ລັດຖະບານ ຈະເພີ່ມເງິນເບ້ຍລ້ຽງໃຫ້ ນັກສຶກສາສາຍຄູ

ເພື່ອສົ່ງເສີມຄຸນຄ່າຂອງວິຊາຊີບຄູ, ລັດຖະບານຈະປັບປຸງຄຸນນະພາບການສຶກສາໃຫ້ດີຂຶ້ນດ້ວຍການການແກ້ໄຂບັນຫາການຂາດຄູສອນ ແລະເພີ່ມເງິນເບ້ຍລ້ຽງໃຫ້ນັກສຶກສາທີ່ຮຽນສາຍຄູເພື່ອສ້າງແຮງຈູງໃຈ ແລະຊ່ວຍຫຼຸດຜ່ອນພາລະດ້ານເງິນທຶນຂອງນັກສຶກສາ.

ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ລາຍງານຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ວ່າ: ລັດຖະບານ ໄດ້ສຸມໃສ່ປັບປຸງແກ້ໄຂບັນຫາບຸລິມະສິດອັນຮີບດ່ວນຂໍ້ຫຍຸ້ງຍາກຕ່າງໆ ໃນວຽກງານສຶກສາທິການ, ວິທະຍາສາດ ແລະ ກິລາ ໂດຍສະເພາະ ການແກ້ໄຂບັນຫາການຂາດຄູສອນ, ການປະລະການຮຽນຂອງ ນັກຮຽນ, ນັກສຶກສາ ແລະ ບັນຫາອື່ນໆ ຕາມນະໂຍບາຍ ແລະ ມາດຕະການທີ່ລັດຖະບານ ໄດ້ກຳນົດໃນມະຕິ 09/ລບ ໃຫ້ດີຂຶ້ນ, ຄຽງຄູ່ກັນນັ້ນ, ລັດຖະບານ ກໍາລັງພິຈາລະນາ ນະໂຍບາຍການເພີ່ມເງິນເບ້ຍລ້ຽງໃຫ້ ນັກສຶກສາທີ່ຮຽນສາຍຄູໃຫ້ສູງຂຶ້ນ, ການກຳນົດໂຄຕ້າຄູສອນ ໃຫ້ສອດຄ່ອງກັບແຜນກໍ່ສ້າງຄູ ແລະ ການທົດ ແທນຄູທີ່ສູນເສຍ ດ້ວຍຮູບການຕ່າງໆ ໃນແຕ່ລະປີ; ດ້ານການສຶກສາ ມີທັງໝົດ 16 ຕົວຊີ້ວັດ, ໃນນີ້ ມີ 9 ຕົວຊີ້ວັດ ທີ່ສາມາດບັນລຸໄດ້ຕາມແຜນ, ມີ 7 ຕົວຊີ້ວັດ ອາດຈະຍັງບໍ່ສາມາດບັນລຸໄດ້ ເປັນຕົ້ນ: ອັດຕາປະລະການຮຽນຂອງນັກຮຽນຊັ້ນປະຖົມ, ອັດຕາເລື່ອນຊັ້ນ ປ. 5 ຂຶ້ນ ມ.1 ແລະ ອັດຕາເຂົ້າຮຽນໃໝ່ລວມ ມ. 4, ສາເຫດຕົ້ນຕໍ ແມ່ນຍ້ອນບັນຫາດ້ານເສດຖະກິດສົ່ງຜົນເຮັດໃຫ້ນັກຮຽນຈໍານວນໜຶ່ງອອກໂຮງຮຽນໄປເຮັດວຽກຊ່ວຍຄອບຄົວ.

ສ່ວນທິດທາງແຜນການປີ 2025, ທ່ານນາຍົກລາຍງານວ່າ: ຈະສຸມໃສ່ປັບປຸງຄຸນນະພາບການສຶກສາ ແລະກໍ່ສ້າງຊັບພະຍາກອນມະນຸດ; ສືບຕໍ່ສຸມໃສ່ປະຕິບັດນະໂຍບາຍ ແລະມາດຕະການໃນການແກ້ໄຂບັນຫາການຂາດຄູສອນ, ການປະຕິບັດນະໂຍບາຍອຸດໜູນຄູ ອາສາສະໝັກ ແລະການປະລະການຮຽນຂອງນັກຮຽນ, ນັກສຶກສາໃຫ້ເປັນຮູບປະທໍາຫຼາຍຂຶ້ນພ້ອມທັງເພີ່ມທະວີການມີສ່ວນຮ່ວມໃນການພັດທະນາການສຶກສາຕາມການແບ່ງຂັ້ນຄຸ້ມຄອງໃຫ້ຫຼາຍຂຶ້ນ.

ໂດຍ: ໃພ້ໄຊທານີ

แชร์