ລັດຖະບານ ນໍາໃຊ້ 3 ມາດຕະການຕົ້ນຕໍໃນການຄວບຄຸມອັດຕາແລກປ່ຽນ

ລັດຖະບານ ໄດ້ເພີ່ມທະວີການຄວບຄຸມອັດຕາແລກປ່ຽນດ້ວຍການໄດ້ນໍາໃຊ້ມາດຕະການຄວບຄຸມ ແລະດໍາເນີນນະໂຍບາຍອັດຕາແລກປ່ຽນຕາມກົນໄກຕະຫຼາດທີ່ມີການຄຸ້ມຄອງຂອງລັດ ເພື່ອບໍ່ໃຫ້ອັດຕາແລກປ່ຽນຜັນຜວນແຮງ.

ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ລາຍງານ ຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 18 ພະຈິກ 2024 ວ່າ: ລັດຖະບານ ໄດ້ນໍາໃຊ້ 3 ມາດຕະການຕົ້ນຕໍໃນການຄວບຄຸມອັດຕາແລກປ່ຽນ ຄື: : 1) ປັບປຸງກົນໄກການກໍານົດ ອັດຕາແລກປ່ຽນ ໃນແຕ່ລະໄລຍະ; 2) ສ້າງຕັ້ງຕະຫຼາດແລກປ່ຽນເງິນຕາແບບອີເລັກໂທຣນິກ (LFX) ດ້ວຍການຮ່ວມທຶນ ລະຫວ່າງ ທະນາຄານແຫ່ງ ສປປ ລາວ ກັບ ທະນາຄານທຸລະກິດ 11 ແຫ່ງ ເພື່ອຮັບໃຊ້ສັງຄົມ ແນໃສ່ການຈຳກັດ ແລະ ຕີຖອຍການແລກປ່ຽນນອກລະບົບທະນາຄານແບບຊະຊາຍ; 3) ໄດ້ເລີ່ມຄົ້ນຄວ້າ ປັບປຸງກົນໄກ ແລະ ລະບຽບການຄຸ້ມຄອງທະນາຄານຄໍາ, ຮ້ານຂາຍຄໍາ ແລະ ວັດຖຸມີຄ່າ ກໍ່ຄືບັນດາຫົວໜ່ວຍ ເສດຖະກິດທີ່ກ່ຽວຂ້ອງ ເພື່ອປະກອບສ່ວນເຮັດໃຫ້ເສດຖະກິດ-ເງິນຕາ ມີຄວາມເຂັ້ມແຂງ.

ຈາກການ ປະຕິບັດບັນດາມາດຕະການດັ່ງກ່າວມານັ້ນ ສາມາດເຮັດໃຫ້ການອ່ອນຄ່າຂອງເງິນກີບ ທຽບໂດລາສະຫະລັດ ສະເລ່ຍ 10 ເດືອນປີ 2024 ຫຼຸດລົງຈາກ ອັດຕາ 23.46% ໃນປີ 2023 ມາເປັນ 13%, ພ້ອມນີ້ ຍັງເຮັດໃຫ້ສ່ວນຕ່າງອັດຕາແລກປ່ຽນ ລະຫວ່າງ ທະນາຄານທຸລະກິດ ແລະ ຕະຫຼາດນອກລະບົບ ທີ່ຂະຫຍາຍກວ້າງ ອອກ ຫຼາຍກວ່າ 10% ໃນໄຕມາດ 1-2 ໄດ້ຄ່ອຍໆຫຍັບໃກ້ເຂົ້າມາຢູ່ໃນລະດັບຕໍ່າກວ່າ 3% ນັບແຕ່ເດືອນ 9 ເປັນຕົ້ນມາ.
ຂ່າວ: ໃພ້ໄຊທານີ

แชร์