ລັດຖະບານ ກຽມປັບຂຶ້ນເງິນເດືອນຂັ້ນຕໍ່າ ຄາດເລີ່ມປະຕິບັດງວດທີ 1 ປີ 2025

ໃນໄລຍະທີ່ ສປປ ລາວ ກຳລັງປະເຊີນກັບບັນຫາທາງດ້ານເສດຖະກິດ, ເງິນເຟີ້, ລາຄາສິນຄ້າອຸປະໂພກ-ບໍລິໂພກແພງຂຶ້ນ ສົ່ງຜົນກະທົບໂດຍກົງຕໍ່ຊີວິດການເປັນຢູ່ຂອງປະຊາຊົນໃນທົ່ວປະເທດ, ແຕ່ເຖິງຢ່າງໃດກໍຕາມ ລັດຖະບານ ກໍບໍ່ໄດ້ນິ້ງນອນໃຈໄດ້ພະຍາຍາມຊອກຫາວິທີທາງ, ນະໂບບາຍມາດຕະການຕ່າງໆເພື່ອເລັ່ງຮັບມື-ແກ່ໄຂບັນຫາດັ່ງກ່າວ, ໃນນັ້ນ ລັດຖະບານ ໄດ້ຄົ້ນຄວ້າປັບປຸງໂຄງສ້າງດັດສະນີເງິນເດືອນໃນໄລຍະຍາວ ແລະ ກຽມຈະປັບຂຶ້ນເງິນເດືອນ ຂັ້ນຕໍ່າ ຂອງພະນັກງານລັດຖະກອນ ເພື່ອໃຫ້ໃກ້ຄຽງກັບສະພາບເສດຖະກິດ.

ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ໄດ້ລາຍງານຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ວັນທີ 18 ພະຈິກ 2024 ວ່າ: ລັດຖະບານ ຈະປັບຂຶ້ນເງິນເດືອນ ຂັ້ນຕໍ່າຈາກ 1,850,000 ກີບ ມາເປັນ 2,200,000 ກີບ/ຄົນ/ເດືອນ ເຊິ່ງຈະເລີ່ມຈັດຕັ້ງປະຕິບັດ ແຕ່ງວດທີ 1 ປີ 2025 ເປັນຕົ້ນໄປ ແລະ ສືບຕໍ່ສົບທົບກັບກະຊວງພາຍໃນ ແລະ ພາກສ່ວນທີ່ກ່ຽວຂ້ອງ ເພື່ອຄົ້ນຄວ້າປັບປຸງໂຄງສ້າງດັດສະນີເງິນເດືອນໃນໄລຍະຍາວ ໃຫ້ໃກ້ຄຽງກັບສະພາບເສດຖະກິດ ໃນແຕ່ລະໄລຍະຕາມຄວາມສາມາດຂອງງົບປະມານ.

ກ່ອນໜ້ານີ້ ໃນປີ 2017 ກະຊວງການເງິນ ແລະພາກສ່ວນທີ່ກ່ຽວຂ້ອງໄດ້ດໍາເນີນການປັບຂຶ້ນດັດສະນີເງິນເດືອນໃຫ້ແກ່ພະນັກງານ-ລັດຖະກອນ, ທະຫານ, ຕຳຫຼວດ ແລະພະນັກງານບຳນານ ຈາກ 6,700 ກີບ/ດັດສະນີ ເປັນ 7,200 ກີບ/ດັດສະນີ, ຈາກນັ້ນ ໃນເດືອນມັງກອນ ປີ 2022 ກໍ່ມີການປັບຂຶ້ນ ອີກຄັ້ງ ເປັນ 7,350 ກີບ/ດັດສະນີ ທັງນີ້ ຖ້າຫາກໄລ່ເປັນມູນຄ່າ ຈະຕົກຢູ່ປະມານ 21,600 ຫາ 72,750 ກີບ/ຄົນ/ເດືອນ ຂຶ້ນຢູ່ກັບ ລໍາດັບຊັ້ນ ນາຍ ແລະດັດສະນີ ໃນແຕ່ລະຂັ້ນຕຳແໜ່ງ. ສໍາລັບ ໃນປີ 2023-2024, ລັດຖະບານລາວ ໄດ້ປັບປຸງເງິນເດືອນຂັ້ນຕໍ່າ ຂອງພະນັກງານ-ລັດຖະກອນ ໃຫ້ຢູ່ທີ່ 1,700,000 ກີບ ແລະ ເພີ່ມເງິນອຸດໜູນ ຄ່າຄອງຊີບ ໃຫ້ອີກ 150,000 ກີບ ລວມເປັນ 1,850,000 ກີບ/ຄົນ/ເດືອນ.
ຂ່າວ: ສາວລາວໃຕ້

แชร์