທີ 1 ພະຈິກ 2024 ວ່າດ້ວຍການອະນຸມັດໃຫ້ພະນັກງານພັກການຮັບອຸດໜູນບຳນານ. ໃນນີ້, ເຈົ້າແຂວງສະຫວັນນະເຂດຕົກລົງອະນຸມັດໃຫ້: ທ່ານ ບຸນຖັນ ແສງດາລາ ກຳມະການພັກແຂວງ ເລຂາພັກເມືອງ ເຈົ້າເມືອງອາດສະພັງທອງ ພັກການຮັບອຸດໜູນບຳນານໃນງວດ III ປີ 2024 ເປັນຕົ້ນໄປ. ຈາກນັ້ນໃນພິທີ,ໄດ້ຜ່ານມະຕິຕົກລົງຂອງຄະນະປະຈຳພັກແຂວງ ສະບັບເລກທີ 2933/ຄປພຂ, ລົງວັນທີ 1ພະຈິກ 2024 ວ່າດ້ວຍການບົ່ງຕົວແຕ່ງຕັ້ງ: ສະຫາຍ ສີສະຫວາດ ເພັງທະລັງສີ ເປັນເລຂາພັກເມືອງອາດສະພັງທອງ, ຜ່ານຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ວ່າດ້ວຍການແຕ່ງຕັ້ງພະນັກງານສະບັບເລກທີ 3491/ຈຂ, ໂດຍຕົກລົງແຕ່ງຕັ້ງທ່ານ ສີສະຫວາດ ເພັງທະລັງສີ ເປັນເຈົ້າເມືອງອາດສະພັງທອງ ແຂວງສະຫວັນນະເຂດ.

ສໍາລັບທ່ານ ບຸນຖັນ ແສງດາລາ ກຳມະການພັກແຂວງ ເລຂາພັກເມືອງເຈົ້າເມືອງອາດສະພັງທອງ (ຜູ້ເກົ່າ) ໄດ້ຍົກໃຫ້ເຫັນພາຍໃຕ້ການນຳພາ-ຊີ້ນຳຂອງຄະນະພັກເມືອງອາດສະພັງທອງໃນໄລຍະຜ່ານມາເຫັນໄດ້ວ່າການພັດທະນາເສດຖະກິດຮອບດ້ານຂອງເມືອງເຊິ່ງລວມທັງວຽກງານປກຊ-ປກສ, ວຽກງານການສຶກສາ, ສາທາລະນະສຸກ, ວຽກງານກໍ່ສ້າງພື້ນຖານໂຄງລ່າງ, ຖະແຫຼງຂ່າວ, ວັດທະນະທຳ ແລະວຽກງານລຶບລ້າງຄວາມທຸກຍາກຂອງປະຊາຊົນເຊິ່ງໄດ້ຮັບການຈັດຕັ້ງປະຕິບັດໄປຕາມທິດຊີ້ນຳຂອງພັກຢ່າງມີປະສິດທິພາບສູງ.

แชร์