ເກືອບ 11 ເດືອນ ລັດຖະບານມ້າງລາຍຄະດີຢາເສບຕິດ ໄດ້ 3,395 ເລື່ອງ

ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ຂອງລັດຖະບານໃນໄລຍະເດືອນມັງກອນ-ເດືອນພະຈິກ ປີ 2024 ນີ້, ສາມາດແກ້ໄຂມ້າງລາຍຄະດີຢາເສບຕິດ ໄດ້ທັງໝົດ 3,395 ເລື່ອງ, ຈັບຜູ້ຖືກຫາໄດ້ 5,168 ຄົນ ແລະຍຶດຂອງກາງຢາເສບຕິດໄດ້ຈໍານວນຫລວງຫລາຍ.

ທ່ານ ພົອ ວິໄລ ຫລ້າຄໍາຟອງ ຮອງນາຍົກລັດຖະມົນຕີ, ລັດຖະມົນຕີ ກະຊວງປ້ອງກັນຄວາມສະຫງົບ ໄດ້ລາຍງານກ່ຽວກັບການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 20 ພະຈິກ ວ່າ: ວຽກງານແກ້ໄຂບັນຫາຢາເສບຕິດ ນັບແຕ່ເດືອນ 01-11 ປີ 2024 ໃນຂອບເຂດທົ່ວປະເທດ ສາມາດແກ້ໄຂມ້າງລາຍຄະດີຢາເສບຕິດ ໄດ້ທັງໝົດ 3,395 ເລື່ອງ, ຈັບຜູ້ຖືກຫາໄດ້ 5,168 ຄົນ/ຍິງ 505 ຄົນ, ຕ່າງປະເທດ 199 ຄົນ/ຍິງ 19 ຄົນ (ຫວຽດນາມ 61 ຄົນ/ ຍິງ 06 ຄົນ, ຈີນ 59 ຄົນ/ຍິງ 03 ຄົນ, ມຽນມາ 16 ຄົນ, ໄທ 39 ຄົນ/ຍິງ 04 ຄົນ, ມາເລເຊຍ 03 ຄົນ, ໄນຈີເລຍ 01 ຄົນ/ຍິງ 01 ຄົນ, ອີຕາລີ 01 ຄົນ, ອົດສະຕາລີ 01 ຄົນ, ອິນເດຍ 02 ຄົນ/ຍິງ 01 ຄົນ, ອິນໂດເນເຊຍ 01 ຄົນ, ເຢເມນ 01 ຄົນ, ຝຣັ່ງ 01 ຄົນ, ເກົາຫຼີໃຕ້ 03 ຄົນ, ເລບານ໋ອນ 01 ຄົນ, ອັງກິດ 01 ຄົນ, ອາເມລິກາ 01 ຄົນ, ເຢຍລະມັນ 02 ຄົນ/ຍິງ 01 ຄົນ, ຢີປຸ່ນ 02 ຄົນ/ຍິງ 01 ຄົນ, ກຳປູເຈຍ 02 ຄົນ, ຟີລີບປິນ 01 ຄົນ); ຍຶດເຮໂຣອິນ 380.96 ກິໂລ, ຢາບ້າ 81,030,733 ເມັດ ນໍ້າໜັກ 8,103.07 ກິໂລ, ຢາໄອສ໌ 4,816.17 ກິໂລ, ຢາຝິ່ນ 84.86 ກິໂລ, ຄັນຊາ 3,583.24 ກິໂລ, ເຄຕາມິນ 33.14 ກິໂລ, ຢາອີ 2,584 ເມັດ ກັບ 61.44 ກລ, ໂຄເຄນ 0,99 ກິໂລ, ແປ້ງຝຸ່ນ 10,092.84 ກິໂລ, ສານເຄມີ 101 ຖັງ, ລົດໃຫ່ຍ 77 ຄັນ, ລົດຈັກ 480 ຄັນ, ປືນ 10 ກະບອກ, ລູກປືນ 1,677 ລູກ.
ນອກຈາກນັ້ນ ໄດ້ລົງສຳຫຼວດເນື້ອທີ່ລັກລອບປູກຝິ່ນ ປີ 2024 ຢູ່ 9 ແຂວງພາກເໜືອ ແລະ ພາກກາງ; ກວດພົບເນື້ອທີ່ລັກລອບປູກຝິ່ນ 5,831 ເຮັກຕາ, ທໍາລາຍໄດ້ 126 ເຮັກຕາ ແລະ ລົງກວດກາ ແລະ ທໍາລາຍການລັກ ລອບປູກຕົ້ນກະທ່ອມ ຢູ່ເມືອງສັງທອງ, ນະຄອນຫຼວງວຽງຈັນ 123 ຕົ້ນ ແລະ ໄດ້ທໍາລາຍສານເຄມີຕົ້ນທີ່ເຈົ້າໜ້າທີ່ຍຶດໄດ້ຢູ່ 3 ແຂວງພາກເໜືອ ຄື: ແຂວງບໍ່ແກ້ວ, ຫຼວງພະບາງ, ຫຼວງນໍ້າທາ ຈຳນວນ 126 ໂຕນ.

ຕໍ່ເປົ້າໝາຍຜູ້ເສບຢາເສບຕິດ (ຜູ້ຖືກເຄາະຮ້າຍ), ທ່ານ ພົອ ວິໄລ ຫລ້າຄໍາຟອງ ລາຍງານວ່າ: ໄດ້ນໍາເຂົ້າສູນບໍາບັດ-ປິ່ນປົວ, ຟື້ນຟູສຸ ຂະພາບ ທີ່ມີໃນທົ່ວປະເທດ 14 ສູນ; ມີທັງໝົດ 5,132 ຄົນ/ຍິງ 209 ຄົນ (ໃນນັ້ນ, ປິ່ນປົວດີແລ້ວກັບຄືນບ້ານມີ 2,513 ຄົນ/ຍິງ 112 ຄົນ, ສືບຕໍ່ປິ່ນປົວ 2.619 ຄົນ/ຍິງ 97 ຄົນ); ປະຈຸບັນ ລັດຖະບານ ສສ. ຫວຽດນາມ ໄດ້ໃຫ້ການຊ່ວຍເຫຼືອໂຄງການກໍ່ສ້າງສູນບໍາບັດຜູ້ຕິດຢາເສບຕິດ 1 ແຫ່ງ (ຫຼັກ 62) ເຊິ່ງສາ ມາດບັນຈຸໄດ້ 500 ກວ່າຄົນ; ໄດ້ສຳເລັດພິທີວາງສິລາເລີກໃນວັນທີ 12 ກໍລະກົດ 2024 ຄາດວ່າທ້າຍປີ 2025 ຈະສໍາເລັດການກໍ່ສ້າງ ແລະ ມີຈຸດໃຫ້ຄໍາປຶກສາຜູ້ຕິດຢາເສບຕິດ ຂັ້ນຊຸມຊົນ ຢູ່ໂຮງໝໍເມືອງ ຈຳນວນ 28 ຈຸດ.

ຂ່າວ: ສາວລາວໃຕ້

แชร์