ສສຊ ເຂດທີ 13 ສະເຫນີປະຕິຮູບການສຶກສາ ໃຫ້ແທດເໝາະກັບພື້ນຖານຊີວິດການເປັນຢູ່ປະຊາຊົນ

ໃນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX, ເມື່ອວັນທີ 18 ພະຈິກ 2024, ທ່ານ ໄຊຍະເດດ ຜຸຍຍະວົງ ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 13 ແຂວງສະຫວັນນະເຂດ ໄດ້ປະກອບຄໍາເຫັນຕໍ່ບົດລາຍງານຂອງລັດຖະບານກ່ຽວກັບແຜນພັດທະນາເສດຖະກິດ-ສັງຄົມ ໂດຍສະເພາະ ຂົງເຂດວັດຖະນະທຳສັງຄົມ ຕິດພັນກັບການສຶກສາຢາກໃຫ້ມີການປະຕິຮູບຄືນໃໝ່.

ທ່ານ ໄຊຍະເດດ ຜຸຍຍະວົງ ໄດ້ກ່າວວ່າ: ຂົງເຂດວັດຖະນະທຳສັງຄົມຕິດພັນກັບການສຶກສາຢາກໃຫ້ມີການປະຕິຮູບຄືນໃໝ່ໃຫ້ແທດເໝາະກັບ ສະພາບການຂະຫຍາຍຕົວ ທາງດ້ານເສດຖະກິດ-ສັງຄົມ ແລະ ພື້ນຖານຊີວິດການເປັນຢູ່ຂອງປະຊາຊົນ ເປັນຕົ້ນ ການຈັດຕາຕະລາງການຮຽນ-ການສອນ ຄວນໃຫ້ອີງໃສ່ຫລັກຈິດຕະວິ ທະຍາ, ອາທິດໜຶ່ງຈະໃຫ້ນັກຮຽນແຕ່ລະລະດັບ ຮຽນຈັກຊົ່ວໂມງ, ກິດຈະກຳກິລາ-ດົນຕີ ຈັກຊົ່ວໂມງ. ສ່ວນໃນເຂດທຸກຍາກ ທຸລະກັນດານ ບາງຄອບຄົວມີຄວາມຕ້ອງການແຮງງານສູງ ຄວນໃຫ້ຮຽນເຄິ່ງວັນ ຮຽນຄາບເຊົ້າ ພັກຄາບແລງ, ຮຽນຄາບແລງພັກຄາບເຊົ້າເພື່ອບໍ່ໃຫ້ນັກຮຽນຖືກກົດດັນ ຈາກຄອບຄົວໃຫ້ປະລະການຮຽນ, ທັງເປັນການແກ້ໄຂ ບັນຫາການສອນຫ້ອງຄວບ ເພາະວິຖີຊີວິດ ຂອງປະຊາຊົນໃນເຂດຊົນນະບົດ ຍັງຫລຸດໂຕນຈາກຄົນໃນຕົວເມືອງຫລາຍ. ສະນັ້ນຄວນຈັດສັນເວລາໃຫ້ເດັກເຂົ້າຮໍ່າຮຽນໃຫ້ແທດເໝາະຕື່ມ.

ພ້ອມນີ້, ທ່ານຍັງໄດ້ສະເໜີເພີ່ມງົບປະມານເຂົ້າໃນການສະໜອງອຸປະກອນການຮຽນ-ການສອນ ຢູ່ເຂດຊົນນະບົດຫ່າງໄກສອກຫລີກເປັນຕົ້ນປື້ມອ່ານໃຫ້ນັກຮຽນ ໄດ້ສຶກສາຮໍ່າຮຽນດ້ວຍຕົນເອງໃຫ້ຫລາຍຂຶ້ນ.

ຂ່າວ: ສາວລາວໃຕ້

แชร์