ວັນຊາດທີ 02 ທັນວາ ວັນແຫ່ງໄຊຊະນະອັນຍິ່ງໃຫຍ່ ຂອງປວງຊົນລາວທັງຊາດ

ເນື່ອງໃນໂອກາດວັນຊາດທີ 02 ທັນວາ ຄົບຮອບ 49 ປີ (02/12/1975 - 02/12/2024 ທີ່ໄດ້ໝູນວຽນ ມາບັນຈົບຄົບຮອບອີກວາລະໜຶ່ງ. ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ກ່າວ່າ: ຮູ້ສຶກເປັນກຽດ ແລະ ພາກພູມໃຈເປັນຢ່າງຍິ່ງ ຕາງໜ້າໃຫ້ອົງການປົກຄອງແຂວງ ແລະ ປະຊາຊົນຊາວຫຼວງພະບາງບັນດາເຜົ່າຂໍສະແດງຄວາມເອກອ້າງທະນົງໃຈຄຳນັບຮັບຕ້ອນ ວັນຊາດທີ 02 ທັນວາ ທີ່ເປັນວັນປະຫວັດສາດ ແຫ່ງໄຊຊະນະອັນຍິ່ງໃຫຍ່ ຂອງປວງຊົນລາວທັງຊາດ ທີ່ຕໍ່ສູ້ເພື່ອອິດສະຫຼະພາບ, ເອກະລາດ ແລະ ຮັກສາໄດ້ຜຶນແຜ່ນດິນອັນຄົບຖ້ວນ ຈາກສັດຕູພວກລ່າເມືອງຂຶ້ນແບບເກົ່າ ແລະແບບໃໝ່ ທີ່ມາຮຸກຮານ ຫວັງທຳລາຍ ປະເທດຊາດ ແລະ ແບ່ງແຍກຄວາມສາມັກຄີຂອງປະຊາຊົນລາວບັນດາເຜົ່າ.

ວັນທີ 2 ທັນວາ ເປັນວັນທີ່ມີຄວາມໝາຍຄວາມສຳຄັນຂອງຊາດລາວເຮົາສະແດງໃຫ້ເຫັນເຖິງມູນເຊື້ອນໍ້າໃຈຮັກຊາດຂອງປະຊາຊົນລາວບັນດາເຜົ່າທີ່ມີຄວາມສາມັກຄີອັນເດັດດຽວໜ້ຽວແໜ້ນ, ອົງອາດ, ກ້າຫານ ພາຍໃຕ້ການຊີ້ນຳ-ນຳພາຂອງພັກປະຊາຊົນປະຕິວັດລາວ ກໍ່ຄືທ່ານປະທານ ໄກສອນ ພົມວິຫານ ທີ່ແສນເຄົາລົບຮັກ, ກອງທັບປະຊາຊົນປະຕິວັດລາວ ໄດ້ພ້ອມກັນຄຽງບ່າຄຽງໄຫຼໃນພະລະກິດ ຕໍ່ສູ້ກູ້ຊາດ ຕ້ານສັດຕູພວກລ່າເມືອງຂື້ນແບບເກົ່າ ແລະ ແບບໃໝ່ ຢ່າງດຸເດືອດ, ຂ້ຽວຂາດ ທີ່ເຕັມໄປດ້ວຍຄວາມເສຍສະຫຼະເລຶອດເນື້ອ ແລະ ຊີວິດ ຂອງກອງທັບ ແລະ ປະຊາຊົນລາວບັນດາເຜົ່າ ຈົນສາມາດປົດປ່ອຍປະເທດຊາດ ໄດ້ຢ່າງມີໄຊ ແລະໄດ້ປະກາດສ້າງຕັ້ງ ສປປ ລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975. ເປັນວັນທີ່ປະຊາຊົນລາວບັນດາເຜົ່າ ໄດ້ຮັບອິດສະຫຼະພາບ ແລະເປັນເຈົ້າຂອງປະເທດຊາດຢ່າງແທ້ຈິງ,ເຮັດໃຫ້ປະຊາຄົມໂລກ ໄດ້ຮັບຮູ້ ວັນທີ 2 ທັນວາ ແມ່ນວັນແຫ່ງສັນຕິພາບ.

ນັບແຕ່ປີ 1975 ທີ່ປະເທດລາວໄດ້ຮັບການຟື້ນຟູຈາກສົງຄາມ ໃນໄລຍະ 49 ປີ ແຫ່ງການປົກປັກຮັກສາ ແລະ ຖະນຸບຳລຸງ ບູລະນະສ້າງສາພັດທະນາປະເທດຊາດ ພາຍໃຕ້ການຊີ້ນຳ-ນຳພາ ຂອງພັກປະຊາຊົນປະຕິວັດລາວ ໃນລະບອບປະຊາທິປະໄຕ ປະຊາຊົນລາວ ທີ່ທຸກຄົນມີສິດສະເໜີພາບເທົ່າທຽມກັນໃນສັງຄົມ ໄດ້ເຮັດໃຫ້ລະບົບການເມືອງ-ການປົກຄອງ ໄດ້ສືບຕໍ່ມີສະຖຽນລະພາບ ຢາງເຂັ້ມແຂງໜັກແໜ້ນ, ເສດຖະກິດ, ພື້ນຖານໂຄງລ່າງໄດ້ຮັບການພັດທະນະຢ່າງຕໍ່ເນື່ອງ, ສັງຄົມແມ່ນມີຄວາມສະຫງົບໂດຍພື້ນຖານ, ປະຊາຊົນລາວບັນດາເຜົ່າ ມີຄວາມສາມັກຄີ ເປັນປຶກແຜ່ນ  ແໜ້ນໜາ, ການພົວພັນຮ່ວມມືກັບບັນດາປະເທດເພື່ອນມິດ ກໍ່ມີນະໂຍບາຍ ຫັນປ່ຽນການຮ່ວມມືຮອບດ້ານ, ຮ່ວມຍຸດທະສາດພັດທະນາຢ່າງເລິກເຊິ່ງ, ອັນໄດ້ກາຍເປັນພື້ນຖານອັນແຂງແຮງ ແລະ ເຂັ້ມແຂງ ໃຫ້ປະເທດລາວ ໄດ້ມີເງື່ອນໄຂ ພັດທະນາອັນໃໝ່ ສູ່ຄວາມຈະເລີນ ຮຸ່ງເຮືອງ ແລະ ສີວິໄລ ເທື່ອລະກ້າວ.

ສະເພາະແຂວງຫຼວງພະບາງ ຂອງພວກເຮົາ ພາຍຫຼັງທີ່ໄດ້ຮັບການປົດປ່ອຍ ຄະນະພັກ-ອົງການປົກຄອງແຂວງ ທຸກຍຸກທຸກສະໄໝ ໄດ້ມີຄວາມພາຍະຍາມສຸມໃສ່ຈັດຕັ້ງຜັນຂະຫຍາຍແນວທາງນະໂຍບາຍຂອງພັກລະບຽບກົດໝາຍຂອງລັດ, ແຜນພັດທະນາເສດຖະກິດ-ສັງຄົມ ແຕ່ລະໄລຍະ ສືບຕໍ່ບູລະນະສ້າງສາພັດທະນາແຂວງ ໂດຍໄດ້ເລັ່ງໃສ່ການສ້າງພື້ນຖານໂຄງລ່າງ ຮັບປະກັນເຮັດໃຫ້ ລະບົບການເມືອງ-ການປົກຄອງ ມີຄວາມເຂັ້ມແຂງ ນັບແຕ່ທ້ອງຖີ່ນຂັ້ນແຂວງ, ຂັ້ນເມືອງ ແລະ ຂັ້ນບ້ານ ເພື່ອເປັນຮາກຖານອັນສຳຄັນໃຫ້ແກ່ການປົກຄອງໃນໄລຍະໃໝ່ ມີຄວາມໜັກແໜ້ນ ແລະ ເຂັ້ມແຂງ, ພ້ອມດຽວກັນນີ້, ກໍ່ສຸມໃສ່ການພັດທະນາເສດຖະກິດ-ສັງຄົມ ໂດຍອີງໃສ່ທ່າແຮງບົມຊ້ອນຂອງແຂວງ ເປັນຕົ້ນແມ່ນວຽກງານກະສິກຳອຸດສາຫະກຳ ແລະ ການບໍລິການ-ການທ່ຽວທ່ອງ ທີ່ຖືເປັນບູລິມາສິດສຳຄັນ ໃນການພັດທະນາເສດຖະກິດ-ສັງຄົມຂອງແຂວງ ເຊິ່ງໃນຊຸມປີຜ່ານມາໄດ້ເຮັດໃຫ້ເສດຖະກິດຂອງແຂວງ ຂະຫາຍຕົວໃນລະດັບ 5,1% ຕໍ່ປີ ລວມຍອດມູນຄ່າຜະລິດຕະພັນພາຍໃນບັນລຸໄດ້ 16.083 ຕື້ກີບ ສະເລ່ຍໃສ່ຫົວຄົນໜຶ່ງໄດ້ 33,67 ລ້ານກີບ, ການພັດທະນາ ແລະ ການຂະຫາຍຕົວທາງດ້ານເສດຖະກິດຂອງແຂວງນັ້ນ ແມ່ນໝາກຜົນຂອງການຊື້ນຳ-ນຳພາ ຂອງຄະນະພັກອົງການປົກຄອງທຸກຂັ້ນ ພາຍໃນແຂວງຫຼວງພະບາງ ຈຶ່ງສາມາດຍາດໄດ້ຜົນສຳເລັດ ແລະໄດ້ຮັບການພັດທະນາຢ່າງຕໍ່ເນື່ອງ

ໃນໂອກາດວັນຊາດທີ 02 ທັນວານີ້ ຂ້າພະເຈົ້າຕາງໜ້າ ອົງການປົກຄອງແຂວງຂໍຮຽກຮ້ອງມາຍັງທຸກອົງການຈັດຕັ້ງໃນລະບົບການເມືອງເວົ້າລວມ, ເວົ້າສະເພາະ ບັນດາອົງການຈັດຕັ້ງ ພັກ-ລັດ, ສະມາຊິກພັກ-ພະນັກງານ, ທະຫານ-ຕຳຫຼວດ ແລະປະຊາຊົນຊາວຫຼວງພະບາງຈົ່ງເພີ່ມທະວີຄວາມສາມັກຄີເປັນປຶກແຜ່ນ, ເປັນເຈົ້າການດ້ານການເມືອງ ຫັນເອົາມູນເຊື້ອນ້ຳໃຈ ທີ 2 ທັນວາ ພ້ອມກັນເສີມຂະຫຍາຍມູນເຊື້ອ ແລະ ໝາກຜົນທີ່ຍາດມາໄດ້ໃນພະລະກິດປ່ຽນແປງໃໝ່, ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະຮອບດ້ານໃຫ້ເປັນຮູບປະທຳຕົວຈິງ ເພື່ອຖະນຸບໍາລຸງ, ບູລະນະລະບອບປະຊາທິປະໄຕ ປະຊາຊົນ ຂອງພວກເຮົາ ກ້າວຂຶ້ນຢ່າງບໍ່ຢຸດຢັ້ງ.

ໃນໂອກາດອັນສະງ່າລາສີທີ່ມີຄວາມໝາຍຄວາມສຳຄັນນີ້ ຂ້າພະເຈົ້າ ຂໍອວຍພອນອັນປະເສິດແດ່ບັນດາທ່ານການນຳພັກລັດ, ປະຊາຊົນລາວບັນດາເຜົ່າ ຈົ່ງມີພາລານາໄມສົມບູນປະສົບຜົນສຳເລັດ ໃນໜ້າທີ່ວຽກງານທຸກປະການ ຂໍເຊິດຊູນ້ຳໃຈ ວັນຊາດທີ 02 ທັນວາ ຄົບຮອບ 49 ປີ  ຢ່າງສຸດໃຈ. 

#ຕະວິນຍານ

แชร์