ໄຊຍະບູລີ ມີການພັດທະນາແຫຼ່ງຜະລິດໄຟຟ້າ 16 ໂຄງການ

ໃນວັນທີ 19 ພະຈິກ 2024 ນີ້, ທີ່ຫ້ອງວ່າການແຂວງໄຊຍະບູລີ, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມດ້ວຍຄະນະໄດ້ຕ້ອນຮັບການລົງມາຢ້ຽມຢາມ ແລະເຮັດວຽກຂອງ ທ່ານ ປອ ຈັນສະແຫວງ ບຸນຍົງ ຮອງລັດຖະມົນຕີກະຊວງພະລັງງານ ແລະບໍ່ແຮ່ພ້ອມດ້ວຍຄະນະ.

ທ່ານ ພົງສະຫວັນ ສິດທະວົງ ໄດ້ລາຍງານສະພາບຂອງແຂວງວ່າ: ແຂວງໄຊຍະບູລີ ເປັນແຂວງໜຶ່ງໃນຈໍານວນ 8 ແຂວງພາກເໜືອຂອງລາວ ຕັ້ງຢູ່ຝັ່ງຂວາຂອງແມ່ນໍ້າຂອງ, ມີເນື້ອທີ່ທັງໝົດ 16,389 ກິໂລຕາແມັດ, ເນື້ອທີ່ 80% ເປັນພູດອຍ, ປະກອບມີ 11 ເມືອງ, 430 ບ້ານ, ມີພົນລະເມືອງທັງໝົດ 401,949 ຄົນ, ມີ 8 ເຜົ່າຢູ່ຮ່ວມກັນ. ການພັດທະນາເສດຖະກິດຂອງແຂວງ ແມ່ນອີງໃສ່ 3 ທ່າແຮງຕົ້ນຕໍ ທີ່ເປັນເສົາຄໍ້າຄື: ການຜະລິດກະສິກໍາຮອບດ້ານຕິດພັນກັບການປຸງແຕ່ງ, ອຸດສາຫະກໍາພະລັງງານໄຟຟ້າ, ການບໍລິການ ແລະ ການຄ້າຊາຍແດນ. ໂດຍອີງໃສ່ 3 ທ່າແຮງບົ່ມຊ້ອນດັ່ງກ່າວຄາດວ່າໝົດປີອັດຕາການເຕີບໂຕເສດຖະກິດຂອງແຂວງ ຈະບັນລຸໃນລະດັບ 5,5% ລວມຍອດຜະລິດຕະພັນພາຍໃນ 15,762 ຕື້ກີບ, ສະເລ່ຍຕໍ່ຫົວຄົນໃຫ້ໄດ້ 36,93 ລ້ານກີບ.

ສໍາລັບວຽກງານພະລັງງານ ແລະບໍ່ແຮ່ ປະຈຸບັນມີໂຄງການພັດທະນາແຫຼ່ງຜະລິດໄຟຟ້າ ທີ່ຂັ້ນສູນກາງ ແລະຂັ້ນແຂວງອະນຸຍາດທັງໝົດມີ 16 ໂຄງການ, ໂຄງການດໍາເນີນການຜະລິດໄຟຟ້າ ມີ 3 ໂຄງການ, ໂຄງການດໍາເນີນການກໍ່ສ້າງມີ 4 ໂຄງການ, ໂຄງການດໍາເນີນສຶກສາຄວາມເປັນໄປໄດ້ເບື້ອງຕົ້ນ ມີ 7 ໂຄງການ. ທົ່ວແຂວງໄດ້ຊົມໃຊ້ໄຟຟ້າຖາວອນໃນລະບົບ ຈໍານວນ 424 ບ້ານ ເທົ່າກັບ 98,60% ຂອງຈໍານວນບ້ານທັງໝົດ ແລະ ມີ 80,920 ຄອບຄົວ ເທົ່າກັບ 98,35% ຂອງຈໍານວນຄອບຄົວທັງໝົດ ຍັງ 6 ບ້ານ ປະຈຸບັນພວມກໍ່ສ້າງຕາຂ່າຍໄຟຟ້າ 22kv, 0,4kv ແລະ ຕິດຕັ້ງໝໍ້ແປງເຂົ້າບ້ານໂພນສີດາ ແລະ ບ້ານຂອນແກ່ນ ເມືອງໄຊຍະບູລີ ສໍາເລັດແລ້ວ 80%; ມີໂຄງການຊອກຄົ້ນ-ສໍາຫຼວດ, ຂຸດຄົ້ນ ແລະ ປຸງແຕ່ງແຮ່ທາດແບບປົກກະຕິ ແລະ ແບບທົດລອງ ທີ່ຂັ້ນສູນກາງ ແລະ ຂັ້ນແຂວງຄຸ້ມຄອງທັງໝົດມີ 34 ໂຄງການ, ຂັ້ນສູນກາງຄຸ້ມຄອງ 13 ໂຄງການ, ຂັ້ນແຂວງຄຸ້ມຄອງ 21 ໂຄງການ, ໂຄງການຂຸດຄົ້ນຫີນປູນມີ 14 ໂຄງການ, ໂຄງການຂຸດຄົ້ນແຮ່ມັງການມີ 1 ໂຄງການ ໃນເນື້ອທີ່ 4,9 ເຮັກຕາ ຮອດປະຈຸບັນສາມາດຂຸດຄົ້ນແຮ່ມັງການໄດ້ 80,000 ໂຕນ ແລະ ພວມກໍາລັງປະກອບເອກະສານ ເພື່ອຂໍໂກ່ຕ່າສົ່ງແຮ່ທາດອອກໄປຈໍາໜ່າຍຕ່າງປະເທດນໍາກະຊວງພະລັງງານ ແລະ ບໍ່ແຮ່. ຈາກນັ້ນກໍ່ໄດ້ພ້ອມກັນປະກອບຄໍາຄິດຄໍາເຫັນເພື່ອເຮັດໃຫ້ວຽກງານດັ່ງກ່າວ ໄດ້ຮັບການຈັດຕັ້ງປະຕິບັດໃຫ້ມີຜົນສໍາເລັດ.

แชร์