ງານລ້ຽງນໍ້າຊາ ພົບປະນັກການທູດຍິງ ແລະພັນລະຍານັກການທູດ ປະຈໍາປີ 2024

ໃນວັນທີ 19 ພະຈິກ 2024, ທີ່ ສູນການຮ່ວມມືສາກົນ ແລະ ການຝຶກອົບຮົມ (ICTC), ສະຫະພັນແມ່ຍິງກະຊວງການຕ່າງປະເທດ ໄດ້ຈັດງານລ້ຽງນໍ້າຊາ-ພົບປະສັງສັນ ລະຫວ່າງ ບັນດາພັນລະຍາການນຳ, ການນຳເພດຍິງ, ນັກການທູດເພດຍິງ ຂອງກະຊວງການຕ່າງປະເທດ, ບັນດາພັນລະຍາທູຕານຸທູດ, ນັກການທູດເພດຍິງຕ່າງປະເທດ ແລະ ແມ່ຍິງຈາກ ຈາກສໍານັກງານຕາງໜ້າການທູດ ແລະ ອົງການຈັດຕັ້ງສາກົນ ປະຈຳ ສປປ ລາວ, ໂດຍການເປັນປະທານຂອງ ທ່ານ ນາງ ອາລຸນີ ກົມມະສິດ, ພັນລະຍາທ່ານຮອງນາຍົກລັດຖະມົນຕີ, ປະທານກິດຕິມະສັກສະຫະພັນແມ່ຍິງກະຊວງການຕ່າງປະເທດ ແລະ ມີບັນດາແຂກຖືກເຊີນຈາກ ສູນກາງສະຫະພັນແມ່ຍິງລາວ, ຄະນະພົວພັນຕ່າງປະເທດສູນກາງພັກ, ສະຫະພັນແມ່ຍິງບັນດາກະຊວງ ເຂົ້າຮ່ວມລວມທັງໝົດປະມານ 400 ກວ່າທ່ານ, ຊຶ່ງໃນນັ້ນ ມີແຂກຈາກບັນດາສະຖານເອກອັກຄະລັດຖະທູດຕ່າງປະເທດ ແລະ ສຳນັກງານອົງການຈັດຕັ້ງສາກົນ ປະຈຳ ສປປ ລາວ ເກືອບ 200 ທ່ານ.

ໃນໂອກາດນີ້, ທ່ານ ນາງ ອາລຸນີ ກົມມະສິດ ໄດ້ໃຫ້ກຽດຂຶ້ນກ່າວເປີດງານ ແລະ ມີຄຳເຫັນວ່າ: ງານລ້ຽງນໍ້າຊາປີນີ້ ແມ່ນມີຄວາມໝາຍສໍາຄັນ ຊຶ່ງຈັດຂຶ້ນໃນທ່າມກາງບັນຍາກາດທີ່ ສປປ ລາວ ຫາກໍ່ສຳເລັດການເປັນປະທານ ແລະ ເປັນເຈົ້າພາບຈັດກອງປະຊຸມສຸດຍອດອາຊຽນຄັ້ງທີ 44, 45 ແລະ ກອງປະຊຸມອື່ນໆທີ່ກ່ຽວຂ້ອງ ຊຶ່ງໄດ້ຮັບຜົນສໍາເລັດຢ່າງຈົບງາມ. ຜົນສໍາເລັດດັ່ງກ່າວ ແມ່ນແນ່ນອນປາສະຈາກບໍ່ໄດ້ ການສະໜັບສະໜູນຈາກບັນດາປະເທດສະມາຊິກອາຊຽນ ແລະ ບັນດາປະເທດຄູ່ຮ່ວມມື, ລວມເຖິງອົງການຈັດຕັ້ງສາກົນຕ່າງໆ, ຊຶ່ງໃນນັ້ນແມ່ຍິງລາວຂອງພວກເຮົາ ໂດຍສະເພາະແມ່ຍິງກະຊວງການຕ່າງປະເທດ ກໍ່ໄດ້ເປັນສ່ວນໜຶ່ງທີ່ສໍາຄັນປະກອບສ່ວນຢ່າງຫຼວງຫຼາຍເຂົ້າໃນຜົນສໍາເລັດດັ່ງກ່າວ.

“ງານລ້ຽງນ້ຳຊາ” ເປັນກິດຈະກຳເຄື່ອນໄຫວປະຈຳປີຂອງ ສະຫະພັນແມ່ຍິງກະຊວງການຕ່າງປະເທດ ໂດຍມີຈຸດປະສົງ ເພື່ອເຕົ້າໂຮມພົບປະສັງສັນ, ສ້າງຄວາມລຶ້ງເຄີຍ, ຄວາມຮັກແພງ ແລະ ແລກປ່ຽນວັດທະນະທຳ ຊຶ່ງກັນ ແລະ ກັນ, ທັງຍັງເປັນການສ້າງເຄືອຄ່າຍການປະສານງານໃນຕໍ່ໜ້າ ເພື່ອປະກອບສ່ວນເຂົ້າໃນການເສີມຂະຫຍາຍການພົວພັນຮ່ວມມືກັບປະເທດຕ່າງໆ ລະຫວ່າງ ນັກການທູດຍິງ ແລະ ພັນລະຍານັກການທູດ ຂອງລາວ ແລະ ຕ່າງປະເທດ ທີ່ປະຈໍາການຢູ່ ສປປ ລາວ. ໃນງານລ້ຽງນໍ້າຊາ, ນອກຈາກໄດ້ມີການວາງສະແດງສິນຄ້າທີ່ຫຼາກຫຼາຍ ແລະ ອາຫານລາວ ຂອງບັນດາໜ່ວຍແມ່ຍິງພາຍໃນກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ (ຄຕພ) ຍັງມີການວາງສະແດງສິນຄ້າ, ຂອງທີ່ລະນຶກ, ອາຫານເອກະລັກປະຈໍາຊາດ ແລະ ອື່ນໆ ຂອງບັນດາສໍານັກງານການທູດຕ່າງປະເທດ ແລະ ອົງການຈັດຕັ້ງສາກົນ ປະຈໍາ ສປປ ລາວ. ນອກນັ້ນ, ຍັງມີການສະແດງສິລະປະວັດທະນະທໍາລາວ ຈາກການປະກອບສ່ວນຂອງເອື້ອຍນ້ອງແມ່ຍິງກະຊວງການຕ່າງປະເທດ, ຄຕພ ແລະ ການປະກອບສ່ວນສະແດງສິລະປະອັນເປັນເອກະລັກປະຈໍາຊາດຂອງ ບັນດາສໍານັກງານການທູດຕ່າງ ປະເທດ ປະຈໍາ ສປປ ລາວ, ຊຶ່ງໄດ້ສ້າງບັນຍາກາດອັນຄຶກຄື້ນ, ເບີກບານມ່ວນຊື່ນ ແລະ ປະທັບໃຈ ໃຫ້ແກ່ຜູ້ເຂົ້າຮ່ວມ. ໃນໂອກາດດຽວກັນນີ້, ບັນດາແຂກແຂກທີ່ເຂົ້າຮ່ວມກໍໄດ້ອວຍພອນສົ່ງທ້າຍປີເກົ່າ 2024 ແລະ ຕ້ອນຮັບປີ ໃໝ່ 2025 ຊຶ່ງກັນ ແລະ ກັນ ດ້ວຍຄວາມເບີກບານມ່ວນຊື່ນ.

แชร์