ລັດຖະບານ ໄດ້ອະນຸມັດການລົງທຶນດ້ານແຮ່ທາດ 1,007 ບໍລິສັດ

ມາຮອດປັດຈຸບັນ, ລັດຖະບານ ໄດ້ອະນຸມັດໂຄງການຊອກຄົ້ນ, ສໍາຫຼວດ, ຂຸດຄົ້ນ ແລະ ປຸງແຕ່ງແຮ່ທາດ ທັງໝົດ 1,007 ບໍລິສັດ, 1,205 ກິດຈະການ.

ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ລາຍງານຕໍ່ກອງປະຊຸມສະໄຫມສາມັນ ເທື່ອທີ 8 ຂອງສະພາແຫາງຊາດ ຊຸດທີ IX ວ່າ: ຮອດປັດຈຸບັນ ຂັ້ນສູນກາງ ແລະ ທ້ອງຖິ່ນ ໄດ້ອະນຸມັດໂຄງການຊອກຄົ້ນ, ສໍາຫຼວດ, ຂຸດຄົ້ນ ແລະ ປຸງແຕ່ງແຮ່ທາດ ທັງໝົດ 1,007 ບໍລິສັດ, 1,205 ກິດຈະການ (ໃນນີ້ ໂຄງການຂຸດຄົ້ນ ແລະ ປຸງແຕ່ງແບບ ທົດລອງ 93 ບໍລິສັດ, ແຮ່ເຫຼັກ 37 ບໍລິສັດ, ຫີນມາໂບ 2 ບໍລິສັດ, ແຮ່ຄໍາ 10 ບໍລິສັດ, ແຮ່ຄໍາຕົກຂ້ອນ 31 ບໍລິສັດ ແລະ ແຮ່ຫາຍາກ 13 ບໍລິສັດ); ຈາກການປະເມີນບັນດາໂຄງການແຮ່ທາດ ສົກປີ 2023 ຈຶ່ງໄດ້ໂຈະການພິຈາລະນາໂຄງການໃໝ່ສໍາລັບແຮ່ທາດ (ປະເພດຄໍາຕົກຂ້ອນ, ແຮ່ຫາຍາກ ແລະ ໂລຫະທາດ ຈໍານວນໜຶ່ງ) ຕາມການຊີ້ນໍາຂອງກົມການເມືອງສູນກາງພັກ ແລະ ສະພາແຫ່ງຊາດ ເພື່ອສຸມໃສ່ດໍາເນີນການປະເມີນ, ກວດກາ ແລະ ດັດສົມບັນດາໂຄງການທີ່ໄດ້ອະນຸມັດຜ່ານມາ, ໂຄງການໃດທີ່ມີຜົນການປະເມີນປະເພດ C+ ແລະ C ລັດຖະບານ ໄດ້ດໍາເນີນການຍົກເລີກ ແລະ ຖອນໂຄງການຄືນ ເປັນແຕ່ລະກໍລະນີໄປ.

ພ້ອມນີ້, ກໍໄດ້ ໂຈະຖາວອນ ການອະນຸມັດໂຄງການທົດລອງທາງດ້ານແຮ່ທາດ ແລະ ສືບຕໍ່ຫັນບັນດາໂຄງການທົດລອງ ທີ່ໄດ້ ອະນຸມັດຜ່ານມາ ເຂົ້າສູ່ກົນໄກປົກກະຕິຕາມກົດໝາຍກ່ຽວຂ້ອງ. ພ້ອມກັນນັ້ນ ກໍໄດ້ສຸມໃສ່ກວດກາໂຄງການ ແຮ່ຄໍາ ແລະ ປະຕິບັດມາດຕະການຕໍ່ໂຄງການທີ່ລະເມີດສັນຍາ, ການລາຍງານຂໍ້ມູນຜົນການຜະລິດ ບໍ່ຖືກກັບ ຄວາມເປັນຈິງ ໂດຍຈະມີມາດຕະການຄຸ້ມຄອງ ແລະ ກວດກາຢ່າງເຂັ້ມງວດກວ່າເກົ່າ.

ທ່ານນາຍົກລັດຖະມົນຕີໃຫ້ຮູ້ຕື່ມວ່າ: ທິດທາງແຜນການໃນປີ 2025 ລັດຖະບານຈະເລັ່ງຫັນການໂຄງການທົດລອງແຮ່ທາດ ໄປສູ່ກົນໄກປົກກະຕິຕາມກົດໝາຍກໍານົດ, ພ້ອມກັນນັ້ນ ຈະໄດ້ສຸມໃສ່ມາດຕະການຄຸ້ມຄອງການຂຸດຄົ້ນ ແລະ ປຸງແຕ່ງແຮ່ຄໍາ, ແຮ່ຫາຍາກ ແລະ ອື່ນໆ ທັງຈະໄດ້ຮີບ ຮ້ອນຄົ້ນຄວ້ານະໂຍບາຍຕົວຈິງຈໍານວນໜຶ່ງ ເພື່ອໃຫ້ມີການສ້າງໂຮງງານປຸງແຕ່ງແຮ່ສໍາເລັດຮູບຢູ່ລາວ.

แชร์